عربی خطبۂِ جمعہ مقامی زبان میں…علمی وتحقیقی تجزیہ

12: امام نسفی رحمہ اللہ لکھتے ہیں:

آیت میں ذکر اللہ سے مراد خطبہ ہے جمہور حضرات کے ہاں اور اسی سے امام اعظم ابو حنیفہ رحمۃ اللہ علیہ نے دلیل لی ہے کہ اگر خطیب الحمد للہ پر اکتفاء کرے جائز ہے۔

13: تفسیر الفواتح الالھٰیۃ والمفاتیح الغیبیۃ ج2 ص414 میں لکھا ہے:

خطبہ میں ذکر اللہ کو سننے کے لیے فوراً دوڑے آؤ۔

14: تفسیرروح البیان ج9ص523 میں لکھا ہے:

اور اللہ تعالیٰ کا ارشاد فاسعوا الی ذکر اللہ جلدی چلے آؤ اللہ کے ذکر کی طرف امام راغب نے فرمایا ہے فوراً چلے آنے سے مراد درمیانے انداز سے چل کر آنا ہے یعنی چلو اور ارادہ کرو خطبہ اور نماز کی طرف ان دونوں میں سے ہر ایک کے ذکر اللہ پر مشتمل ہونے کی وجہ سے اور خطبہ میں جو اللہ کے رسول صلی اللہ علیہ وسلم کا ذکر اور آپ کی تعریف ہوتی اور آپ کے خلفاء راشدین اور مومن متقیوں کا ذکر خیر ہوتا ہے اور جو وعظ و نصیحت ہوتا ہے وہ ذکر اللہ کے حکم میں ہے۔

15: امام ابو عبداللہ محمد بن یوسف الاندلسی الغرناطی رحمہ اللہ لکھتے ہیں:

آیت میں یہاں ذکر اللہ سے مراد خطبہ ہے یہ بات حضرت سعید بن المسیب رحمہ اللہ نے ارشاد فرمائی ہےاور وہ جمہور حضرات کے ہاں جمعہ کے انعقاد کے لیے شرط ہے اور امام حسن رحمہ اللہ نے فرمایا ہے کہ یہ مستحب ہے اور ظاہر یہی ہے کہ وہ ایسے ذکر اللہ سے جس کو ذکر کہا جاسکے کافی ہے۔ حضرت امام ابو حنیفہ رحمہ اللہ نے فرمایا ہے کہ اگر خطیب نے الحمدللہ یا سبحان اللہ کہا اور اسی پر اکتفاء کیا تو جائز ہے۔

نوٹ : جائز ہونے کا مطلب یہ ہے کہ جمعہ کی شرط پوری ہوگئی اور نماز جمعہ ادا کرنا جائز ہوگیا ہے اگر چہ دوسرے مسنون اعمال کے چھوڑنے کی وجہ ان کی برکات اور ثواب سے محروم ہوگا۔

16: تفسیر ابو السعود میں لکھا ہے:

آیت میں اللہ کے ذکر کی طرف فورا چلے آنے سے مراد یہ ہے کہ چلو اور خطبہ اور نماز کا ارادہ کرو۔

17: علامہ آلوسی رحمہ اللہ لکھتے ہیں:

اللہ کے ذکر سے مراد خطبہ اور نماز ہے۔

18: علامہ ابن کثیر رحمہ اللہ لکھتے ہیں:

اس کا ترجمہ غیر مقلد محمد جونا گڑھی صاحب نے یوں کہا ہے:

خرید و فروخت کو چھوڑ کر ذکر اللہ اور نماز کی طرف تمہارا آنا ہی تمہارے حق میں دین دنیا کی بہتری کا باعث ہے اگر تم میں علم ہو۔

19: تفسیر القرانی میں لکھا ہے:

یعنی اس سے مراد وہ ذکر اللہ ہے جو کہ نماز اور خطبہ جمعہ میں ہوتا ہے۔

20: علامہ محمد الطاہر بن محمد التونسی المتوفیٰ 1393ھ رحمہ اللہ لکھتے ہیں :

موطا کی حدیث میں آیا ہے کہ جب امام خطبہ کے لیے نکلتا ہے تو فرشتے ذکر کو حاضر ہوکر غور سے سنتے ہیں اور کوئی شک نہیں کہ امام جب نکلتا ہے تو خطبہ سے ابتداء کرتا ہے لہذا خطبہ بھی ذکر ہوا اور اس حدیث اور اس آیت میں مذکور لفظ ذکر کی تفسیر ہے۔

21: علامہ الطنطاوی رحمہ اللہ لکھتے ہیں:

ذکر اللہ سے مراد خطبہ اور نماز دونوں ہیں اس لیے کہ یہ دونوں ذکر اللہ کو شامل ہوتے ہیں۔

