شوال کے 6 روزوں کی فضیلت

حضرت ابو ایوب انصاری رضی اللہ عنہ سے روایت ہے رسول اللہ صلی اللہ علیہ وسلم نے فرمایا : ’’جس نے رمضان کے روزے رکھے اس کے بعد شوال کے چھ (نفلی) روزے رکھے تو یہ پورے زمانے کے روزے رکھنے کی مانند ہے۔‘‘

فوائد الحسنة بعشر امثالها (ایک نیکی کا اجر کم از کم دس گنا ہے) کے مطابق ایک مہینے(رمضان) کے روزے دس مہینوں کے برابر ہیں, اور اس کے بعد شوال کے چھ روزے بھی رکھ لیے جائیں جنہیں شش عید روزے کہا جاتا ہے تو یہ دو مہینے کے برابر ہوگئے یوں گویا پورے سال کے روزوں کا مستحق ہوگیا۔ دوسرے لفظوں میں اس نے پورے سال کے روزے رکھے اور جس کا یہ مستقل معمول ہوجائے تو وہ ایسے ہے جیسے اس نے پوری زندگی روزوں کے ساتھ گزاری وہ اللہ کے ہاں ہمیشہ روزہ رکھنے والا شمار ہوگا۔ اس اعتبار سے یہ شش عید روزے بڑی اہمیت رکھتے ہیں گو ان کی حیثیت نفلی روزوں ہی کی ہے۔ یہ روزے متواتر رکھ لیے جائیں یا ناغہ کرکے ، دونوں طرح جائز ہیں ، تاہم شوال کے مہینے میں رکھنے ضروری ہیں۔ اسی طرح جن کے رمضان کے فرضی روزے بیماری یا سفر کی وجہ سے رہ گئے ہوں ، ان کیلئے ضروری ہے کہ پہلے وہ فرضی روزوں کی قضا دیں اور اس کے بعد شوال کے چھ نفلی روزے رکھیں۔

شوال کے چھ روزوں کی بابت: علامہ قاسم بن قطلوبغا کی تحقیق (۲)

مالکیہ کے صحیح مذہب کی تفصیل: چونکہ ان روزوں کی نفی کے بارے میں سب سے زیادہ پیش کی جانی والی دلیل امام مالک کا قول ہے‘ اس لئے مالکیہ کی معتبر کتابوں سے اس بارے میں وہ تصریحات بھی پیش کی جاتی ہیں جن سے ان کا مذہب‘ جمہور کے مذہب کے قریب نظر آتاہے اور امام مالک کے قول کی صحیح تشریح بھی ہوجاتی ہے۔

۱:- سب سے پہلے شرح زرقانی کی عبارت ذکر کرتے ہیں جس میں ”موطأ“ والی ان کی روایت کا مفہوم بیان کیا گیاہے۔

”یحییٰ کہتے ہیں: کہ میں نے عید الفطر کے بعد چھ روزوں کے بارے میں امام مالک کو یہ فرماتے ہوئے سنا کہ: ”میں نے اہل علم وفقہ (اور اہل اجتہاد) میں سے کسی کو یہ روزے رکھتے ہوئے نہیں دیکھا ہے اور نہ ہی سلف میں سے (جن حضرات کو میں نے نہیں پایا‘ جیسے صحابہ اور کبار تابعین) کسی سے کوئی روایت پہنچی‘ چنانچہ اہل علم اس کو پسند نہیں کرتے تھے‘ اور ان کو اس کے بدعت بن جانے اور بے علم لوگوں کا رمضان کے ساتھ غیر رمضان کو ملانے کا اندیشہ تھا۔“

