قسط-7 صلہ رحمی

اللہ تعالیٰ نے انسانی معاشرے کو پُر امن بنانے کے لیے جِن جِن کاموں کا حکم دیا ان میں سر فہرست ”صِلَّہ رِحمی“ ہے ۔اپنے قریبی رشتہ داروں کے ساتھ اچھے تعلقات قائم کرنا، آپس میں اتفاق و اتحاد سے رہناخوشی و غمی میں برابر میل جول رکھنا، دکھ سکھ میں شریک ہوناباہمی حقوق کا خیال رکھنا، ان پر صدقہ و خیرات کرنا، اگر مالی حوالے سے تنگدست ہوں تو ان کی مدد کرنا اور ہر لحاظ سے ان کا خیال رکھنا” صلہ رحمی“ کہلاتا ہے۔ قریبی رشتہ داروں کے حقوق ادا نہ کرنا ، دکھ سکھ میں شریک نہ ہونا ، آپس میں اختلاف و عداوت رکھنا، خوشی و غمی میں انہیں نظر انداز کرنا، ان سے بول چال ، رشتے ناطے ختم کرنا”قطع رحمی“ کہلاتا ہے۔ اسلامی معاشرت میں حسن سلوک ، اخلاق حسنہ اور باہمی تعلقات کو بہتر سے بہتر بنانے اور ان کو اپنانے پر بہت زور دیا گیا ہے تاکہ امن و سکون اورراحت وچین میسر آسکے۔

ترجمہ: حضرت انس بن مالک رضی اللہ عنہ سے روایت ہے کہ میں نے رسول اللہ صلی اللہ علیہ وسلم سے سنا آپ نے فرمایا : جو شخص اس بات کا خواہش مند ہو کہ اس کےرزق میں فراخی ہو (یعنی رزق میں اللہ برکت عطاء فرمائے)اورعمر لمبی ہو تو اسے چاہیے کہ وہ ’’صلہ رحمی‘‘ کرے۔

ترجمہ: حضرت ابو ایوب انصاری رضی اللہ عنہ سے روایت ہے کہ ایک شخص نے نبی کریم صلی اللہ علیہ وسلم سے پوچھا کہ آپ مجھے کوئی ایسا عمل بتائیے جو مجھے جنت میں لے جائے۔ اس پر لوگوں نے ازراہ تعجب کہا کہ آخر یہ کیا چاہتا ہے؟ لیکن نبی کریم صلی اللہ علیہ وسلم نے فرمایا کہ واقعی یہ تو بہت اہم بات ہے۔ (پھر آپ صلی اللہ علیہ وسلم نے جواب ارشاد فرمایا کہ ) اللہ کی عبادت کرو اور اس کا کوئی شریک نہ ٹھہراؤ، نماز قائم کرو، زکوٰة ادا کرو اور صلہ رحمی کرو۔

ترجمہ: حضرت ابو ہریرہ رضی اللہ عنہ سے روایت ہےرسول اللہ صلی اللہ علیہ وسلم نےفرمایا…جو اللہ اور یوم آخرت پر ایمان رکھتا ہے اسے چاہیے کہ وہ صلہ رحمی کرے۔

ترجمہ: قبیلہ خثعم کے ایک شخص نے ہادی دو عالم صلی اللہ علیہ وسلم سے صحابہ کرام رضوان اللہ علیہم اجمعین کی موجودگی میں سوال کیا: کیا آپ واقعتاً اللہ کے برحق رسول ہیں؟ نبی کریم صلی اللہ علیہ وسلم نے ارشاد فرمایا: جی ہاں! بالکل میں اللہ کا برحق رسول ہوں۔ اس کے بعد اس شخص نے اللہ کے ہاں سب سے زیادہ پسندیدہ عمل کے بارے میں پوچھا آپ نے فرمایا کہ اللہ پر کامل ایمان لانا۔ سائل نے عرض کیا کہ یارسول اللہ صلی اللہ علیہ وسلم کچھ مزید بھی ارشاد فرمائیں( کہ عقائد اسلامیہ کے بعد اللہ کے ہاں پسندیدہ بات کون سی ہے؟)آپ نے فرمایا: ’’صلہ رحمی‘‘کرنا۔

ترجمہ: حضرت جابر بن عبداللہ رضی اللہ عنہ فرماتے ہیں: ہم لوگ ایک جگہ اکٹھے ہو کر بیٹھے تھے ،ہمارے پاس رسول اللہ صلی اللہ علیہ وسلم تشریف لائے اور فرمایا: اے مسلمانو! اللہ سے ڈرو اور’’صلہ رحمی‘‘ کرو، کیونکہ اس عمل کا ثواب جلدی قبول ہوتا ہے…… جنت کی خوشبو ایک ہزار سال کی مسافت سے محسوس کی جاسکتی ہے لیکن والدین کا نافرمان اور قطع رحمی کرنے والا اسے سونگھ بھی نہیں پائے گا۔

نوٹ: حدیث مبارک میں یہ علامت(………) اس لیے لگائی ہے تاکہ معلوم ہو سکے کہ یہاں کچھ عبارت حذف کر دی گئی ہے ۔

ترجمہ: حضرت ابو ہریرہ رضی اللہ عنہ سے روایت ہے رسول اللہ صلی اللہ علیہ وسلم نے ارشاد فرمایا : تین خوبیاں جس شخص میں گی اللہ تعالیٰ اس کا حساب وکتاب بہت آسان کردے گا اور اسےاپنی رحمت کے صدقے جنت میں بھی داخل کرے گا، صحابہ کرام رضوان اللہ علیہم اجمعین نے عرض کیا کہ یا رسول اللہ صلی اللہ علیہ وسلم ہمارے ماں باپ آپ پر قربان ہوں وہ کون سی تین خوبیاں ہیں؟ آپ نے فرمایا: جو شخص تم کو محروم کرے تم اسے نوازدو، جو تمہارے اوپر ظلم کرے اسے معاف کردو، جو تم سے قطع تعلقی اختیار کرے تم اس سے’’صلہ رحمی‘‘ کرو۔ جب تم یہ کام کرو گے تو اللہ تمہیں جنت عطاء فرمائے گا۔

افسوس یہ ہے کہ آج ہمارا معاشرہ نبی صلی اللہ علیہ وسلم کی تعلیمات سے دور ہوتا جارہا ہے۔ ہم اپنے اعزہ و اقارب اور دوست احباب سے ہلکی پھلکی باتوں پر قطع تعلقی کرلیتے ہیں اور خوشیوں پر آنا جانا ختم حتیٰ کہ موت فوت پربھی اپنی انا اور ضد پر اڑے رہتے ہیں ۔ یاد رکھیں! قطع تعلقی کے بیج کو بو کر پیار و محبت کاشت نہیں ہو سکتی۔

اللہ کریم سے دعا ہے کہ ہمیں سنت کے مطابق گزارنے کی توفیق عطاء فرمائے۔ آمین بجاہ النبی الکریم صلی اللہ علیہ وسلم