وہ بھی کیا لوگ تھے

’’یہ ہماری والدہ ہیں اور ان کی پچھلے چالیس سال سے یہی کیفیت ہے۔ ‘‘یہ الفاظ تھے اس گم نام عالمہ کے بیٹے کے جو نامور محدث حضرت عبد اللہ بن مبارک رحمہ اللہ کو اپنی والدہ محترمہ کا تعارف کروا رہا تھا۔

حضرت عبد اللہ بن مبارک فرماتے ہیں کہ میں ایک مرتبہ حج کے سفر کو جا رہا تھا کہ مجھے ایک بوڑھی خاتون راستے میں ملی جس نے اون کا کرتا پہن رکھا تھا اور اوڑھنی بھی اون کی تھی میں نے اس کے پاس جا کر کہا

تو اس خاتون نے جواب میں قرآن کریم کی یہ آیت پڑھی۔

سلام قولا من رب رحیم

عبد اللہ بن مبارک: اللہ تم پر رحم فرمائے یہاں کیا کر رہی ہو؟

جس کو اللہ گمراہ کرے اس کو رہ بتلانے والا کوئی نہیں۔

حضرت ابن مبارک فرماتے ہیں میں نے خیال کیا کہ وہ راستہ بھول گئی ہے یا قافلے سے بچھڑ گئی ہے۔

عبد اللہ بن مبارک: کہا ں جانے کا ارادہ ہے؟

پاک ہے وہ ذات جو اپنے بندے کو رات کے وقت مسجد حرام (بیت اللہ مکہ معظمہ) سے مسجد اقصیٰ (بیت المقدس) تک لے گئی۔

ابن مبارک فرماتے ہیں میں اس کی اس بات سے سمجھ گیا کہ وہ حج بیت اللہ سے فارغ ہو چکی ہے اور اب بیت المقدس جانا چاہتی ہے۔

عبد اللہ بن مبارک: کب سے یہاں بیٹھی ہو؟

عبد اللہ بن مبارک: تمہارے پاس کھانے پینے کی کوئی چیز نظر نہیں آتی یہ وقت تم نے کیسے گزارا؟

یعنی اللہ مجھے کھلاتا اور پلاتا ہے۔

عبد اللہ بن مبارک: وضو کیسے کرتی ہو؟

اگر تم کو پانی نہ ملے تو پاک مٹی سے تیمم کر لیا کرو۔

عبد اللہ بن مبارک: میرے پاس کھانا ہے کھاؤ گی؟

روزہ کو رات تک پورا کرو۔

مطلب یہ کہ میں روزے سے ہوں۔

عبد اللہ بن مبارک: یہ رمضان المبارک کا مہینہ تو نہیں ؟

جو بطور نفل کے نیک کام کرے تو اللہ قبول کرنے والا اور جاننے والا ہے۔ مطلب یہ کہ میرا نفلی روزہ ہے۔

عبد اللہ بن مبارک: سفر کی حالت میں تو فرض روزہ چھوڑ دینے کی بھی اجازت ہے۔

اور اگر تم روزہ رکھو تو تمہارے حق میں بہتر ہو اگر تم جانتے ہو۔

عبد اللہ بن مبارک: جس طرح میں تم سے باتیں کر رہا ہوں تم اس طرح مجھ سے کیوں نہیں کرتی؟

انسان جو بات بھی منہ سے نکالتا ہے اس پر نگہبان فرشتہ متعین ہے۔ مطلب یہ کہ انسان کوہر بات کا جواب دینا پڑے گا۔

عبد اللہ بن مبارک: تمہارا تعلق کس قبیلہ سے ہے؟

جس بات کا تمہیں علم نہ ہو اس کے پیچھے مت پڑو بے شک کان، آنکھ اور دل ان سب سے پوچھا جائیگا۔

عبد اللہ بن مبارک: معاف کرنا مجھ سے غلطی ہو گئی۔

آج تم پر کوئی ملامت نہیں اللہ تم کو معاف کرے۔

عبد اللہ بن مبارک: اگر تم چاہو تو میں تمہیں اپنی اونٹنی پر بیٹھا کر لے چلوں ؟

اور نیکی کا کام جو تم کرو گے اللہ اس کو جانتا ہے۔

ابن مبارک کہتے ہیں یہ سنتے ہی میں نے اپنی اونٹنی کو ان کے قریب کیا اس کو بٹھایا اور خاتون سے کہا اس پر سوار ہو جاؤ مگر وہ سوار ہو نے سے پہلے بولی۔

مؤمنوں سے کہ دو کہ وہ اپنی نگاہیں نیچی رکھیں۔ مطلب یہ کہ تم اپنی آنکھیں بند کر لو یا منہ پھیر لو تاکہ میں بلا جھجک سوار ہو سکوں۔

چنانچہ حضرت عبد اللہ بن مبارک نے اپنی نگاہیں نیچی کر لیں اور کہا اب سوار ہو جاؤ جب وہ خاتون سوار ہو نے لگی تو اچانک اونٹنی اٹھ گئی اور اس کی اوڑھنی کجاوے سے الجھ کر پھٹ گئی۔ میں نے اظہار افسوس کیا تو بولی