مطرف فرماتے ہیں کہ: امام مالک نے اس مذکورہ وجہ کی بنیاد پر ان روزوں کو مکروہ سمجھا تھا، ورنہ جو شخص صرف فضیلت کے حصول کی نیت سے یہ روزے رکھے تو اس کے لئے کراہت نہیں‘ صحیح مسلم اور سنن اربعہ میں حضرت ابو ایوب انصاری کی روایت ہے کہ رسول اللہ نے ارشاد فرمایا:”جس شخص نے رمضان کے روزے رکھے‘ پھر اس کے بعد شوال کے چھ اور روزے رکھے تو یہ پورا سال روزے رکھنے کی طرح ہے“۔

قاضی عیاض فرماتے ہیں: اس کی وجہ یہ ہے کہ ایک نیکی دس کے برابر ہے اور چھ روزوں سے ایک سال کا حساب پورا ہوجاتاہے‘ جیساکہ نسائی نے روایت کیا ہے۔ ہمارے مشائخ فرماتے ہیں کہ امام مالک نے اس وجہ سے اس کو مکروہ قرار دیا کہ کہیں جاہل لوگ رمضان کے ساتھ غیر رمضان کو جوڑ نہ دیں، البتہ شریعت (کے بیان کردہ فضیلت) کی بناء پر یہ روزہ رکھنا مکروہ نہیں۔

نیز کہا گیا ہے کہ امام مالک کو (متعلقہ) حدیث نہیں پہنچ سکی یا (پہنچی تو صحیح مگر) ان کے نزدیک (استدلال کے درجہ میں) ثابت نہ ہوسکی یا اہل مدینہ کا عمل اس کے برعکس تھا۔ اور یہ بھی ممکن ہے کہ انہوں نے عید کے دن کے ساتھ ملا کر رکھنے کو مکروہ سمجھا ہو‘ چنانچہ اگر مہینہ کے درمیان میں رکھے تو پھر کوئی کراہت نہیں اور ان کے قول ”ستة ایام بعد الفطر من رمضان“ کا ظاہری معنی بھی یہی بنتا ہےاور ابو عمر (ابن عبد البر) فرماتے ہیں کہ: امام مالک بچ بچ کر چلنے والے دین کے معاملہ میں نہایت احتیاط برتنے والے آدمی تھے‘ اور روزہ ویسے تو ایک نیک عمل ہے مگر (یہاں) اس کا رکھنا بھی اچھا نہیں سمجھا (کیونکہ) بے علم لوگوں کی کوتاہی کا اندیشہ تھا‘ جیساکہ خود بیان کیا ہے۔ امام مالک کے نزدیک (متعلقہ) حدیث ثابت نہ ہوسکنے (حالانکہ صحیح مسلم میں موجود ہے) اس کی وجہ یہ ہے کہ اس کی سند میں سعد بن سعید راوی ہیں جس کو امام احمد نے ضعیف کہا ہے، اور نسائی نے کہا کہ: لیس بالقوی اور ابن سعد نے کہا : ثقة قلیل الحدیث اور ابن عیینہ وغیرہ نے کہا: کہ یہ حدیث ابو ایوب پر موقوف ہے‘ یعنی اس بات کا امکان ہے کہ یہ ان کی اپنی رائے ہو‘ کیونکہ ایک نیکی تو ویسے بھی دس کے بدلے میں ہے تو اس حدیث کی دو علتیں ہوئیں : ایک اس کے راوی میں اختلاف ہونا ‘ دوسری موقوف کہا جانا (انتہی) (۱۴) ۲:- ابن رشد نے ”بدایة المجتہد“ میں لکھا ہے:

”بہرحال شوال کے چھ روزے کے بارے میں ثابت ہے کہ رسول اللہ ا نے ارشاد فرمایا:”جس شخص نے رمضان کے روزے رکھے پھر اس کے بعد شوال کے چھ اور رکھے ‘ تو یہ ایسا ہے جیسے اس نے پورے سال روزے رکھے“۔

