قتل اور اس کی سنگینی

اللہ تعالیٰ نے انسانی بالخصوص اسلامی معاشرے میں قتل وقتال کو حرام، مُوجبِ جہنم، مُوجبِ غضبِ ، مُوجبِ لعنت اور مُوجبِ عذابِ عظیم قرار دیا ہے۔ مزید یہ کہ اس سے متعلقہ احکام قصاص و دِیت وغیرہ کا قرآن کریم میں ذکر فرمایا ہے تاکہ لوگ قتل جیسے بڑے اور بُرے جرم سے باز رہیں اور فتنہ و فساد نہ پھیلنے پائے۔

ترجمہ: اور جو شخص کسی مومن کو جان بوجھ کر قتل کر ڈالے تو اس کی سزا جہنم ہے جس میں وہ ہمیشہ رہے گا اور اس پر الله تعالیٰ غضب ناک ہوں گے اس کو اپنی رحمت سے دور کردیں گے اور اسے سخت ترین سزا دیں گے۔

آیت مبارکہ میں جان بوجھ کر قتل کرنے والے کی سزا کے طور پرچار باتیں ذکر فرمائی گئی ہیں:

1: دائمی جہنم ) تفصیل فائدہ کے عنوان سے ذیل میں ذکر کی جا رہی ہے (

2: اللہ کا غضب

3: اللہ کی لعنت) رحمت سے دوری)

4: سخت ترین عذاب (یعنی عام جہنمیوں کی نسبت زیادہ سخت عذاب ہوگا(

فائدہ: آیت مبارکہ میں ہےجان بوجھ کر قتل کرنے کی سزا جہنم ہے جس میں وہ ہمیشہ رہے گا۔ اس کے تحت قاضی ثناء اللہ پانی پتی رحمہ اللہ فرماتے ہیں:چونکہ ایمان سے وہ نفرت کرتا ہے یا قتل کو جائز سمجھتا ہے اس لیے کافر ہو گیا اور کفر کی سزا ہمیشہ کی جہنم ہے یا پھر اس سے لمبی مدت مراد ہے۔

ناحق قتل انہی گھناؤنے کاموں میں سےایک ہے جس کی وجہ سے معاشرہ تباہ ہوتا ہےاس لیے ناحق قتل کو گناہ کبیرہ قرار دےکر اسے پوری انسانیت کے قتل کے مترادف ٹھہرایا گیا ہے۔ قرآن کریم نے واضح لفظوں میں یہ اعلان کیا ہے:

ترجمہ: جس نے کسی ایک بے گناہ کو قتل کیا یا زمین میں فساد برپا کیا گویا اس نے پوری انسانیت کا قتل کیا۔

اللہ تعالیٰ کے نیک بندوں کے اوصاف میں ایک وصف ”ناحق قتل سے اجتناب“ہے۔ وہ ہر ایسے کام سے دور رہتے ہیں جس کی وجہ سے معاشرے میں فساد اور بگاڑ پیدا ہوتا ہو۔

ترجمہ: اور وہ ایسی جان کو ناحق قتل نہیں کرتے جسے اللہ نے حرمت بخشی ہے ۔

شریعت نے معاشرے سے جرائم کے خاتمے کےلیے قتل کی درج ذیل چند صورتیں جائز قرار دی ہیں۔ جن کا اختیار اربابِ اقتدار کو سونپا ہے۔

نمبر1: رجم… یعنی جب کوئی شادی شدہ مرد اورشادی شدہ عورت زنا کریں اور ان کا یہ جرم چار مردوں کی )فقہ اسلامی میں مقرر کردہ شرائط کے مطابق( گواہوں سے یا زنا کرنے والے مردو عورت کے اعتراف وغیرہ سے ثابت بھی ہو جائے تو قاضی / جج ان کے بارے میں شرعی سزا رجم کی صورت میں نافذ کرے گا اور وہ یہ ہے کہ انہیں پتھر مار مار کر ہلاک کر دیا جائے۔

