عباد الرحمٰن …حصہ اول

اللہ تعالیٰ کی ایک صفت ”رحمٰن“ہے، جس کا معنیٰ ہے بہت زیادہ مہربانی کرنے والا۔ اور عبد کا معنی ہوتا ہے: جو اپنے رب کے ہر فیصلے اور کام پر راضی ہویعنی اس کی مخلوق میں وہ بندے جو اس کی بندگی کرنے والے ہیں انہیں ”عبادالرحمٰن“ کہا جاتا ہے۔

بندگی، اطاعت، فرمانبرداری اور تسلیم و رضاء کا معیار یہ ہے کہ ان کے دل ہر طرح کےعیوب و نقائص اور گناہوں کی آلائشوں سے پاک ہوں، تواضع اور عاجزی اختیار کرنے والے ہوں، زبان کے سچے ہوں ، معاملات میں نرم طبیعت کے مالک ہوں، اپنی ذات پر دوسروں کو ترجیح دیتے ہوں، نیکی اور خیر کے کاموں کی طرف رغبت رکھنے والے ہوں ساتھ میں بری عادات اور برے اخلاق سے دور رہنے والے ہوں۔

قرآن کریم کی سورۃ الفرقان میں عباد الرحمٰن کے جن اوصاف و اخلاق کا تذکرہ ہے ہم ترتیب کے ساتھ انہیں ذکر کریں گے ۔ انشاء اللہ الرحمٰن

عباد الرحمٰن کا پہلا وصف یہ ہے کہ وہ زمین پر نرمی یعنی تواضع کے ساتھ چلتے ہیں کیونکہ انسان کی چال چلن اس کے کردار و اخلاق اور قلبی کیفیات کی آئینہ دار ہوتی ہے، اگر تکبر اور فخر و غرور جیسی امراض میں مبتلا ہے تو چال متکبرانہ ہوگی، یا پھر مایوسی، احساس کمتری کی وجہ سے قدم گھسیٹ گھسیٹ کر چل رہا ہوگا یا پھر ریاء کاری اور دکھلاوے کی وجہ سےکہ لوگوں کی نگاہ میں صاحب کمال نظر آؤں بتکلف آہستہ آہستہ بناوٹی خشوع کے ساتھ چلتا ہوا نظر آئے گا، یہ سب باتیں غلط ہیں۔

اس بارے میں سب سے بنیادی بات یہ ہے کہ سنت کے مطابق چلا جائے متعدد احادیث مبارکہ میں آپ صلی اللہ علیہ وسلم کے چلنے کا تذکرہ موجود ہے جن کا خلاصہ یہ ہے آپ صلی اللہ علیہ وسلم کی رفتار مبارک عام آدمی کی رفتار سے قدرے تیز تھی مگر چال مبارک ایسی تھی کہ ہموار جگہ پر چلتے ہوئے بھی ڈھلوان میں اترتے ہوئے نظر آتے تھے۔ چستی کے ساتھ مضبوط قدموں سے ایسے چلتے تھے کہ آپ کی چال سےتواضع، عاجزی، سنجیدگی، متانت ، سکون، اطمینان، عزم، ہمت اور شجاعت ٹپکتی تھی۔ تکبر، بڑائی، فخر اور غرورکے ساتھ اکڑکر نہ چلتے۔ کندھوں کو ہلاہلا کر سینہ پُھلا کر، تکلف اور تصنع )بناوٹی خشوع اور عاجزی (سے نہ چلتے۔نہ ہی پیروں کو گھسیٹ کر، بیمار، لاغر اور سست آدمی کی طرح چلتے اور نہ ہی راہ چلتے وقت ادھر ادھر توجہ کرتے بلکہ شرافت و شائستگی کے ساتھ نظریں جھکا کر سیدھے اپنی منزل کی طرف چلتے رہتے۔

چلنے کے متعلق چند اسلامی تعلیمات ملاحظہ فرمائیں:

اللہ تعالیٰ کا ارشاد ہے۔

ترجمہ: اور زمین پر اکڑ کر مت چل۔

ترجمہ: حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: تم میں سے کوئی شخص ایک جوتا پہن کر نہ چلے یا تو دونوں اتار کر چلے یا پھر دونوں پہن کر۔

فائدہ: اگر ایک جوتا قریب پڑا ہے جبکہ دوسرا کچھ فاصلے) دو تین قدم ( پر ایسی صورت میں ایک جوتا پہن کر دوسرے جوتے تک جایا جا سکتا ہے،اس میں حرج نہیں۔

ترجمہ: حضرت فضالہ بن عبید رضی اللہ عنہ فرماتے ہیں کہ رسول اللہ صلی اللہ علیہ وسلم ہمیں اس بات کا حکم فرماتے تھے کہ کبھی کبھی ننگے پاؤں بھی چلا کرو۔

فائدہ: ننگے پاؤں وہاں چلیں جہاں جگہ کا پاک ہونا یقینی ہو، اگر گھر میں ایسی جگہ ہے جہاں چھوٹے بچےپیشاب کرتے رہتے ہیں تو ایسی جگہ پر ننگے پاؤں بالکل نہیں چلنا چاہیے۔ نیز یہ بھی ذہن میں رہے کہ یہ امر استحبابی ہے کبھی کبھی ایسا کر لینا چاہیے۔

نبی کریم صلی اللہ علیہ وسلم کا عام معمول تو یہ تھا کہ آپ صلی اللہ علیہ وسلم مناسب رفتار سے چلتے کبھی کوئی اہم کام ہوتا تو تیزی سے بھی چل لیتے تھے۔ چنانچہ امام بخاری رحمہ اللہ نے الادب المفرد میں اس پرباب قائم کیا ہے۔