مگر امام مالک نے اس کو مکروہ کہا ہے‘ اس کی وجہ یا تو یہ ہے کہ ان کو اس بات کا خوف تھا کہ کہیں عام لوگ رمضان کے ساتھ غیر رمضان کو جوڑ نہ دیں اور یا اس وجہ سے کہ ان کو متعلقہ حدیث نہیں پہنچ سکی‘یا یہ حدیث ہی ان کے نزدیک استدلال کے درجہ کو نہیں پہنچ پاتی اور یہی (توجیہ) زیادہ واضح ہے۔“ (۱۵)

۳:- علامہ ابن شاش المتوفی:۶۱۶ھ نے ”عقد الجواہر الثمینة فی مذہب عالم المدینة“ میں لکھا ہے:

”صحیح روایت میں شوال کے چھ روزوں کا ذکر آیا ہے‘ مگر امام مالک کو یہ خدشہ لاحق تھا کہ کہیں جاہل لوگ فرائض کے ساتھ غیر فرض کو شامل نہ کر بیٹھیں‘ تحدید کی کراہت میں ان کے اصل کے مطابق ‘ چنانچہ ان دنوں کے علاوہ ان روزوں کے رکھنے کو مستحب سمجھا ہے‘ کیونکہ اس سے بھی مقصود حاصل ہوجاتاہے یعنی ان چھ دنوں اور رمضان کے روزوں کے ثواب کا کئی گنا ہوجانا یہاں تک کہ ایک سال کی تعداد کو پہنچ جائیں‘ جیساکہ رسول اللہ صلی اللہ علیہ وسلم نے ارشاد فرمایا:

”رمضان کے روزے دس مہینوں کے برابر ہیں اور چھ روزے دو مہینوں کے برابر ‘ تو یہ ایک سال کے روزے ہوگئے“۔

ان روزوں کے لئے شوال کو مقرر کرنے کی بنیادمکلف کے لئے آسانی پیدا کرنے پر ہے‘ کیونکہ اس کو روزہ رکھنے کی عادت ہوگئی ہے ‘ مذکورہ وقت کے ساتھ اس کے حکم کو خاص کرنا مقصود نہیں‘ لامحالہ اگر کوئی عشرہ ذی الحجہ کے دوران رکھے گا ‘ جبکہ اس میں روزہ رکھنے کی بھی فضیلت آئی ہے‘ تو بہت ہی بہتر ہوگا‘ کیونکہ مقصود یہاں بھی حاصل ہوتا ہے‘ ساتھ میں اس عشرہ کی فضیلت بھی حاصل ہوگی اور امام مالک کو جس چیز کا اندیشہ تھا‘ اس سے بھی حفاظت رہے گی۔“ (۱۶)

۴:- امام قرافی المتوفی: ۶۸۴ھ نے ”الذخیرة“ میں لکھا ہے:”صحیح مسلم میں ہے ”جس نے رمضان کے روزے رکھے اور اس کے بعد شوال کے چھ اور رکھے تو گویا اس نے پورا سال روزے رکھے‘ امام مالک شوال کے علاوہ کسی اور مہینے میں ان روزوں کے رکھنے کو مستحب سمجھتے ہیں‘ اس خوف کی وجہ سے کہ کہیں جاہل لوگ ان کو رمضان کے ساتھ ہی شامل نہ کردیں اور جہاں تک شوال کی بات ہے تو شریعت نے صرف مکلف کی آسانی کی خاطر اس کی تعیین کی ہے‘ کیونکہ یہ مہینہ رمضان کے قریب ہے‘ ورنہ مقصد تو دوسرے مہینہ میں بھی حاصل ہوجاتا ہے ‘ لہذا دونوں مصلحتوں کی خاطر تاخیر مشروع ہوگی۔ رسول اللہ صلی اللہ علیہ وسلم کے قول: ”فکانما صام الدہر“ کا معنی یہ ہے کہ ایک نیکی دس کے برابر ہے‘ تو ایک مہینہ دس مہینوں کے اور چھ روزے ساٹھ دن کے برابر ہوگئے تو یہ ایک سال کا حساب ہوگیا اور جب سالہا سال اس طرح کرے گا تو گویا اس نے ساری زندگی روزے رکھے۔