نمبر2: قصاص … یعنی جب کوئی شخص جان بوجھ کر کسی کو )ناحق (قتل کر دے تو ایسی صورت میں اس قاتل کو اس قتل کے بدلے میں قتل کر دیا جائے گا۔ یہ شرعی سزا ہے جو قاضی/ جج نافذ کرے گا۔ ہاں مگر یہ کہ مقتول کے ورثا اس قاتل کو معاف کر دیں ۔

نمبر3: ارتداد… جب کوئی شخص اسلام کو چھوڑ دےتو ایسا شخص شریعت کی نگاہ میں واجب القتل قرار پاتا ہے۔ قاضی / جج اسے شرعی قانون کے مطابق قتل کرا دے گا ۔

ترجمہ: حضرت عبداللہ بن عمر رضی اللہ عنہما سے مروی ہے کہ میں نے رسول اللہ صلی اللہ علیہ وسلم کو اس حالت میں دیکھا کہ آپ صلی اللہ علیہ وسلم کعبۃ اللہ کا طواف فرما رہے تھےاسی دوران آپ نے کعبہ کو مخاطب کر کے فرمایا: اے کعبہ!تو کتنا اچھا ہے! تجھ سے مہکنے والی خوشبو کتنی ہی اچھی اور عمدہ ہے! تیری عظمت و مرتبت کس قدر بلند ہے! تیری عزت و حرمت کس قدر زیادہ ہے! )لیکن تیری ان تمام تر عظمتوں کے باوجود(اس ذاتِ برحق کی قسم! جس کے قبضہ قدرت میں محمد کی جان ہےاللہ تعالیٰ کے ہاں مومن کی جان و مال کی حرمت تیری حرمت سے کہیں زیادہ ہے۔ ہمیں مومن کے بارے میں ہمیشہ نیک گمان ہی رکھنا چاہیے۔

ترجمہ: حضرت ہَمَّام رحمہ اللہ کہتے ہیں کہ میں نےحضرت ابو ہریرہ رضی اللہ عنہ سے نبی کریم صلی اللہ علیہ وسلم کا یہ فرمان سنا: تم میں سے کوئی شخص اپنے )مسلمان( بھائی کی طرف اسلحہ سے اشارہ نہ کرےاس لیے کہ تم میں سے کوئی شخص یہ نہیں جانتا کہ شیطان اس کے ہاتھ کو ڈگمگا دے،وہ ناحق قتل کرنے کی وجہ سے جہنم میں جا پڑے۔

ترجمہ: معروف تابعی حضرت امام ابن سیرین رحمہ اللہ فرماتے ہیں کہ میں نے حضرت ابوہریرہ رضی اللہ عنہ سے نبی کریم صلی اللہ علیہ وسلم کا یہ فرمان سنا: جو شخص اپنے کسی مسلمان بھائی کی طرف ہتھیار سے اشارہ کرتا ہے اس پر فرشتے اس وقت تک لعنت کرتے رہتے ہیں جب تک وہ اس اشارہ کرنے کو چھوڑ نہیں دیتا اگرچہ وہ اس کا حقیقی بھائی ہی کیوں نہ ہو۔

ترجمہ: حضرت عبادہ رضی اللہ عنہ سے روایت ہے کہ انہوں نے رسول اللہ صلی اللہ علیہ وسلم کو یہ فرماتے ہوئے سنا : جس شخص نے کسی مومن کو (ناحق) قتل کیا پھر اس قتل پر خوش بھی ہوا تو اﷲ تعالیٰ اس کی نفل اور فرض عبادت قبول نہیں فرمائیں گے۔

ترجمہ: حضرت عبد اللہ بن عمرو رضی اﷲ عنہما سے روایت ہے کہ نبی کریم صلی اللہ علیہ وسلم نے فرمایا: کسی مسلمان کے )ناحق(قتل ہونے سے پوری دنیا کا تباہ ہوجانا اللہ تعالیٰ کے ہاں معمولی حیثیت رکھتا ہے ۔

ترجمہ: حضرت براء بن عازب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:اللہ تعالیٰ کے ہاں کسی شخص کے ناحق قتل ہونے سے پوری کائنات کا ختم ہو جانا معمولی حیثیت رکھتا ہے ۔

ترجمہ: حضرت عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: قیامت کے دن لوگوں کےمابین سب سے پہلے خون خرابے )قتل و قتال( کا فیصلہ سنایا جائے گا۔

