مغالطہ آفرینی

قیاس کو نہ ماننے والے اور اس کا شدو مد سے انکار کرنے والے؛ عام لوگوں کے ذہنوں میں ایک شبہ ڈالتے رہتے ہیں کہ فقہاء کرام بالخصوص امام اعظم ابو حنیفہ رحمہ اللہ احادیث شریفہ کے مقابلہ میں اپنے عقل اور قیاس کو ترجیح دیتے ہیں۔

اس پر اتنا ہی کہا جا سکتا ہے کہ سبحانک ھذا بہتان عظیم۔ درجہ اجتہاد و فقاہت پر فائز شخصیت کے بارے میں یہ کہنا کہ وہ حدیث پر عقل کو ترجیح دیتا ہے؛ ایسا نہیں ہوسکتا۔ چنانچہ دسویں صدی ہجری کے مشہور اصولی حضرت امام عبدالوہاب بن احمد بن علی بن احمد الشافعی المتوفی 973ھ نے اس پر بڑی تفصیل سے حضرات فقہاء کرام کے اقوال سے اس شبہہ کی تردید کی ہے۔

خصوصاً امام اعظم ابو حنیفہ رحمہ اللہ کا طرز استدلال بڑی وضاحت کے ساتھ نقل کیا ہے اور ساتھ ساتھ امام ابو حنیفہ رحمہ اللہ کی طرف اس نسبت کو کہ وہ قیاس کو حدیث پر ترجیح دیتے ہیں، تعصب قرار دیا ہے۔ چنانچہ انہوں نے امام صاحب کا اپنا قول اس بارے میں نقل کیا ہے:

”اللہ کی قسم اس نے جھوٹ بولا ہے اور ہم پر بہتان باندھا ہے کہ ہم نص پر قیاس کو ترجیح دیتے ہیں۔ کیا ضرورت باقی رہ جاتی ہے نص کے بعد قیاس کی ؟حضرت امام صاحب رحمہ اللہ فرماتے ہیں ہم صرف سخت ضرورت کے وقت قیاس کرتے ہیں اور ہم سب سے پہلے مسئلہ کی دلیل کتاب اللہ میں دیکھتے ہیں پھر سنت رسول اللہ صلی اللہ علیہ وسلم میں پھر صحابہ کرام رضوان اللہ علیہم اجمعین کے فیصلوں میں۔ اگر وہاں دلیل نہ ملے تو پھر ہم قیاس کرتے ہیں جب نص خاموش ہو کہ ان دونوں کے درمیان علت کیا ہے ؟ دوسری روایت میں ہے امام صاحب رحمہ اللہ فرماتے ہیں ہم سب سے پہلے کتاب اللہ دیکھتے ہیں پھر سنت رسول اللہ صلی اللہ علیہ وسلم پھر صحابہ کرام رضوان اللہ علیہم اجمعین کے فیصلے اگر متفق ہوں تو اس پر عمل کرتے ہیں اگر اختلاف ہو تو ہم قیاس کرتے ہیں کہ ان دو مسئلوں کے درمیان علت مشترکہ کیا ہے یہاں تک کہ معنی واضح ہوجاتا ہے۔ ایک اور روایت میں ہے بے شک ہم سب سے پہلے کتاب اللہ پر عمل کرتے ہیں پھر سنت رسول اللہ صلی اللہ علیہ وسلم پر پھر حضرت ابوبکر رضی اللہ عنہ پھر حضرت عمر رضی اللہ عنہ پھر حضرت عثمان رضی اللہ عنہ پھر حضرت علی رضی اللہ عنہ کے اقوال پر۔ ایک اور روایت میں ہے انہوں نے فرمایا جو کچھ نبی کریم صلی اللہ علیہ وسلم نے فرمایا وہ ہمارے سر آنکھوں پر؛ میرے ماں باپ ان پر قربان ہم ان کی مخالفت نہیں کرتے جو کچھ صحابہ کرام رضوان اللہ علیہم اجمعین نے فرمایا ہم اس کو اختیار کرتے ہیں اور جو ان کے علاوہ کہیں گے وہ بھی آدمی ہیں اور ہم بھی اس میدان کے آدمی ہیں۔ “

امام صاحب کی اس خوبصورت وضاحت کے بعد مزید کچھ کہنے کی ضرورت تو نہیں تاہم اتمام حجت کے لیے چند مسائل ایسے ذکر کردیتے ہیں جن میں قیاس کا تقاضا اور ہے اور حدیث کا تقاضا کچھ اور ہے۔

یعنی قیاس اور حدیث میں تعارض ہے احناف نے ان مسائل میں قیاس کو چھوڑ کر احادیث پر عمل کیا ہے، چند مسائل درج ذیل ہیں۔