سوال: تشبیہ میں مساوات یا مقاربہ شرط ہوتا ہے اور یہاں تو کوئی نہیں ‘ اس وجہ سے کہ یہ روزہ صوم الدہر کا عشر ہے اور کسی چیز کے عشر اور کل میں کوئی مقاربہ نہیں ہوتا؟ اس کا جواب یہ ہے کہ: مذکورہ تشبیہ کا مطلب یہ ہے کہ گویا صوم الدہر رکھ لیا‘ اگر کسی دوسری امت میں سے ہوتا۔ کیونکہ ہمارا ایک مہینہ ہم سے پہلی امتوں کے دس مہینوں کے برابر ہے اور ہمارے چھ روز ان کے دو مہینوں کے برابر ہیں ‘ لہذا ہر اعتبار سے مساوات پائی گئی۔ تنبیہ: یہ ثواب مختلف الاجر ہے‘ اس طرح کہ اس میں سے پانچ سدس تو مرتبہ کے اعتبار سے بڑے درجہ میں ہے‘ کیونکہ وہ واجب کے باب میں سے ہے اور ایک سدس نفل کا ثواب ہے۔ فائدہ: روایت میں ”بست“ کے الفاظ ہیں تذکیر کے ساتھ اصل کی رعایت کی خاطر ”بستة“ نہیں فرمایا‘ جبکہ عدد میں مذکر کے لئے تانیث ضروری ہے‘ کیونکہ عرب لوگ لیلی کو سبقت کی وجہ سے ایام پر غلبہ دیتے ہیں‘ جیساکہ آپ کہتے ہیں: ”لعشر مضین من الشہر“۔ (۱۷)

دور اخیر کے محقق عبد العزیز بن صدیق العماری نے بھی ”شرح العثماویة“ میں اس پر سیر حاصل بحث کی ہے اور اس مسئلے میں متکلم فیہ روایت کا سہارا لینے والوں کی خوب خبر لی ہے‘ کیونکہ اس باب کی روایات تواتر کی حدود کو چھورہی ہیں۔ موصوف کا ان روایات پر تفصیلی کام کرنے کا بھی ارادہ تھا (۱۸) اگر وہ یہ کر چکے ہوں تو پھر بزعم خویش محققین کے لئے گنجائش نہیں چھوڑی ہوگی۔ اس باب کے دیگر موضوعات کو مستقل رسالہ لکھنے تک چھوڑ دیتے ہیں۔ ان شاء اللہ

۱۴- شرح الزرقانی ۲/۱۹۰ ۱۵- بدایة المجتہد لابن رشد الحفید ۱/۳۰۸ ۱۶- عقد الجواہر الثمینة فی مذہب عالم المدینة لابن شاش المالکی ۱/۳۶۹ طبع دار العرب الاسلامی بیروت ۱۷- الذخیرة للقرافی المتوفی: ۶۸۴ھ ۲/۵۳۰ طبع: دار الغرب الاسلامی بیروت ۱۸- اتحاف ذوی الہمم العالیة بشرح العثماویة ص:۱۵۵-۱۵۷ ابو الیسر عبد العزیز بن صدیق الغماری طبع دار البشائر الاسلامیة ۱۴۲۲ھ

