محدث کبیر سیدنا عبداللہ بن مسعودرضی اللہ عنہ

سیدنا عبداللہ ابن مسعودرضی اللہ عنہ اصحاب رسول صلی اللہ علیہ وسلم کی نظر میں

سیدنا حضرت عمر بن خطاب رضی اللہ عنہ، آپ رضی اللہ عنہ کے متعلق فرماتے ہیں:

کہ عبداللہ بن مسعود رضی اللہ عنہ علم کا بھر پور خزانہ ہیں۔

حضرت عمررضی اللہ عنہ نے اہل کوفہ کو خط لکھا جس میں حضرت عبداللہ بن مسعود رضی اللہ عنہ کے متعلق فرمایا” وقد اٰثرتکم بعبداللہ علی نفسی وفی روایۃ منہ وتعلموا"

ترجمہ: اے اہل کوفہ! مجھے عبداللہ رضی اللہ عنہ کی انتہائی ضرورت ہے۔ لیکن اس کے باوجود میں تم کو اپنے اوپر ترجیح دے کر ان کو تمہاری طرف بھیج رہا ہوں ان سے علم حاصل کرو۔

ترجمہ : اے اللہ ! میں تجھے گواہ بناتا ہوں کہ میں ان کے بارے میں وہی کہتا ہوں جو یہ (دیگر لوگ)کہہ رہے ہیں یا ان سے بڑھ کر کہتا ہوں کہ انہوں نے قرآن کریم پڑھا تو اس کے حلال کو حلال سمجھا اور اس کے حرام کو حرام سمجھا، یہ آپ کے دین کی سمجھ رکھنے والے اور سنت رسول صلی اللہ علیہ وسلم کو جاننے والے ہیں۔

حضرت ابو موسیٰ اشعری رضی اللہ عنہ نےسیدنا عبداللہ بن مسعود رضی اللہ عنہ کے بارے میں لوگوں کو فرمایا:’’لاتسئلونی ما دام ھذا الحبر فیکم‘‘

کہ جب تک یہ بڑے عالم تمہارے اندر موجود ہیں مجھ سے مت پوچھو۔

حضرت عبدالرحمٰن بن یزید رحمہ اللہ کہتے ہیں کہ ایک دفعہ ہم حضرت حذیفہ رضی اللہ عنہ کی خدمت میں حاضر ہوئے اور پوچھا کہ اخلاق وعادات اور عمومی طور طریقہ میں نبی کریم صلی اللہ علیہ وسلم کے زیادہ قریب کون ہیں ؟ہم ان سے علم سیکھنا چاہتے ہیں۔

حضرت حذیفہ رضی اللہ عنہ فوراً بولے’’طور طریقوں اور عادات و اطوار میں نبی کریم صلی اللہ علیہ وسلم سے سب سے زیادہ مشابہت حضرت ا بن مسعود رضی اللہ عنہ رکھتے تھے۔ اصحاب رسول صلی اللہ علیہ وسلم جانتے ہیں کہ ان سب کے مقابلے میں ابن ام عبد(عبداللہ بن مسعود رضی اللہ عنہ )ان سب سے زیادہ اللہ تعالیٰ سے سب سے زیادہ قریب ہیں‘‘

دوسرے مقام پر حضرت حذیفہ رضی اللہ عنہ سیدنا عبداللہ بن مسعود رضی اللہ عنہ کے متعلق فرماتے ہیں:

کہ سیرت، رہنمائی اورقرابت میں حضرت محمد صلی اللہ علیہ وسلم سے سب سے زیادہ مشابہت حضرت عبداللہ بن مسعودرضی اللہ عنہ رکھتے تھے۔

ابو عمرو شیبانی رحمہ اللہ کہتے ہیں کہ میں سال بھر حضرت عبداللہ بن مسعود رضی اللہ عنہ کی مجلس میں حاضر ہوتا رہا۔ اکثر وہ " قال رسول اللہ صلی اللہ علیہ وسلم" کہہ کر حدیث بیان نہیں کرتے تھے۔ اگر کبھی" قال رسول اللہ صلی اللہ علیہ وسلم "کہہ کر حدیث بیان کرنے لگتے تو ان پر لرزہ طاری ہوجاتا۔ پھر کہتے اس طرح فرمایا، یا اس کی مثل فرمایا، یا اس کے قریب فرمایا۔

حضرت مسروق رحمہ اللہ بیان کرتے ہیں:

کہ ایک دن حضرت عبداللہ بن مسعود رضی اللہ عنہ نے ہمیں حدیث بیان کی۔ آپ رضی اللہ عنہ کا جسم مبارک کانپ رہا تھا اور آپ رضی اللہ عنہ کے کپڑے بھی آپ رضی اللہ عنہ کی کپکپاہٹ کی وجہ سے زور زور سے ہِل رہے تھے۔ حدیث بیان کرنے کے بعد آپ رضی اللہ عنہ نے فرمایا کہ نبی صلی اللہ علیہ وسلم نے اس کےمشابہ یا اس کے قریب قریب فرمایا۔

ترجمہ: حضرت مسروق رحمہ اللہ فرماتے ہیں کہ میں نے اصحاب محمد صلی اللہ علیہ وسلم کو سونگھا (یعنی علمی اعتبار سے بغور دیکھا )تو تمام صحابہ رضی اللہ عنہم کے علم کو ان چھ میں پایا یعنی حضرت علی، حضرت عمر، حضرت عبداللہ بن مسعود، حضرت زید، حضرت ابودرداء اور حضرت ابی بن کعب رضی اللہ عنہم۔ پھر ان چھ کو سونگھا تو ان کے علم کو حضرت علی المرتضیٰ اور حضرت عبدللہ بن مسعود رضی اللہ عنہما میں پایا۔

سیدنا حضرت عبداللہ بن مسعود رضی اللہ عنہ سے تقریباً آٹھ سو اڑتالیس (۸۴۸) احادیث مروی ہیں۔ ان میں سے چونسٹھ (۶۴)احادیث متفق علیہ ہیں۔ اکتالیس (۴۱) میں بخاری اور پینتیس (۳۵) میں مسلم منفرد ہیں۔

اتنی بڑی شخصیت کی مسند علمی کے وارث سیدنا اما م اعظم فی الفقہاء ابوحنیفہ نعمان بن ثابت التابعی الکوفی رحمہ اللہ بنے اور ان کے علم کو امت تک صرف پہنچایا نہیں بلکہ پہنچانے کا حق ادا کردیا۔

اللہ تعالیٰ ان کے درجات کو بلند فرمائے اور ہمیں ان کے نقشہ قدم پر چلنے کی توفیق عطاء فرمائے۔