تذکرۃ المحدثین

امام اعمش کو اللہ تعالیٰ نے خوب علم سے نوازا تھا۔ علمِ حدیث میں تو امامت مسلمّ تھی ہی ساتھ ساتھ دیگر اسلامی علوم میں بھی اعلیٰ مقام پر فائز تھے۔ ذیل میں مختلف میادین علم میں آپ کی شان و شوکت کا تذکرہ پیشِ خدمت ہے:

قرآن کے ساتھ آپ کو عشق و محبت کا وافر حصہ عطا ہوا تھا، علوم قرآنی میں آپ ”رأس العلم“ تصور کیے جاتےتھے۔ خود فرماتے ہیں:

اگر قرآن نہ ہوتا تو میں ایک سبزی فروش ہوتا۔

آپ حضرت عبد اللہ بن مسعود رضی اللہ عنہ کی قراءت کے ماہر گردانے جاتے تھے اور کوفہ کے بڑے قاریوں میں سے ایک تھے۔ امام ابو اسحاق السبیعی (ت129 ھ) کا بیان ہے:

کہ کئی سال بیت چکے کہ کوفہ میں بنی اسد کے دو آدمیوں سے بڑا کوئی قاری نہیں آیا؛ ان میں سے ایک قاری عاصم اور دوسرے امام اعمش ہیں۔ ایک (امام اعمش)حضرت عبد اللہ بن مسعود رضی اللہ عنہ کی قراءت میں مہارت کی وجہ سے مشہور ہیں اور دوسرے (عاصم) زیدکی قراءت میں مہارت کی وجہ سے۔

حضرت ابن مسعود رضی اللہ عنہ تک آپ کی سندِ قراءت یوں ہے:

امام اعمش نے علم قراءت یحیی بن وثاب سے لیا، یحیی بن وثاب نے عبید بن نضیلہ الخزاعی سے، عبید بن نضیلہ نے علقمہ سے اور علقمہ نے حضرت عبد اللہ بن مسعود رضی اللہ عنہ سے قراءت کا علم لیا۔

علامہ ابن سعد (ت230ھ) قرآن میں آپ کی مہارت کا تذکرہ ان الفاظ میں فرماتے ہیں:

ترجمہ: امام اعمش قرآن، علم فرائض اور علم حدیث کے بہت بڑے عالم تھے۔ طلحہ بن مصرف نے آپ سے قرآن کی قراءت سیکھی ہے۔ آپ لوگوں کو قرآن کی قراءت کا مستقل درس دیتے تھے لیکن آخر عمر میں بڑھاپے کی وجہ سے چھوڑ دیا۔ پھر بھی آپ ہر شعبان میں ہر روز لوگوں کو قرآن میں سے کچھ نہ کچھ ضرور سناتے۔ لوگ ان کے پاس اپنے اپنے مصاحف لاتے، ان کے سامنے پیش کرتے اور ان کی تصحیح کراتے اور علم قراءت سیکھتے۔

علم الفرائض (علم میراث) میں بھی آپ کی مہارت مسلم تھی۔ اس پر دو شہادتیں پیش کی جاتی ہیں:

(1): امام سفیان بن عیینہ (ت198 ھ) نے فرمایا:

”اعمش نے اپنے ہمعصروں کو چار چیزوں میں پیچھے چھوڑ دیا ہے: پہلی کہ وہ ان میں قرآن کی قراءت کا سب سے زیادہ علم رکھتے تھے، دوسری کہ وہ ان میں حدیث کے سب سے بڑے حافظ تھے، اور تیسری کہ وہ فرائض کو ان میں سب سے زیادہ جانتے تھے۔“راوی (یعنی سہل بن حلیمہ) کہتے ہیں کہ چوتھی چیز جو انہوں نے کہی تھی میں بھول گیا ہوں۔

(2): علامہ ابن سعد (ت230ھ) بھی آپ کو فرائض کا ماہر گردانتے تھے۔

علم فقہ سے بھی آپ کو مناسبت تھی۔ امام ابن جریر الطبری روایت کرتے ہیں کہ عیسی بن موسی نے امام ابن ابی لیلی سے کہا:

اجمع الفقهاء• (فقہاء کو جمع کرو)

