حضرت پاک صلی اللہ علیہ وسلم کی تلوار مبارک

ترجمہ:حضرت انس رضی اللہ عنہ فرماتے ہیں حضرت پاک صلی اللہ علیہ وسلم کی تلوار مبارک کے قبضہ کی ٹوپی(یعنی مٹھی) چاندی کی تھی۔

ترجمہ: حضرت امام ابن سیرین رحمۃ اللہ علیہ فرماتے ہیں کہ میں نے اپنی تلوار حضرت سمرہ بن جندب (صحابی رسول صلی اللہ علیہ وسلم) کی تلوار کی طرز پر بنائی اور حضرت سمرہ بن جندب رضی اللہ عنہ فرماتے ہیں کہ میں نے اپنی تلوار حضرت پاک صلی اللہ علیہ وسلم کی تلوار مبارک کی طرز پر بنائی تھی اور حضرت پاک صلی اللہ علیہ وسلم کی تلوار قبیلہ بنو حنیفہ کی طرز پر تھی۔

1: اسلام کے ابتدائی دور میں سب سے اہم ہتھیار تلوار،نیزہ اور تیر تھے اور میدان جنگ میں سب سے کار آمد سواری گھوڑا تھی۔ حضرت پاک صلی اللہ علیہ وسلم کی کئی ایک تلواروں کا محدثین نے ذکر فرمایا ہے جو وقتاً فوقتاً جہاد میں کام آتی رہیں جیسے ماثور،قضیب،قلعی،حتف،رسوب،صمصامہ،لحیف اور ذوالفقار۔

2: حضرت پاک صلی اللہ علیہ وسلم کی ایک تلوار مبارک بنو حنیفہ قبیلہ کی تلواروں کی طر زپر تھی یا اس کو بنانے والا قبیلہ بنو حنیفہ کا آدمی تھا۔ بہرحال جو بھی ہوبنو حنیفہ عرب کا ایک قبیلہ ہے جو تلواروں کے عمدہ بنانے میں بہت مشہور ہے۔یہ حضرات بھی یکے بعد دیگرے حضرت پاک صلی اللہ علیہ وسلم کی اتباع میں ایسی تلواریں بناتے رہے۔