چھٹی نصیحت ہمیشہ حق بات کہیں

حدیث مبارک میں رسول اللہ صلی اللہ علیہ وسلم نےچھٹی نصیحت یہ ارشاد فرمائی:

سچی بات کہو اگرچہ کڑوی ہی کیوں نہ لگے۔

حدیث پاک کا درست مطلب یہ ہے کہ انسان کو ہمیشہ حق کا ساتھ دینا چاہیے سچی بات کہنی چاہیےکیونکہ سچ میں نجات ہے۔گفتگو کے آداب کی رعایت کرتے ہوئے )جس کی قدرے تفصیل بعد میں آ رہی ہے (حق بات کہنے میں ہچکچاہٹ کا شکار نہیں ہونا چاہیے اگرچہ کسی کو یا خود کو سننے میں کڑوی اور ناگوار ہی محسوس کیوں نہ ہو ۔

بعض لوگ اس حدیث پاک کو بے موقع استعمال کرتے ہیں جس سے حدیث کا مفہوم بدل جاتا ہے اور رسول صلی اللہ علیہ وسلم کی مراد باقی نہیں رہتی۔ وہ غلطی یہ کرتے ہیں کہ حق بات اسے سمجھتے ہیں جس میں درشت اور طنز آمیز لہجہ ، الفاظ کی کرختگی ، انداز میں بھدا پن مزید یہ کہ الفاظ کا غیر مناسب انتخاب کر کے بدتمیزی کے ساتھ گفتگو کی جائے۔ اور یہ سارا کچھ کرنے کے بعد اپنے عمل کو حدیث کے مطابق ثابت کرنے کے لیے کہہ دیتے ہیں کہ شریعت میں حکم ہے قُلِ الْحَقَّ وَإِنْ كَانَ مُرًّا۔

پھر اس کا معنیٰ اور مطلب بھی بالکل غلط بیان کرتے ہیں کہ حق بات ہوتی ہی ایسی ہے کہ کڑوی لگے۔ یہ حدیث کا غلط معنیٰ ہے کیونکہ حق بات کو ضرور کڑوا کر کے ہی کہنا نہ تو حدیث میں اللہ کے رسول صلی اللہ علیہ وسلم کی مراد ہے اور نہ اس کی اجازت دی جا سکتی ہے ۔

حدیث کا مطلب یہ ہے کہ حق تو میٹھا ہوتا ہے اس لیے کہتے رہنا چاہیے لیکن اگر کسی کو حق کڑوا لگے تو اس کو کڑوا لگنے کی وجہ سے حق نہیں چھوڑنا چاہیے ۔ جیسے انگور میں تو مٹھاس ہوتی ہے لیکن بخار والے کو یہ مٹھاس بھی کڑوی سی لگتی ہے ۔

حدیث مبارک میں غور کرنے سے معلوم ہوتا ہے کہ بات کے کڑوا ہونے کا تعلق سننے والے کے ساتھ ہے ۔ یعنی کبھی کہنے والا تو گفتگو کے آداب کی رعایت رکھ کر ہی بات کرتا ہے ہاں کبھی سننے والے کو اپنے مزاج کے خلاف ہونے کی وجہ سے کڑوی لگ جاتی ہے ۔

اس کا دوسرا معنی یہ بھی ممکن ہے کہ حق بات ہی کہنی چاہیے اگرچہ وہ اپنے نفس ،مزاج اور طبیعت کے خلاف ہونے کی وجہ سے کڑوی ہی کیوں نہ لگے۔ اس معنی کی تائید قرآن کریم کی اس آیت سے بھی ہوتی ہے ۔

ترجمہ: اے ایمان والو!تم انصاف قائم کرنے اور اللہ کے لیے گواہی دینے والے بنو۔اگرچہ )وہ ( خود اپنے یا والدین یا رشتہ داروں کے خلاف کیوں نہ ہو۔

ترجمہ: ایمان والو!اللہ سے ڈرو اور ہمیشہ درست بات کہو اللہ تعالیٰ تمہارے اعمال کی اصلاح اورتمہارے گناہوں کو معاف فرمادیں گے اور جو شخص بھی اللہ اور اس کے رسول کی صحیح طور پر بات مانتااور اس پر عمل کرتا ہے تو ایسا شخص بڑی کامیابی حاصل کرنے والا ہے۔