انہوں نے انہیں جمع کیا تو امام اعمش کھال کا بنا جبہ پہنے ہوئے تشریف لائے جس کے درمیان میں کمربند باندھ رکھا تھا اور آ کے فرمایا: اگر تم نے ہمیں یہاں کچھ دینے کے لئے بلایا ہے تو دو ورنہ ہمارا راستہ خالی کرو۔

عیسیٰ بن موسیٰ نے کہا:

اے ابن ابی لیلیٰ! میں نے تمہیں فقہاء کو لانے کے لئے کہا تھا اور تم ان کو لے کر آئے ہو؟ تو امام ابن ابی لیلی نے جواب دیا:

یہ ہمارے سردار ہیں، یہ اعمش ہیں۔

معلوم ہوتا ہے کہ فقہ سے بھی آپ کو خاصہ شغف رہا جبھی تو امام ابن ابی لیلیٰ جو فقیہ ہیں انہوں نے آپ کو سردار کہا، لیکن بایں ہمہ دقائق فقہ اور استنباط ِ مسائل میں جو کمال آپ امام ابو حنیفہ رحمہ اللہ کا مانتے تھے وہ صرف امام ابو حنیفہ ہی کا حصہ تھا۔ (مزید تفصیل ”امام اعمش اور امام ابو حنیفہ“ کے تحت آ رہی ہے)

امام اعمش کے دیگر فضائل میں سے ایک فضیلت یہ بھی ہے کہ آپ صحابی رسول سیدنا انس بن مالک رضی اللہ عنہ کی زیارت سے مشرف ہوئے ہیں۔ کئی محدثین نے اس کی تصریح کی ہے جن میں امام بخاری، امام ابن حبان، حافظ ابو حفص عمر بن شاہین، خطیب بغدادی، علامہ ذہبی وغیرہ شامل ہیں۔

”علمِ حدیث میں خدمات“ کے عنوان کے تحت واضح کر دیا گیا ہے کہ حضرت انس رضی اللہ عنہ سے آپ کی روایت کو جمہور محدثین نے مرسلاً قرار دیا ہے البتہ رؤیت پر اتفاق کیا ہے۔ اس لیے جمہور ائمہ محدثین کے مسلک کہ ”محض رؤیتِ صحابی سے تابعیت کا شرف حاصل ہو جاتا ہے، صحبت اور روایتِ حدیث شرط نہیں“ کے مطابق آپ تابعی قرار پاتے ہیں۔

امام اعمش امام ابو حنیفہ کے شیوخ میں سے تھے۔

استاذ و شاگرد حدیث و فقہ کا حسین امتزاج ہوا کرتے تھے۔ استاذ و شیخ ہونے کے باوجود امام اعمش امام ابو حنیفہ کے جس طرح قدر دان تھے اور آپ کے مقام علم کو تسلیم کرتے تھے ذیل کے واقعہ سے اس کا بخوبی اندازہ لگایا جا سکتا ہے:

حافظ حدیث ابوعمر ابن عبدالبر مالکی (ت463ھ) اپنی کتاب ”جامع بیان العلم“ میں فرماتے ہیں کہ امام عبيد الله بن عمرو کا بیان ہے کہ میں امام اعمش رحمۃ اللہ علیہ کی مجلس میں تھا:

تو ان کی مجلس میں ایک شخص آیا اور امام اعمش سے کوئی مسئلہ دریافت کیا، آپ نے کوئی جواب نہ دیا۔دیکھا کہ امام ابوحنیفہ تشریف رکھتے ہیں، فرمایا کہ: کہئے نعمان! کیا ہے جواب؟ امام ابو حنیفہؒ نے فوراً جواب دے دیا۔ امام اعمش نے مسئلہ کی دلیل دریافت کی تو ابو حنیفہؒ نے فرمایا : آپ ہی نے تو مجھے فلاں حدیث اپنی سند سے بیان کی تھی، اسی سے یہ مسئلہ اس طرح نکلتاہے الخ۔ امام اعمش یہ دیکھ کر فرمانے لگے:

.کہ ہم پنساری ہیں اورتم اطباء ہو۔

نیز امام ابن عدی نے بھی اس واقعہ کو اپنی سند سے روایت کیا ہے۔

(جاری ہے……)