مقام فقہ

قرآن کریم کا یہ فیصلہ کہ اس امت میں "تفقہ فی الدین "کی اشد ضرورت ہے اور "چاہیے کہ ایک جماعت فقہ میں لگی رہے اور دوسرے ان سے ان احکام کو اخذ کریں "یہ بات اب کھل کر آپ کے سامنے آچکی ہے، اس کی رو سے فقہ کتاب وسنت کا غیر نہیں۔انہی کی گہرائی میں لپٹے مضامین کا نمایاں ہوکر سامنے آنا ہے۔ سو فقہ الہی ہدایت اور نبوی شریعت کی ہی ایک استخراجی صورت ہے۔یہی وجہ ہے کہ قرآن کریم بھی فقہ کا احساس دلاتا ہے اور بتلاتا ہے کہ اسے سمجھنے کے لیےبھی فقہ کی ضرورت ہے ۔

اجتہاد سے جو بات ثابت ہوتی ہے وہ کتاب وسنت کا ایک پھیلاؤہے ۔یہ کتاب وسنت پر کوئی اضافہ نہیں ۔آنحضرت صلی اللہ علیہ وسلم کی نبوت اس میں جاری وساری ہے حضور صلی اللہ علیہ وسلم جو کچھ صراحت سے فرماگئے وہ بھی آپ صلی اللہ علیہ وسلم کی شریعت ہے اور جو بات نئے حالات کی پیش آمدہ ضرورتوں میں قرآن وسنت کی گہرائیوں میں لپٹی ملے وہ بھی آپ صلی اللہ علیہ وسلم کی ہی شریعت ہی میں شمار ہوگی ۔البتہ یہ ضروری ہے کہ استنباط کرنے والا مجتہد عام آدمی نہ ہو۔ مجتہد صرف مظہر ہوتا ہے وہ اپنے استنباط کردہ مسائل کا موجد نہیں ہوتا۔

ترجمہ: آپ صلی اللہ علیہ وسلم کہہ دیں ہر اچھائی اور برائی اللہ کے فیصلے سے ہے ۔کیا ہوگیا ان لوگوں کو بات سمجھنے کا سلیقہ نہیں۔

حدیث بات ہے اور اسے سمجھنے کا سلیقہ فقہ ہے۔ حدیث کے لیے فقہ درکار ہے بدوں اس کے وہ بات سمجھ نہ پائیں گے ۔اوروں کی بات تو اپنی جگہ رہی پیغمبر کی بات ہو تو بھی اس لیے کہ لوگ اسے سمجھ پائیں انہیں اس کی فقہ حاصل ہونی چاہیے۔ حضرت موسی علیہ السلام کی مشہور دعا کسے یاد نہیں ۔

"ترجمہ: اے رب کشادہ کر میرا سینہ اور آسان کر میری منزل اور کھول دے گرہ میری زبان کی اور پالیں یہ میری بات میں فقہ(سمجھ)

ذوالقرنین جب دو پہاڑوں کے بیچ پہنچا تو ان سے ورے کچھ ایسے لوگ پائے جو اس کی ایک بات نہ سمجھ سکتے تھے ان کی اس بے چارگی کو قرآن کریم اس طرح بیان کرتا ہے کہ اس کی بات فقہ سے آشنا نہ ہوسکی کچھ سمجھی نہ جاسکی۔

ترجمہ: یہاں تک کہ جب وہ پہنچا دو پہاڑوں کے مابین تو ان کے ورے ایسی قوم دیکھی جو ایک بات کی فقہ (سمجھ) نہ رکھتے تھے۔

ہمارے جو دوست فقہ کے نام سے چڑتے ہیں اور یہ لفظ تک سننا پسند نہیں کرتے وہ نہیں دیکھتے کہ قرآن کریم عام سمجھ اور دانش کے لیے لفظ فقہ بار بار لاتا ہے پھر ان کے اس لفظ سے چڑنے کے کیا معنی رہ گئے؟ اللہ تعالی کسی قوم کو فقہ ودانش سے محروم نہ کرے۔ اصطلاحاً جسے فقہ کہا جاتا ہے وہ بھی کتاب وسنت کا غیر نہیں ۔کتاب وسنت کی گہرائی میں اتر کر ان کو پا لینے کانام فقہ ہے۔فقہ کوئی نئی ایجاد نہیں کتاب وسنت کا ہی استخراج ہے ۔

قرآن کریم نے کافروں کو کہا ہے کہ وہ فقہ سے محروم ہیں :

ترجمہ: البتہ تمہارا ڈرزیادہ ہے ان کے دلوں میں اللہ کے ڈر سے یہ اس لیے کہ وہ لوگ فقہ نہیں رکھتے ۔

ترجمہ: اور البتہ پیدا کیے ہیں ہم نے جہنم کے لیے بہت سے جن اور بہت سے آدمی ،ان کے دل ہیں جن میں فقہ نہیں ،ان کی آنکھیں ہیں مگر وہ ان سے دیکھتے نہیں اور ان کے کان ہیں مگر وہ ان سے سنتے نہیں وہ ایسے ہیں جیسے چوپائے ہوں۔

ترجمہ: سو مہر لگ چکی ہے ان کے دلوں پر سو اب وہ فقہ سے بالکل بے تعلق ہیں۔

ترجمہ: اور لیکن منافق اپنے پاس فقہ نہیں رکھتے،

ترجمہ: بلکہ وہ فقہ نہ رکھتے تھے مگرچند لوگ۔

ترجمہ: وہ ایسے لوگ جن کے پاس فقہ نہ ہو۔

ترجمہ: ہم تمہاری کہی باتوں میں کچھ فقہ نہیں پاتے ۔

ترجمہ: کاش کہ وہ فقہ پاس رکھے ہوتے۔