ترجمہ: حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: جو شخص کسی مسلمان کے ناحق قتل میں سہولت کار بنا اگرچہ وہ معاونت بالکل معمولی درجے کی)ایک بات کی حد تک( بھی ہو تو وہ شخص )قیامت والے دن ( اللہ تعالیٰ سے اس حال میں ملے گا کہ اس کی آنکھوں کے درمیان )پیشانی پر ) لکھا ہوا ہوگا کہ یہ شخص اللہ کی رحمت سے مایوس رہے گا۔

ترجمہ: حضرت ام الدرداء رضی اللہ عنہا کہتی ہیں کہ میرے خاوند ابوالدرداء رضی اللہ عنہ فرماتے تھے کہ میں نے رسول اللہ صلی اللہ علیہ وسلم کا یہ فرمان سنا: اللہ تعالیٰ اگر چاہیں تو ) گناہ گاروں کے (تمام گناہوں کو معاف فرما دیں سوائے اس گناہ گار کے جس نے شرک کیا یا کسی مومن کو جان بوجھ )اور بغیر شرعی اجازت کےحلال اور جائز سمجھ کر( کر قتل کیا۔ یعنی مشرک اور ایسے قاتل کو اللہ کبھی بھی معاف نہیں فرمائیں گے۔

ترجمہ: حضرت ابو الحکم البَجلی رحمہ اللہ کہتے ہیں کہ میں نے حضرت ابو سعید خدری اور حضرت ابوہریرہ رضی اﷲ عنہما سے سنا دونوں رسول اللہ صلی اللہ علیہ وسلم کا ارشاد نقل کرتے ہیں کہ اگر )بالفرض (تمام آسمان اور زمین والے کسی ایک مومن کے قتل میں شریک ہو جائیں تو یقینی بات ہے کہ اللہ تعالیٰ ان سب کو جہنم میں ڈالیں گے ۔

ناحق قتل کرنا شریعت میں حرام ہے اگر کوئی شخص شرعا ً ناحق قتل کو حلال سمجھتا ہے تو فقہاء کرام رحمہم اللہ کی تصریحات کے مطابق کافر ہو جاتا ہے ۔

ناحق قتل کی چار سزائیں : دائمی جہنم ، اللہ کا غضب، اللہ کی لعنت اور سخت ترین عذاب کی صورت میں قرآن کریم میں مذکور ہیں ۔

ایک ناحق قتل پوری انسانیت کو قتل کرنے کے برابر گناہ ہے۔

اللہ کےنیک بندوں کی صفت یہ ہے کہ وہ ناحق قتل نہیں کرتے۔

اربابِ اقتدار کےلیےقتل کی تین صورتیں جائز ہیں :رجم، قصاص، ارتداد ۔

اللہ تعالیٰ کے ہاں مومن کی عزت کعبۃ اللہ سے بڑھ کر ہے ۔

ہتھیار سے اشارہ کرنا جائز نہیں جو یہ کام کرتا ہے اس پر فرشتے لعنت بھیجتے ہیں ۔

قاتل کی عبادات اللہ کی بارگاہ میں قبول نہیں ہوتیں۔

ناحق قتل کے مقابلے میں ساری دنیا کا مٹ جانا آسان ہے۔

قیامت کے دن حقوق العباد میں سب سے پہلے قتل ناحق کا حساب ہوگا۔

قاتلوں کےسہولت کار روزِقیامت اللہ کی رحمت سے مایوس کر دیے جائیں گے ۔

شرک اور قتل کے علاوہ تمام گناہوں کی معافی کا امکان ہے۔

اور اگر کسی کو ناحق قتل کرنے میں تمام آسمان و زمین والے مل کر شریک ہوجائیں تو اللہ تعالیٰ ان سب کو جہنم میں ڈالیں گے۔

اللہ تعالیٰ ہمارے پورےمعاشرے کوبالخصوص وطن عزیز پاکستان کو دہشت گردی، قتل وقتال اور فتنہ و فساد جیسی لعنت سے محفوظ فرمائے۔

 

والسلام

محمدالیاس گھمن

پیر ،12اکتوبر ، 2020ء