ترجمہ: حضرت عبداللہ بن عباس رضی اللہ عنہما سے مروی ہے کہ ہم لوگ بیٹھے ہوئے تھے کہ اللہ کے نبی صلی اللہ علیہ وسلم تیزی کے ساتھ ہماری جانب آئے، ہم لوگ آپ کے تیزی کے ساتھ آنے کی وجہ سے ڈر گئے۔ ہمارے پاس پہنچنے کے بعد آپ نے ہمیں سلام کیا اور فرمایا میں تمہارے پاس اس لیے تیزی کے ساتھ آیا کہ تم کو شب قدر کی اطلاع کروں، لیکن تمہاری باہمی باتوں کی وجہ سے میں اسے )شب قدر کی تعیین ( بھول گیا اب تم اسے )رمضان المبارک کے( آخری عشرہ میں تلاش کرو۔

چلتے وقت نگاہوں کی خوب حفاظت کریں، غیر محرم کو دیکھنے، گھورنے اور تاڑنے سے بچیں، یہ حکم عام ہے آپ پیدل ہوں یا سوار۔ دونوں حالتوں میں نظروں کو جھکا کر رکھیں۔ ڈرائیونگ کے وقت بلاضرورت دائیں بائیں نہ دیکھیں تاہم اگر سامنے سے غیرمحرم نظر آجائیں تو آنکھیں بند نہ کریں بلکہ کھلی رکھیں البتہ دل میں توبہ و استغفار کرتے رہیں۔

ترجمہ: حضرت ابو سعید خدری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: راستوں میں بیٹھو….صحابہ کرام نے عرض کی یا رسول اللہ راستے کا حق کیا ہے؟ آپ صلی اللہ علیہ وسلم نے فرمایا: نگاہوں کو جھکانا۔

فائدہ: وہ نوجوان جو بازاروں میں اس لیے گھومتے ہیں تاکہ کسی کی ماں بہن کو کندھے ماریں، ان سے بدتمیزی کریں یا اسکول ٹائم راستوں میں بیٹھ کر قوم کی بچیوں کو دیکھتے رہتے ہیں ان کے لیے لمحہ فکریہ ہے رسول اللہ صلی اللہ علیہ وسلم نے ہمیں نظریں جھکانے کا حکم دیا ہے۔

نبی کریم صلی اللہ علیہ وسلم کی عادت شریفہ یہ تھی کہ آپ چلتے تو پیچھے مڑ کر نہیں دیکھتے تھے، اس لیے راستے چلنے کے اسلامی آداب میں سے ایک یہ بھی ہے۔

ترجمہ: حضرت جابر بن عبداللہ انصاری رضی اللہ عنہ فرماتے ہیں کہ رسول اللہ صلی اللہ علیہ وسلم جب راہ چلتے تو پیچھے مڑ کر نہیں دیکھتے تھے۔

ترجمہ: حضرت بریدہ اسلمی رضی اللہ عنہ سے روایت ہے: ایک دن میں چل رہا تھا کہ میں نے رسول اللہ صلی اللہ علیہ وسلم کو دیکھا ……آپ صلی اللہ علیہ وسلم نے میری ہاتھ پکڑااور ہم ایک ساتھ چلنے لگے۔

فائدہ: ہم عمر دوستوں کا ہاتھ پکڑ کر چلنے سے محبت پیدا ہوتی ہے اور تعلق میں مضبوطی کا احساس پیدا ہوتا ہے۔

ترجمہ: حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ایمان کے ستر اور کچھ یا پھر یوں فرمایا کہ ساٹھ اور کچھ شعبے ہیں ان میں سے سب سے زیادہ افضل لا الہ الا اللہ کہنا ہے اور سب سے چھوٹا راستے سے تکلیف دہ چیز کو ہٹانا ہے۔

فائدہ: حدیث میں”بضع“ عدد مبہم ہے جو تین سے لے کر نو تک بولا جاتا ہے۔

ترجمہ: حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: سوار شخص پیدل چلنے والے کو اور پیدل چلنے والا شخص بیٹھنے والے کو سلام کریں۔

آپ کہیں جا رہے ہوں اور کوئی شخص آپ سے راستہ پوچھے اگر آپ کو معلوم ہو تو اس کی رہنمائی کر نا راستے چلنے کے اسلامی آداب میں سے ہے۔

ترجمہ: حضرت ابوذر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا…….راستہ بھولے ہوئے شخص کی رہنمائی کرنا بھی نیکی ہے۔

خواتین کو چاہیے کہ مردوں سے ہٹ کر چلیں اور مردوں کو بھی چاہیے کہ خواتین کے چلنے کی جگہ پر نہ چلیں۔

سڑک عبور کرتے وقت گاڑیوں والی سمت دیکھ خوب خیال اور احتیاط سے چلیں۔

پیدل چلنا ہے تو سڑک کے کناروں پر چلیں۔

گاڑی پر سوار ہوں تو ٹریفک قوانین کی پابندی کریں۔

راستہ چلتے وقت ایسی چیزیں راستے میں نہ پھینکیں جس سے کسی کو تکلیف ہوتی ہو یا گندگی پھیلتی ہو۔

اللہ تعالیٰ ہمیں عبادالرحمٰن کے اوصاف اپنانے کی توفیق عطا فرمائے۔

والسلام

محمد الیاس گھمن

خانقاہ حنفیہ، مرکز اھل السنۃ والجماعۃ سرگودھا

جمعرات، 19 اپریل، 2018ء