قارئین کرام !ہم پورے وثوق و اعتماد کے ساتھ عرض کرتے ہیں کہ نماز عید میں چھ زائد تکبیریں سنت رسول ہیں ، سنت صحابہ اور سنت تابعین ہیں۔ثبوت کے طور چند احادیث وآثار ملاحظہ فرمائیں لیکن یہ بات ملحوظ خاطر رہے کہ نماز عید میں بحالت قیام تین تکبیریں اصلی ہیں یعنی تکبیرتحریمہ اور رکوع کی دو تکبیریں ،ان کو تکبیرات صلاتیہ بھی کہا جاتا ہے اور چھ زائد تکبیریں ہیں۔ بعض احادیث میں مجموعی تعداد نو کا ذکر ہے ،بعض میں پہلی رکعت میں پانچ کا اور دوسری رکعت میں چار کا ذکر ہے ،بعض میں چار چار تکبیروں کا ذکر ہے یعنی پہلی رکعت میں تکبیر تحریمہ سمیت قراءۃ کے پہلے چار تکبیریں ہیں اور رکوع والی تکبیر ان سے الگ قراۃ کے بعد ہے اور دوسری رکعت میں قراۃ کے بعد تکبیر رکوع سمیت چار تکبیریں ہیں۔حاصل سب کا ایک ہے کہ نماز عید میں بحالت قیام مجموعی طور پر نو تکبیریں ہیں ،تین تکبیرات صلاتیہ )یعنی تکبیر تحریمہ اور رکوع کی دو تکبیریں اور (چھ زائد تکبیریں۔

ابو عبد الرحمن قاسم رحمہ اللہ فرماتے ہیں کہ مجھے اصحاب رسول اللہ صلی اللہ علیہ وسلم میں سے بعض صحابہ رضی اللہ عنہم نے بتایا کہ ہمیں نبی پاک صلی اللہ علیہ وسلم نے نماز عید پڑھائی۔ پس آپ نے چار چار تکبیریں کہیں پھر نماز سے فار غ ہو کر رخ انور ہماری طرف کر کے فرمایا بھول ناجانا عید کی تکبیریں جنازہ کی تکبیروں کی طرح چار ہیں۔ آپ صلی اللہ علیہ وسلم نے انگوٹھا بند کر کے چار انگلیوں کے ساتھ اشارہ بھی فرمایا۔

یہ حدیث لکھ کر علا مہ شمس الدین سرخسی رحمہ اللہ فرماتے ہیں

یعنی اس حدیث میں آپ کا قول،عمل،اشارہ ،تاکید اور استدلال ہے یعنی جیسے جنازہ میں تکبیر تحریمہ کے بعد تین تکبیریں ہیں اسی طرح عیدین میں تکبیرات صلاتیہ کے علاوہ ہر رکعت میں زائد تکبیریں تین ہیں۔

حضرت ابو ہریرہ کے ہم نشین ابو عائشہ فرماتے ہیں کہ سعید بن العاص )گورنر کوفہ ( نےحضرت ابو موسیٰ اشعری رضی اللہ عنہ اور حضرت حذیفہ رضی اللہ عنہ سے دریافت کیا کہ رسول اللہ صلی اللہ علیہ وسلم عیدین میں تکبیریں کیسے کہتے تھے ؟حضرت ابو موسیٰ اشعری رضی اللہ عنہ نے فرمایا کہ رسول اللہ صلی اللہ علیہ وسلم نماز عیدین میں اس طرح تکبیریں کہتے تھے جیسے نماز جنازہ میں تکبیریں کہی جاتی ہیں )یعنی ہر رکعت میں چارچار ( حضرت حذیفہ رضی اللہ عنہ نے فرمایا اس نے سچ کہا پھر حضرت ابو موسیٰ اشعری رضی اللہ عنہ نے فرمایا جب میں بصرہ میں حاکم تھا تو اسی طرح تکبیریں کہتا تھا اور مصنف ابن ابی شیبہ میں ہے ابو عائشہ فرماتے ہیں میں حضرت ابو موسیٰ اشعری رضی اللہ عنہ کی یہ بات نہیں بھولا کہ چار تکبیریں ہیں تکبیرات جنازہ کی طرح۔