انسان کے اکثر اعمال کا تعلق چونکہ اس کی زبان کے ساتھ ہے۔ جب بندہ زبان کو قابو میں کرلیتا ہے تو اللہ تعالیٰ اس کے دوسرے اعمال کی اصلاح فرما دیتے ہیں اور یہ بات بالکل ظاہر ہے کہ جب باقی اعمال کی اصلاح ہوجائے تو بندہ اللہ کا محبوب بن جاتا ہے اور اللہ نے اپنے پیاروں کے لیے جنت تیار کر رکھی ہے جہاں کی سب سے بڑی نعمت ذات باری تعالیٰ کا دیدار ہے ۔کتنی خوش نصیبی کی بات ہے کہ انسان اپنی زبان کو قابو میں کر لے اور اس کی وجہ سے اس کے باقی اعضاء سے سرزد ہونے والے اعمال بھی درست ہوں گے نتیجتاً اللہ ایسے بندے کو جنت میں اپنا دیدار نصیب فرمائیں گے ۔ اللھم اجعلنا منہم

زبان کو مناسب موقع پر مناسب طور پر استعمال کرنا یعنی گناہوں کے بجائے نیکیوں میں استعمال کرنا بذاتِ خود گناہوں سے معافی کا ذریعہ ہے ۔ جو شخص اپنی زبان کو قابو میں کر لیتا ہے وہ گویا توبہ کی ایک عملی شکل اختیار کرلیتا ہے جس کی وجہ سے اللہ تعالیٰ اس کے گناہوں کو معاف فرما دیتے ہیں ۔ اعمال کی اصلاح کا مطلب بھی حصول جنت ہے اور گناہوں کی معافی کا مطلب بھی یہی ہے کہ جو چیز جنت میں جانے کےلیے رکاوٹ بنتی ہے یعنی گناہ ۔ تو اللہ ان گناہوں کو معاف فرما دیتے ہیں اور ایسے بندے کو جنت عطا فرما دیتے ہیں ۔

زبان کو اکثر اوقات بند رکھنا چاہیے اور جب گفتگو کے وقت کھولا جائے تو اسے بے لگام نہ چھوڑا جائے بلکہ اس کا درست استعمال کیا جائے ۔ مناسب معلوم ہوتا ہے کہ گفتگو کے بارے چند شرعی آداب درج کر دیے جائیں ۔

اللہ رب العزت نے قرآن کریم میں گفتگو کے بارے میں ہمیں حکم دیا ہے کہ جب آپسی گفتگو کی جائے تو ایک دوسرے کے ادب آداب کی رعایت رکھتے ہوئے اور مناسب موقع، مناسب لہجہ، مناسب الفاظ اور مناسب آواز کے ساتھ کی جائے۔

ترجمہ: لوگوں سے حسن سلوک سے گفتگو کرو۔

ترجمہ: ام المومنین سیدہ عائشہ صدیقہ رضی اللہ عنہا سے مروی ہے کہ اللہ کے رسول صلی اللہ علیہ وسلم تمہاری طرح جلدی جلدی بات چیت نہ فرماتے تھے بلکہ آپ بالکل صاف اور واضح بات کرتے تھےاور ہر بات دوسری سے جداہوتی تھی جسے آپ کے پاس بیٹھنے والا ہر شخص اچھی طرح ذہن نشین کرلیتاتھا۔

ترجمہ: حضرت انس بن مالک رضی اللہ عنہ سے مروی ہے کہ اللہ کے رسول صلی اللہ علیہ وسلم (بعض مرتبہ) اپنی بات کوتین تین مرتبہ دہراتے تھےتاکہ سننے والااچھی طرح بات سمجھ لے۔

ترجمہ: حضرت حسن بن علی رضی اللہ عنہما سے مروی ہے میں نے اپنے ماموں ہند بن ابی ہالہ سے عرض کی: مجھے اللہ کے رسول صلی اللہ علیہ وسلم کی گفتگو کے اوصاف بتائیں! انہوں نے فرمایا: آپ صلی اللہ علیہ وسلم بلاضرورت گفتگو نہیں فرماتے تھے۔