22: علامہ محمد بن عمر نووی الجاوی الشافعی المتوفیٰ1316ھ رحمہ اللہ لکھتے ہیں:

یعنی جب تم کو جمعہ کے دن نماز کے وقت پکارا جائے تو خطبہ اور نماز کی طرف چلے جاؤ۔

23: تفسیر غریب القرآن میں لکھا ہے ۔

فاسعواالیٰ ذکر اللہ یعنی آؤ اللہ کے ذکر۔ نماز اور خطبہ کے سننے کی طرف۔

24: سعودی علماء کی کمیٹی نے ایک تفسیر؛ التفسیر المسیر کے نام سے تالیف کی ہے اس میں لکھا ہے:

اے وہ لوگو! جنہوں نے اللہ اور اس کے رسول کی تصدیق کی ہے اور ان کی شریعت پر عمل کیا ہے جب موذن جمعہ کی نماز اذان دے تو خطبہ کے سننے کے لیے اور نماز کو ادا کرنے کے لیے چلے آؤ۔

25: حضرت ابن عباس رضی اللہ عنہما سے مروی ہے:

اے وہ لوگو! جو ایمان لائے ہو محمد علیہ الصلوٰۃ والسلام پر اور قرآن پر جب تمہیں بلایا جائے نماز کی طرف اذان کے ذریعے جمعہ کے دن تو چلے آؤ اللہ کے ذکر یعنی امام کے خطبے اور اس کے ساتھ نماز کی طرف اور اذان کے بعد خرید و فروخت کو چھوڑ دو، یہ خطبہ کو توجہ سے سننا اور نماز بہتر ہے تمہارے لیے کمائی اور تجارت سے جس وقت کہ تم اللہ کے ثواب کو سچا سمجھو۔

مذکورہ تمام عبارات سے معلوم ہوا کہ مذکورہ آیت میں ذکر اللہ سے مراد جمہور مفسرین کے ہاں خطبہ جمعہ ہے اور بعض مفسرین نے اس سے مراد خطبہ جمعہ اور نماز جمعہ دونوں لیے ہیں، تو ثابت ہوا کہ خطبہ جمعہ کی حقیقیت اور اس سے مقصود ذکر اللہ ہے باقی چیزیں جو کہ خطبہ جمعہ میں پائی جاتی ہے وہ سب اس کے تابع ہیں اور خود غیر مقلد علماء سے بھی یہی منقول ہے کہ مذکورہ آیت میں ذکر اللہ سے مراد خطبہ اور نماز ہے، چنانچہ مشہور غیر مقلد عالم نواب صدیق حسن خان لکھتے ہیں:

یہاں ذکر اللہ سے مراد نماز جمعہ ہے اور یہ بھی کہا گیا ہے کہ اس سے مراد امام کا خطبہ ہے اور پہلی بات زیادہ بہتر ہے اور جمہور حضرات نے فرمایا ہے کہ اس سے مراد خطبہ ہے اور اسی سے حضرت امام ابو حنیفہ رحمہ اللہ نے استدلال کیا ہے کہ خطیب جب الحمدللہ پر اکتفاء کرے تو جائز ہے۔

غیر مقلد عالم مولوی ثناء اللہ امرتسری لکھتے ہیں:

پس سنو جمعہ کے روز دوپہر کے وقت جب نماز کے لیے اذان دی جائے یعنی بذریعہ اذان تم کو بلایا جائے تو تم بلا تکلف اور بلا تاخر اللہ کے ذکر خطبہ اور نماز کی طرف چلا کرو اور سودا سلف اور دیگر کاروبار چھوڑ دیا کرو۔ دنیاوی طمع نہ کیا کرو، یہ تمہارے لیے بہتر ہے اگر تم اللہ احکام کی حکمت جانتے ہو۔

غیر مقلد عالم کی تصریح سے بھی معلوم ہوا کہ ذکر اللہ سے مراد خطبہ اور نماز دونوں ہیں، جمہور حضرات نے چونکہ اس سے مراد خطبہ لیا ہے اس لیے خطبہ مراد لینا زیادہ راجح ہے، اور اس کی ایک وجہ یہ بھی ہے کہ ذکر کی تفسیر خطبہ سے خود نبی اقدس صلی اللہ علیہ وسلم سے بھی احادیث میں منقول ہے لہذا خطبہ کو مراد لینا اولیٰ ہے، باقی ساتھ نماز جمعہ کو مراد لینا بھی ہمارے خلاف نہیں، بلکہ یہ اس بات کی تائید ہے کہ جمعہ کا خطبہ غیر عربی میں جائز نہیں جس طرح کہ نماز کے دوران نماز کے الفاظ کا ترجمہ غیر عربی میں جائز نہیں، تفصیل انشاء اللہ آئندہ ذکر کی جائے گی۔

………) جاری ہے(