علقمہ اور اسود رحمہما اللہ فرماتے ہیں کہ حضرت عبد اللہ بن مسعود رضی اللہ عنہ بیٹھے ہوئے تھے آپ کے پاس حضرت حذیفہ رضی اللہ عنہ اور حضرت ابو موسیٰ اشعری رضی اللہ عنہ بھی موجود تھے سعید بن العاص نے تکبیرات عید کے متعلق پوچھا حضرت حذیفہ رضی اللہ عنہ نے کہا ابو موسیٰ اشعر ی رضی اللہ عنہ سے پوچھئے ،ابو موسیٰ اشعری نے کہا کہ عبد اللہ بن مسعود رضی اللہ عنہ سے پوچھئے )کیوں کہ وہ ہم میں سے پیغمبر صلی اللہ علیہ وسلم کے زیادہ صحبت یافتہ اور زیادہ علم والے ہیں (چنانچہ اس نے حضرت عبد اللہ بن مسعود رضی اللہ عنہ سے پوچھا۔ سو آپ نے فرمایا کہ چار تکبیریں )تکبیر تحریمہ اور تین زائد تکبیریں (کہے پھر قراۃکرے اور تکبیر کہہ کر رکوع کرے پھر دوسری رکعت میں کھڑا ہو کر قراۃ کرے۔ قراۃ کے بعد چار تکبیریں کہے )یعنی تین زائد تکبیریں اور ایک تکبیر رکوع (

کردوس رحمہ اللہ فرماتے ہیں کہ ولید بن عقبہ نے حضرت عبد اللہ بن مسعود، حذیفہ،حضرت ابو موسیٰ اشعری اور حضرت ابو مسعود انصاری رضی اللہ عنہم اجمعین کے پاس عشاء کے بعد ایک آدمی کو بھیج کر مسئلہ پوچھا کہ مسلمانوں کی نماز عید کا طریقہ کیا ہے؟سب نے ابو عبد الرحمٰن یعنی حضرت عبد اللہ بن مسعود رضی اللہ عنہ کی طرف متوجہ کیا چنانچہ سائل نے حضرت عبد اللہ بن مسعود رضی اللہ عنہ سے پوچھا آپ نے جواب میں ارشاد فرمایا کہ امام بحالت قیام چار تکبیریں کہے پھر سورۃ فاتحہ اور مفصلات میں سے کوئی سورۃ پڑھے پھر دوسری رکعت میں چار تکبیریں کہے اور ان میں سے آخری تکبیر میں رکوع کرے پس عیدین کی دونوں رکعتوں میں بحالت قیام یہ نو رکعتیں ہیں اس پر موجود صحابہ رضی اللہ عنہم میں سے کسی نے بھی اعتراض کیا نہ انکار۔

علقمہ اور اسود رحمھما اللہ فرماتے ہیں کہ حضرت عبد اللہ بن مسعود رضی اللہ عنہ عیدین میں نو تکبیریں کہتے تھے چار قراءۃ سے پہلے) تکبیر تحریمہ سمیت(پھر تکبیر کہتے اور رکوع کرتے اور دوسری رکعت میں قراءۃ کرتے پھر قراءۃ سے فارغ ہوکر چار تکبیریں کہتے )تکبیر رکوع سمیت (پھر رکوع کرتے۔

کردوس سے روایت ہے کہ عبد اللہ بن مسعود رضی اللہ عنہ عید الاضحی اور عید الفطر میں نو نو تکبیریں کہتے تھے پھر ایک مرتبہ کہہ کر رکوع کرتے پھر دوسری رکعت میں کھڑے ہو کر پہلے قراءۃ کرتے پھر چار تکبیریں کہتے اور ان میں سے ایک کے ساتھ رکوع کرتے۔

عبداللہ بن حارث رضی اللہ عنہ سے روایت ہے کہ میں بصرہ میں عبداللہ بن عباس رضی اللہ عنہ کے پاس )عید کے موقع پر (حاضر ہوا آپ نے نماز عید میں نو تکبیریں کہیں اور پہلی اور دوسری رکعت کی دونوں قراءتوں کے درمیان تکبیریں نہ کہیں اور حضرت مغیرہ بن شعبہ رضی اللہ عنہ کے پاس حاضر ہوا تو انہوں نے بھی ایسا ہی کیا۔ اسماعیل بن الولید فرماتے ہیں کہ میں نے خالد سے پوچھا ابن عباس نے کیسے کیا؟توانہوں نے ویسے تفصیل بتائی جیسے حضرت عبد اللہ بن مسعود رضی اللہ عنہ کی حدیث میں ہے۔