اس حوالے سے پہلے بھی ایک حدیث ذکر کی جا چکی ہے کہ انسان کے اسلام کی خوبی یہ ہے کہ وہ فضول اور بے فائدہ باتوں اور کاموں کو چھوڑ دے۔ اس لیے گفتگو میں بلاضرورت باتیں نہیں کرنی چاہییں۔ بسیار گوئی ایک ایسا کام ہے جوعقل مند لوگوں کے ہاں کم عقلی کی علامت ہے ۔

ترجمہ: حضرت حسن بن علی رضی اللہ عنہما سے مروی ہے کہ میں نے اپنے ماموں ہند بن ابی ہالہ سے عرض کی : مجھے اللہ کے رسول صلی اللہ علیہ وسلم کی گفتگو کے اوصاف بتائیں! انہوں نے فرمایا: آپ صلی اللہ علیہ وسلم کی تمام گفتگو اول سے لے کر آخر تک الفاظ کی درست ادائیگی کے ساتھ ہوا کرتی تھی۔(نوک زبان سےکٹے ہوئے لفظ ادانہیں فرماتے تھے)

ترجمہ: حضرت حسن بن علی رضی اللہ عنہما سے مروی ہے کہ میں نے اپنے ماموں ہند بن ابی ہالہ سے عرض کی : مجھے اللہ کے رسول صلی اللہ علیہ وسلم کی گفتگو کے اوصاف بتائیں!تو انہوں نے فرمایا: آپ صلی اللہ علیہ وسلم جامع کلمات کے ساتھ گفتگو فرماتے تھے۔ (جوامع الکلم کا معنی یہ ہے کہ بات ادھوری نہ فرماتے تھے بلکہ مکمل فرماتے تھے (

ترجمہ: حضرت حسن بن علی رضی اللہ عنہما سے مروی ہے کہ میں نے اپنے ماموں ہند بن ابی ہالہ سے عرض کی : مجھے اللہ کے رسول صلی اللہ علیہ وسلم کی گفتگو کے اوصاف بتائیں! تو انہوں نے فرمایا:آپ صلی اللہ علیہ وسلم کا کلام بالکل ایک دوسرے سے ممتاز ہوتاتھا، نہ اس میں فضول بات ہوتی تھی اور نہ ہی کوتاہی ۔

ترجمہ: حضرت حسن بن علی رضی اللہ عنہما سے مروی ہے کہ میں نے اپنے ماموں ہند بن ابی ہالہ سے عرض کی : مجھے اللہ کے رسول صلی اللہ علیہ وسلم کی گفتگو کے اوصاف بتائیں! تو انہوں نے فرمایا:آپ صلی اللہ علیہ وسلم نرم خو تھے۔ آپ نہ تو سخت مزاج تھےاور نہ ہی کسی کی تذلیل فرماتے تھے۔

ہم سب ہر روز کسی نہ کسی سے ضرور گفتگو کرتے ہیں اس حوالے سے ہم یہ فیصلہ کر لیں کہ آئندہ گفتگو کرتے وقت مذکورہ بالا آداب کی مکمل رعایت کریں گےاپنی گفتگو کو فضول گوئی، بے ہودہ گوئی ، یاوہ گوئی سے پاک کریں گے۔

مزید یہ کہ اپنی گفتگو کو ادب و احترام، سنجیدہ، معنی خیز، جامعیت، نرم خوئی اور سلیقہ شعاری کے ساتھ مزین کریں گے تو یقین جانیے کہ ہمیں قولِ سدید کی نعمت بھی مل جائے گی ، قولِ حسن کی توفیق بھی نصیب ہوگی اور قولِ حق کا موقع بھی ملے گا اور قولِ فیصل کی قوت بھی عطا ہوگی۔ اللہ رب العزت ہماری نسلوں کو بھی دین کی سمجھ، دین پر عمل،دین کی اشاعت اور دین کے تحفظ کےلیے قبول فرمائے۔

آمین بجاہ النبی الکریم صلی اللہ علیہ وسلم