عقیدہ 48

ترجمہ: بندے پر اس بات کا اعتقاد رکھنا لازم ہے کہ اللہ تعالیٰ کی جو بھی مخلوق معرضِ وجود میں آ رہی ہے وہ پہلے سے اللہ تعالیٰ کے علم میں ہے، اس لیے اللہ تعالیٰ نے اس (علم) کو مستحکم اور قطعی فیصلہ (تقدیر مبرم) کے طور پر یوں متعین فرما دیا کہ آسمان و زمین کی مخلوقات میں سے کوئی اسے توڑ سکتا ہے نہ ملتوی کر سکتا ہے، ختم کر سکتا ہے نہ تبدیل کر سکتا ہے، اضافہ کر سکتا ہے نہ پلٹ سکتا ہے اور نہ ہی کم کر سکتا ہے۔ یہ (عقیدہ قضاء و قدر) ایمان کی پختگی، معرفت کی بنیاد اور توحید و ربوبیت باری تعالیٰ کے اقرار کے لیے ضروری ہے جیسا کہ اللہ تعالیٰ نے اپنی کتاب میں ارشاد فرمایا کہ اللہ تعالیٰ نے تمام چیزوں کو پیدا فرمایا اور ہر ایک کی تقدیر بھی لکھ دی ہے۔ مزید ارشاد باری ہےکہ اللہ تعالیٰ کا حکم ایک قطعی طے شدہ فیصلہ ہوتا ہے۔ لہذا وہ شخص تباہ وبرباد ہو گا جو تقدیر کے معاملات میں اللہ تعالیٰ سے جھگڑے اور اس میں غور وفکر کے لیے اپنے بیمار دل(ناقص فہم) سے کام لے۔ کیونکہ اس شخص نے اپنے وہم کے ذریعے غیب کی جستجو میں مخفی راز کو حاصل کرنے کی (ناکام) کوشش کی ہے۔ نتیجۃً یہ شخص عقیدۂ تقدیر کے باب میں اپنی باتوں کی بناء پر جھوٹا اور گنہگار ثابت ہو گا۔

جب یہ بات معلوم ہو گئی کہ آئندہ کے احوال و حوادث اللہ تعالیٰ نے لوحِ محفوظ میں لکھ دیے ہیں اور انہی کے مطابق ہو گا۔ تو اب انسان کو اس بات پر یقین رکھنا چاہیے کہ دنیا میں جو چیز معرض وجود میں آ رہی ہے وہ پہلے سے اللہ تعالیٰ کے علم میں ہے۔ نیز جو چیز اللہ تعالیٰ نے اپنے ازلی علم کے مطابق بطور تقدیر لکھ دی ہے وہ اللہ تعالیٰ کا اٹل اور قطعی فیصلہ ہے جس میں کسی قسم کی کمی زیادتی نہیں ہو سکتی۔ اس لیے کوئی بندہ ان فیصلوں کو ختم یا تبدیل نہیں کر سکتا۔