مسروق رحمہ اللہ تابعی فرماتے ہیں کہ حضرت عبد اللہ بن مسعود رضی اللہ عنہ ہمیں عیدین میں نو تکبیریں سکھاتے ان میں سے پانچ پہلی رکعت میں اور چار دوسری رکعت میں دونوں قراءتوں کے درمیان ترتیب قائم رکھتے )یعنی ان کے درمیان تکبیریں نہ کہتے(

حضرت شعبی رحمہ اللہ تابعی فرماتے ہیں کہ حضرت عبد اللہ بن مسعود رضی اللہ عنہ عید الفطر اور عید الاضحی میں نو نو تکبیریں کہتے۔پانچ پہلی رکعت میں اور چار دوسری رکعت میں دونوں قراءتوں کے درمیان ترتیب قائم رکھتے۔

قتادہ رحمہ اللہ تابعی فرماتے ہیں کہ )بدری صحابی (جابر بن عبداللہ اور) جلیل القدرتابعی (سعید بن مسیب رحمہ اللہ ہر سو حضرات نے فرمایا نماز عید میں نو تکبیریں ہیں اور دونوں قرائتیں لگا تار ہیں )یعنی ان کے درمیان تکبیریں نہیں ہیں (

حضرت شعبی رحمہ اللہ فرماتے ہیں کہ زیاد نے حضرت مسروق رحمہ اللہ کے پاس پیغام بھیجا کہ ہم تو اپنے کاموں کی وجہ سے مسائل کی تحقیق و تعلیم سے غافل ہیں آپ فرمائیے عیدین میں تکبیروں کا مسئلہ کیسے ہے ؟حضرت مسروق رحمہ اللہ نے جواب دیا۔ کل نو تکبیریں ہیں پانچ پہلی رکعت میں )یعنی تکبیر تحریمہ ،تین زائد تکبیریں اور تکبیر رکوع( اور دونوں قرائتیں لگاتار کرے۔

ابراہیم نخعی رحمہ اللہ فرماتے ہیں کہ اسود بن یزید رحمہ اللہ اور مسروق رحمہ اللہ عید میں نو تکبیریں کہا کرتے تھے۔

محمد بن سیرین رحمہ اللہ فرماتے ہیں کہ) رسول اللہ صلی اللہ علیہ وسلم کے خادم خاص(حضرت انس عیدین میں نو تکبیریں کہتے تھے ان نو تکبیروں کی تفصیل محمد بن سیرین رحمہ اللہ نے ویسے ذکر کی جیسا کہ حضرت عبد اللہ بن مسعود رضی اللہ عنہ کی حدیث میں ہے۔

حضرت ابراہیم نخعی رحمہ اللہ فرماتے ہیں کہ عبد اللہ بن مسعود رضی اللہ عنہ کے شاگرد عید میں نو تکبیریں کہتے تھے۔

ابن قلابہ رحمہ اللہ فرماتے ہیں کہ عیدین میں نو نو تکبیریں ہیں۔

جابر رحمہ اللہ فرماتے ہیں کہ ابن جعفرتکبیرات عیدین کے بارے میں حضرت عبد اللہ بن مسعود رضی اللہ عنہ کے قول کے مطابق فتوی دیتے تھے۔