بے ہوشی ہر حال میں وضو کو توڑ دیتی ہے قیاس کا تقاضا یہ تھا کہ نیند بھی ہر حال میں وضوکو توڑ دے مگر حدیث میں آتا ہے:

ایک روایت میں ہے :

ترجمہ: اگر کوئی آدمی بیٹھے ہوئے سوگیا یا کھڑے کھڑے سوگیا یا سجدہ کی حالت میں سوگیا اس پر وضو کرنا واجب نہیں ہے۔

ان احادیث مبارکہ کی وجہ سے احناف کا مسلک یہ ہے کہ اگر کوئی بندہ قیام کی حالت میں ، سجدہ کی حالت میں یا تشہد کی حالت میں سوجائے تو اس کا وضو نہیں ٹوٹتا۔

اگر کوئی بندہ نماز کی حالت میں قہقہہ لگائے تو وضو ٹوٹ جاتا ہے قیاس کا تقاضا تو یہ تھا کہ اس آدمی کا وضو نہیں ٹوٹنا چاہیے کیونکہ وضو توڑنے والی چیزوں میں سے کوئی چیز نہیں پائی گئی۔ جبکہ حدیث میں آتا ہے کہ وضو ٹوٹ جاتا ہے۔

ترجمہ : حضرت ابو موسیٰ اشعری رضی اللہ عنہ فرماتے ہیں رسول اللہ صلی اللہ علیہ وسلم لوگوں کو نماز پڑھا رہے تھے اسی دوران ایک آدمی جس کی بینائی کمزور تھی وہ آیا اور مسجد کے گڑھے میں گر گیا )جو صحن میں واقع تھا (۔ اس کو دیکھ کر بہت سارے لوگ نماز ہی میں ہنس پڑے۔ آپ صلی اللہ علیہ وسلم نے ہنسنے والوں کو وضو اور نماز لوٹانے کا حکم صادر فرمایا۔

اگر امام عذر کی وجہ سے بیٹھ کر نماز پڑھائے اور مقتدی کھڑے ہو کر پڑھیں تو کیا مقتدیوں کی نماز ہوجائے گی؟ قیاس کا تقاضا تو یہ ہے کہ مقتدیوں کی نماز چونکہ امام کی نماز سے قوی ہے اس لیے نہیں ہونی چاہیے لیکن حدیث کہتی ہے کہ ہوجائے گی چنانچہ حدیث مبارک میں ہے کہ آپ علیہ السلام نے مرض الوفات میں بیٹھ کر نماز پڑھائی اور

اور دوسری روایت میں ہے:

ان احادیث مبارکہ کی وجہ سے احناف کا مسلک یہ ہے کہ اگر کوئی امام عذر کی وجہ سے بیٹھ کر نماز پڑھائے مقتدی کھڑے ہوکر نماز پڑھیں اور ان کی نماز ہوجائے گی۔ان احادیث پر عمل کرتے ہوئے ہم نے عقل و قیاس کو چھوڑدیا ہے۔

اگر نماز کے دوران نمازی کی طہارت ختم ہوجاتی ہے یعنی وضو ٹوٹ جاتا ہے تو نمازی کو چاہیے اپنی جگہ سے چلا جائے دوبارہ وضو کرے اس کے بعد آکر اپنی نماز کی بناء کرے، (یعنی جہاں یہ نماز چھوڑی تھی وہیں سے شروع کرے) اب قیاس کا تقاضا یہ ہے کہ نماز کی بناء نہ ہو بلکہ نئے سرے سے دوبارہ نماز شروع کی جائے کیونکہ ایک تو وضو کا ٹوٹنا ہی نماز کے منافی ہے اور دوسری بات یہ ہے کہ نمازی کا اپنی جگہ سے جانا وضو کرنا اور پھر اپنی جگہ واپس آنا یہ بھی نماز کے منافی ہے۔

مگر حدیث میں آتا ہے کہ وہ اپنی نماز کی بناء کرے (جہاں سے یہ چھوڑ کر گیا وہیں سے شروع کرے)

ترجمہ: حضرت عائشہ صدیقہ رضی اللہ عنہا فرماتی ہیں نبی کریم صلی اللہ علیہ وسلم نے فرمایا جس آدمی کو نماز میں الٹی آجائے یا نکسیر پھوٹ پڑے یا منہ بھر کر قے آجائے یا مذی آجائے اس کو چاہیے کہ اپنی جگہ سے چلا جائے وضو کرے پھر اپنی نماز کی بناء کرے (جہاں سے یہ چھوڑی تھی وہیں سے شروع کرے) بشرطیکہ درمیان میں کسی سے کلام نہ کیا ہو۔

