روضہ رسول صلی اللہ علیہ وسلم کی زیارت کا شرعی حکم

مکہ مکرمہ کی حاضری اور حج کے ارکان ادا کرنے کے سے حج مکمل ہوجاتا ہے مکہ مکرمہ کی حاضری کے ساتھ ساتھ اگر مدینہ منورہ حاضری نہ ہو تو گویا یہ سفر نا تمام اور نامکمل رہتا ہے۔ کیونکہ مکہ مکرمہ کی حاضری سے عبادت کی تکمیل جبکہ مدینہ منورہ کی حاضری سے عشق ومحبت کی تکمیل ہوتی ہے۔ حج کے ا بتدائی دنوں میں جانے والے حجاج کرام کو اکثر وبیشتر پہلےمدینہ طیبہ بھیج دیا جاتا ہے۔ایسے حجاج کرام کے لئے شیخ الاسلام حضرت مولانا سید حسین احمد مدنی رحمہ اللہ فرماتے ہیں:

”میرے نزدیک اور علماء کے ایک گروہ کے نزدیک پہلے مدینہ منورہ جانا افضل ہے :

ہمارے آقانامدار حضرت محمد صلی اللہ علیہ وسلم تمام امت بلکہ تمام عالم کے لئے رحمت ہیں۔آپ کے پاس حاضری د ے کر عرض کرو: یا رسول اللہ صلی اللہ علیہ وسلم ہم حاضر ہوئے ہیں۔ ہمارے لئے حج کی قبولیت کی دعا فرمائیے، شفاعت فرمائیے۔ پھرجناب باری سبحانہ کے گھر کی طرف لوٹا جائے تاکہ آپ کے وسیلہ سے اللہ پاک حج کی اس عاشقانہ عبادت کو قبول فرمائے۔“

مدنیہ منورہ جانا محض ایک سفر ہی نہیں بلکہ ایک اہم عبادت بھی ہے۔ لہذا اس مبارک سفر کے دوران سید الانبیاء و المرسلین صلی اللہ علیہ وسلم کے روضہ مبارک کی زیارت کی نیت کرنی چاہیے۔ علماءِ امت نے اسے جائز بلکہ مستحب لکھا ہے:

1: شارح مسلم امام نووی رحمہ اللہ لکھتے ہیں :

ترجمہ: جب حج اور عمرہ کرنے والے مکہ سے لوٹیں تو نبی اقدس صلی اللہ علیہ وسلم کی قبر کی زیارت کے لئے مدینۃالرسول صلی اللہ علیہ وسلم کا سفر کریں کیونکہ یہ تقرب کے ذرائع میں سے اہم ذریعہ اور کامیابی کی کوششوں میں سے اہم ترین کوشش ہے۔

2 حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ و سلم نے فرمایا:

ترجمہ:جس نے میری قبر کی زیارت کی اس کے لیے میری شفاعت واجب ہوگئی۔

اس حدیث کے تحت علامہ ابن حجر مکی رحمہ اللہ لکھتے ہیں:

ترجمہ: یہ حدیث نبی کریم صلی اللہ علیہ وسلم کی زندگی اور موت کے بعد دونوں حالتوں کی زیارت کو شامل ہے۔نیز یہ حدیث قریب و بعید کے ہر زائر کو شامل ہے خواہ وہ مرد ہو یاعورت۔یہ حدیث نبی اقدس صلی اللہ علیہ وسلم کی قبر کی طرف سفر کرنے کی فضیلت اور اس کے مستحب ہونے پردلالت کرتی ہے، اس لیے کہ وسائل کا حکم مقاصد والا ہوتاہے۔

3: فتاویٰ عالمگیری میں ہے:

ترجمہ: ہمارے مشائخ نے فرمایا: نبی اقدس صلی اللہ علیہ وسلم کی قبر کی زیارت افضل مستحب ہے۔مناسکِ فارسی اور شرح محتار میں ہے: جس میں ہمت ہو اس کے لیے وجوب کے قریب ہے۔ اگر حج فرض ہے تو پہلے حج کرے اوربعد میں زیارت اور اگر حج نفل ہے تو پھر اختیار ہے۔ہاں اگر زائر روضہ رسول کی زیارت کی نیت کرے تو اسے چاہیے کہ مسجد نبوی کی زیارت کی نیت بھی کر لے۔

4: فقہ حنفی کی بے مثال کتاب الدر المختار مع شرح رد المحتار میں لکھا ہے: زیارۃ قبر ہ مندوبۃ باجماع المسلمین کما فی اللباب

ترجمہ:تمام مسلمانوں کا اس بات پر اجماع ہے کہ نبی اکرم صلی اللہ علیہ وسلم کی قبر مبارک کی زیارت مستحب ہے۔

5: علامہ سمہودی رحمہ اللہ فرماتے ہیں:

ترجمہ:نبی اقدس صلی اللہ علیہ وسلم کا مدینہ سے شہداء احد کی قبور کی زیارت کے لیے جانا ثابت ہے۔[ جب قریب سے قبر کی زیارت کےلیے نکلنا جائز ہے تو دور سے بھی جائز ہوگا] اور نبی اقدس صلی اللہ علیہ وسلم کی قبر اس کے زیادہ مستحق ہے کہ اس کے لیے سفر کیا جائے اور اس پر سلف وخلف کے اتفاق کی وجہ سے اجماع بھی منعقد ہوچکاہے۔

6: قطب الارشاد حضرت مولانا رشید احمد گنگوہی رحمہ اللہ فرماتے ہیں:

”جب مدینہ کا عزم ہو تو بہتر یوں ہے کہ نیت زیارت قبر مطہر کی کرکے جاوے تاکہ مصداق اس حدیث کا ہوجاوے کہ جو کوئی محض میری زیارت کو آوے شفاعت اس کو مجھ پر حق ہوگئی۔“

7: شیخ العرب والعجم حضرت مولانا سید حسین احمد مدنی رحمہ اللہ فرماتے ہیں:”ہمارے اکابر زیارت مطہرہ کے لیے سفر کرنے کو نہ صرف جائز بلکہ افضل المستحبات اور قریب واجب قرار دیتے ہیں بلکہ محض زیارت کے لیے سفر کرنا جس میں اور کوئی دوسری قربت منوی اور ملحوظ نہ ہو افضل اور اعلیٰ قرار دیتے ہیں“

8: فخر المحدثین حضرت مولانا خلیل احمد سہارنپوری رحمہ اللہ لکھتے ہیں:

ترجمہ:ہمارے نزدیک اور ہمارے مشائخ کے نزدیک زیارت قبر سیدالمرسلین [میری روح آپ صلی اللہ علیہ وسلم پر فداہ ہو]اعلیٰ درجہ کی قربت اور نہایت ثواب اور سبب حصول درجات ہے بلکہ واجب کے قریب ہے۔