امام ابو محمد رحمہ اللہ فرماتے ہیں ہمیں ابو حنیفہ رحمہ اللہ نے خبر دی کہ وہ حماد رحمہ اللہ سے ،وہ ابراہیم نخفی رحمہ اللہ سے وہ حضرت عبد اللہ بن مسعود رضی اللہ عنہ سے روایت کرتے ہیں کہ ابن مسعود رضی اللہ عنہ کو فہ کی مسجد میں بیٹھے تھے۔ آپ کے پاس حذیفہ بن یمان رضی اللہ عنہ اور ابو موسی اشعری رضی اللہ عنہ موجود تھے کہ ولید بن عقبہ جو اس وقت کوفہ کا امیر تھا ان کے پاس آیا اور کہا کل تمہاری عید ہے بتاو میں کیسے کروں ؟حضرت حذیفہ رضی اللہ عنہ اور حضرت ابو موسی اشعری رضی اللہ عنہ نے عبد اللہ بن مسعود رضی اللہ عنہ سے کہا اے ابو عبد الرحمن!اسے بتائیے کے وہ کیا کرے ؟سو عبد اللہ بن مسعود رضی اللہ عنہ نے اسے حکم دیا کے وہ بغیر اذان اور بغیر اقامت کے نماز پڑھائے اور یہ کہ پہلی رکعت میں) تکبیر رکوع سمیت (چار تکبیریں کہے اور دونوں قراءتو ں کے درمیان ترتیب قائم رکھے )امام محمد رحمہ اللہ فرماتے ہیں(۔وھو قول ابی حنیفۃ رحمہ اللہ۔

اتحاف السادہ شرح احیاء العلوم ج۳ص۳۹۷میں ہے۔ نماز عیدین میں چھ زائد تکبیریں اور دونوں قراء تو ں کے درمیان تکبیریں نہ کہنا اور دونوں رکعتوں کی قراءۃ میں موالاۃمندرجہ ذیل صحابہ وتابعین کا مذہب ہے۔ عبد اللہ بن مسعود ،ابو موسی اشعری ،حذیفہ بن یمان ،عقبہ بن عامر ،عبد اللہ بن زبیر ،ابو مسعود بدری ،ابو سعید خدری ،براء بن عازب ،عمر بن خطاب ،ابو ھریرہ رضوان اللہ علیھم اجمعین حسن بصری ،ابن سیرین ،سفیان ثوری ،امام احمد رحمہ اللہ کا ایک قول یہی ہے اور امام بخاری رحمہ اللہ نے ابن عباس رضی اللہ عنہ کا یہی مذہب بیان کیا ہے اور ابن ہمام نے ذکر کیا کہ ابن عمر کا یہی قول ہے۔

۱۹: امام ترمذی رحمہ اللہ حدیث نقل کرنے کے بعد فرماتے ہیں:

یہ طریقہ اصحاب رسول صلی اللہ علیہ وسلم میں سے کسی ایک کا نہیں بلکہ متعدد حضرات سے مروی ہے اور تمام اہل کوفہ کا مذہب یہی ہے۔

۲۰: رسول اللہ صلی اللہ علیہ وسلم کا وصال ہوا تو جنازہ کی تکبیریں مختلف طور پر کہی جاتی تھیں یعنی ۴،۵،۶،۷،خلیفہ دوم حضرت عمر فاروق رضی اللہ عنہ کے زمانہ تک یہ صورت قائم تھی جب آپ نے اس اختلاف کو دیکھا تو پریشان ہو گئے۔ اس بارے میں صحابہ کرام رضی اللہ عنھم سے مشورہ کیاتو:

صحابہ کرام رضی اللہ عنہم کا اس بات پر اجماع ہو گیا کہ جنازہ کی چار تکبیریں ہیں جیسا کہ عید الاضحی اور عید الفطر کی چار تکبیریں ہیں )عید کی ہر رکعت میں چار تکبیریں ،تکبیر تحریمہ اور دوسری رکعت کی رکوع والی تکبیر شامل کر کے (

اس روایت سے ثابت ہوا کہ عیدیں کی چھ تکبیروں پر صحابہ کرام رضی اللہ عنھم کا اجماع تھا۔