اس حدیث مبارک کی وجہ سے احناف کا مسلک یہ ہے کہ وہ آدمی دوبارہ نئے سرے سے نماز نہ پڑھے بلکہ اپنی نماز کی بناء کرے (جہاں پر چھوڑی تھی وہیں سے شروع کرے) ہم نے حدیث کی وجہ سے عقل و قیاس کو چھوڑ دیا ہے۔

اگر کوئی آدمی نماز کی حالت میں بھول کر بات کرلے تو اس کی نماز ٹوٹ جاتی ہے اگر کوئی روزہ کی حالت میں بھول کر کھا پی لے تو اس کا روزہ نہیں ٹوٹتا اب قیاس کا تقاضا یہ ہے کہ اس کا روزہ بھی ٹوٹ جانا چاہیے جس طرح بھول کر بولنے سے نماز ٹوٹ جاتی ہے، مگر حدیث مبارک میں ہے:

ترجمہ: حضرت ابو ہریرہ رضی اللہ عنہ فرماتے ہیں کہ نبی کریم صلی اللہ علیہ وسلم نے فرمایا جب آدمی روزہ کی حالت میں بھول کر کھا اور پی لے تو اس کو چاہیے اپنے روزے کو پورا کرے۔

اس حدیث مبارک کی وجہ سے احناف کا مسلک یہ ہے کہ اگر کوئی آدمی روزہ کی حالت میں بھول کر کھا اور پی لے تو اس کا روزہ نہیں ٹوٹتا ہم نے حدیث مبارک کی وجہ سے عقل و قیاس کو چھوڑ دیا ہے۔

اگر کوئی بندہ روزے کی حالت میں جان بوجھ کر قے کرے تو اس کا روزہ ٹوٹ جاتا ہے اب قیاس کا تقاضا یہ ہے کہ اس کا روزہ نہیں ٹوٹنا چاہیے اس لیے کہ اس نے اندر سے باہر چیز نکالی ہے اندر کوئی چیز داخل تو نہیں کی اور روزہ نام ہے صبح صادق سے لے کر غروب آفتاب تک کھانے پینے اور جماع سے رکنے کا (یعنی اس وقت میں کوئی چیز اندر داخل نہیں کرسکتا) اس لیے اس کا روزہ برقرار رہنا چاہیے، حدیث میں آتا ہے کہ اس کا روزہ ٹوٹ جاتا ہے:

ترجمہ: حضرت ابوہریرہ رضی اللہ عنہ فرماتے ہیں نبی کریم صلی اللہ علیہ وسلم نے فرمایا اس شخص کا روزہ نہیں ٹوٹتا جس پر روزہ کی حالت میں الٹی غالب آجائے اور اس پر قضاء بھی نہیں ہے اور اگر جان بوجھ کر الٹی کرتا ہے تو اس پر قضاء ہے یعنی اس کا روزہ ٹوٹ جائے گا۔

اس حدیث کی وجہ سے احناف کا مسلک یہ ہے کہ اگر جان بوجھ کر کوئی آدمی الٹی کرتا ہے تو اس کا روزہ ٹوٹ جاتا ہے اور اس پر اس کی قضاء لازم ہوگی ہم نے عقل و قیاس کو چھوڑ کر حدیث پر عمل کیا ہے۔

اعتکاف واجب کے لیے روزہ رکھنا شرط ہے اب قیاس کا تقاضا تو یہ ہے کہ روزہ شرط نہیں ہونا چاہیے کیونکہ روزہ ایک مستقل عبادت ہے اعتکاف ایک مستقل عبادت ہے اگر اس کو دوسری عبادت کے لیے شرط قرار دیں تو یہ مستقل عبادت نہیں رہے گی، مگر حدیث میں آتا ہے:

ترجمہ: حضرت عائشہ رضی اللہ عنہا کی روایات میں ہے بغیر روزے کے اعتکاف نہیں ہوتا اور حضرت عمر رضی اللہ عنہ کی روایت میں ہے میں نے جعرانہ والے دن آپ علیہ السلام کو بتایا کہ آج حضرت علی رضی اللہ عنہ اعتکاف کررہے ہیں آپ علیہ السلام نے فرمایا جاؤ اور اس سے کہو اعتکاف بھی کرے اور روزہ بھی رکھے۔

ان روایات کی وجہ سے احناف کا مسلک یہ ہے کہ واجب اعتکاف میں روزہ رکھنا ضروری ہے۔ اس حدیث کی وجہ سے ہم نے عقل و قیاس کو چھوڑ دیا ہے۔

نوٹ: واجب اعتکاف کا لفظ اس لیے استعمال کیا ہے کہ سنت اعتکاف تو ویسے رمضان المبارک میں ہی ہوتا ہے اس لیے وہاں تو روزہ رکھنا ویسے ہی انسان پر فرض ہے اور نفلی اعتکاف تو ہوتا ہی نفل ہے اور وہ تھوڑی دیر کا بھی ہوسکتا ہے اس لیے اس میں روزہ رکھنا کوئی ضروری نہیں ہے۔

عورت جب ماہواری کی دنوں میں ہوتی ہے تو اس کے لیے نماز پڑھنا اور روزہ رکھنا یہ جائز نہیں ہوتا۔ اب قیاس کا تقاضا تو یہ ہے کہ وہ پاکی کے ایام میں نماز اور روزہ دونوں کی قضاء کرے یا پھر نماز کی قضاء تو ضرور کرے کیونکہ نماز باقی تمام عبادات کے مقابلہ میں اہم عبادت ہے لیکن حدیث پاک میں آتا ہے کہ وہ پاکی کے ایام میں روزوں کی قضا کرے گی نماز کی قضاء نہیں کرے گی۔

ترجمہ : حضرت معاذہ فرماتی ہیں کہ میں نے حضرت عائشہ رضی اللہ عنہا سے پوچھا کیا وجہ ہے کہ حائضہ عورت روزہ کی قضا تو کرتی ہے لیکن نماز کی نہیں ؟ حضرت عائشہ رضی اللہ عنہا نے فرمایا کہ کیا تم اس میں مبتلا ہو؟ میں نے عرض کی نہیں میں مسئلے کی وضاحت چاہتی ہوں آپ رضی اللہ عنہا نے فرمایا جب ہماری یہ حالت ہوتی تھی تو بس ہمیں روزے کی قضا کا حکم دیا جاتا تھا نماز کی قضا کا نہیں۔

اس حدیث کی وجہ سے احناف کا مسلک یہ ہے کہ حیض والی عورت صرف روزوں کی قضا کرے نمازوں کی قضا نہ کرے۔ ہم نے اس حدیث مبارک پر عمل کرتے ہوئے عقل و قیاس کو چھوڑ دیا ہے۔

جب کوئی آدمی فوت ہو جاتا ہے تو اس کی وراثت اس کی اولاد میں ایسے تقسیم ہوتی ہے کہ لڑکے کو دو حصے اور لڑکی کو ایک حصہ ملتا ہے اب قیاس کا تقاضا یہ ہے کہ لڑکی کمزور ہے اس کو دو حصے ملنے چاہییں جبکہ لڑکا طاقت ور اور جوان ہے اس کو ایک حصہ ملنا چاہیے لیکن قرآن و حدیث میں ہے کہ لڑکے کو دو حصے اور لڑکی کو ایک حصہ دیا جائے۔ ہم نے قرآن و حدیث پر عمل کرتے ہوئے عقل و قیاس کو چھوڑ دیا ہے۔

شریعت میں اہل تفسیر اس کو کہتے ہیں جو تفسیر کا ماہر ہو اہل حدیث اسے کہتے ہیں جو حدیث کا ماہر ہو اور اہل تاریخ اسے کہتے ہیں جو تاریخ کا ماہر ہو اب قیاس کا تقاضا تو یہ ہے کہ اہل السنۃ بھی اس کو کہا جائے جو سنت کا ماہر ہو جس طرح دو حدیثوں پر عمل کرنے کی وجہ سے بندہ اہل حدیث نہیں بنتا دو آیتوں کی تفسیر جاننے کی وجہ سے مفسر اور اہل تفسیر نہیں بنتا اسی طرح صرف سنت پر چلنے کی وجہ سے اہل السنۃ بھی نہیں ہونا چاہیے بلکہ اس کے لیے سنت میں مہارت شرط ہو لیکن سنت پر عمل کرنے والے کو چونکہ حدیث میں اہل السنۃ کہا گیا ہے اس لیے احناف بھی اس کو اہل السنۃ کہتے ہیں:

ترجمہ : حضرت ابن عباس رضی اللہ عنہما آیت کریمہ یوم تبیض وجوہ کی تفسیر میں فرماتے ہیں کہ وہ اہل السنت والجماعت ہوں گے۔

اصحاب پیغمبر کی اس تفسیر کی وجہ سے ہم نے عقل و قیاس کو چھوڑ دیا ہے اور سنت پر عمل کرنے والے کو اہل السنۃ کہا ہے۔ اللہ تعالی معاندین اور مخالفین کو عقل سلیم عطا فرمائے۔