تمہیں جو مصیبت پہنچتی ہے وہ تمہارے ہی اعمال کا نتیجہ ہے اور اللہ بہت سی خطاؤں کو معاف فرما دیتا ہے۔ یعنی اس میں تمہارا کوئی قصور نہیں یہ تو میرے اعمال کا نتیجہ ہے۔

عبد اللہ بن مبارک: ذرا ٹھہرو میں اونٹنی کے پاؤں باندھ لوں تاکہ تم اطمینان سے سوار ہو سکو

پس ہم نے سمجھا دیا سلیمان کو۔ مطلب یہ کہ ضرور باندھو یہ اسی طرح سمجھے گی۔

حضرت عبد اللہ بن مبارک: پاؤں باندھنے کے بعد اب اس پر سوار ہو جاؤ۔

پاک ہے وہ ذات جس نے اس کو ہمارا مطیع کیا اور ہم اس کی صلاحیت نہ رکھتے تھے اور بے شک ہم سب اپنے پروردگار کی طرف لوٹنے والے ہیں۔

عبد اللہ بن مبارک کہتے ہیں میں نے اونٹنی کی مہارپکڑی اور اس کو ہنکاتے ہو ئے چل پڑا میری رفتار میں تیزی تھی اور جوش میں میری آوازبھی بلند ہو گئی تو خاتون بولیں

اپنے چلنے میں اعتدال سے کام لو اور اپنی آواز کو پست کرو۔

عبد اللہ بن مبارک کہتے ہیں اب میں آہستہ آہستہ چلنے لگا اور اشعار پڑھنے لگاتو …

جتنا آسانی سے ہوسکے قرآن پڑھو۔

عبد اللہ بن مبارک: اللہ تعالی نے تمہیں بہت سی خوبیوں سے نوازا ہے سب لوگ تمہاری طرح کس طرح بن جائیں ؟

یعنی صرف عقل والے ہی نصیحت حاصل کرتے ہیں۔

عبد اللہ بن مبارک: کیا تمہارا شوہر ہے؟

اے ایمان والو ! ایسی چیزوں کے بارے میں مت پوچھو جو تم پر ظاہر کر دی جائیں تو تم پر ناگوار گزریں۔

اب تو میں خاموش ہو گیا اور چلتے چلتے قافلے کے قریب جا پہنچا تو میں نے سوال کیا: ’’کیا قافلہ میں آپ کا کوئی رشتہ دار بھی ہے؟ ‘‘

مال اور بیٹے دنیاوی زندگی کی زینت ہیں۔

میں سمجھ گیا کہ قافلے میں اس کے بیٹے موجود ہیں تو میں نے کہا:’’ ان کی کوئی نشانی ہو تو بتائو تاکہ میں ان کو تلاش کروں۔ ‘‘

یعنی علامتیں ہیں اور ستاروں ہی سے وہ راستہ پاتے ہیں۔

میں سمجھ گیا کہ اس کے بیٹے قافلے کے رہبر ہیں چنانچہ میں اونٹنی کی مہار پکڑے ہوئے قافلے میں چکر لگانے لگا اور اس سے کہا کہ اپنے بیٹوں کو ڈھونڈلے۔ وہ بولی

٭اور بنایا اللہ نے ابراہیم( علیہ السلام )کو دوست٭ اور بات کی موسی(علیہ السلام) سے اچھی طرح٭ اے یحییٰ (علیہ السلام )پکڑ لو کتاب کو مضبوطی سے۔ مطلب یہ کہ تم ابراہیم، موسیٰ اور یحییٰ کے نام لے کر آواز دو۔

یہ سن کر میں نے زور سے آواز دی، یا ابراہیم یا موسیٰ یا یحییٰ فوراً تین خوبصورت نوجوان ایک خیمے سے نکلے اور بڑی عزت و احترام کے ساتھ اپنی والدہ کو اونٹنی سے اتارا۔ جب ہم سب اطمینان سے بیٹھ گئے تو خاتون نے اپنے بیٹوں سے مخاطب ہو کر یہ آیت پڑھی

آپ اپنے میں سے کسی کو یہ روپیہ دے کر شہر کی طرف بھیجو پھر وہ تحقیق کرے کہ کون سا کھانا زیادہ پاکیزہ ہے سو اس میں سے تمہارے لئے کچھ کھانا لے آئے۔ یہ سنتے ہی ان میں سے ایک نوجوان دوڑا گیا اور قریبی شہر سے کچھ کھانا خریدلایا۔ وہ کھانا میرے سامنے رکھا گیا تو خاتون نے کہا

خوشگواری کے ساتھ کھاؤ پیو بسبب ان اعمال کے جو تم نے گذشتہ دنوں میں کئے ہیں۔

عبد اللہ بن مبارک فرماتے ہیں کہ مجھ سے نہ رہا گیا اور میں نے نوجوان سے کہا کہ جب تک تم مجھے اس خاتون کی حقیقت نہیں بتلاؤ گے تو میں اس کھانے کو ہاتھ نہیں لگائوں گا۔ نوجوان نے کہا

یہ ہماری والدہ ہیں اور ان کی پچھلے چالیس سال سے یہ کیفیت ہے۔ اس عرصہ میں انہوں نے کوئی لفظ آیات کلام پاک کے سوا زبان سے نہیں نکالا یہ پابندی انہوں نے اپنے اوپر اس لئے لگائی کہ کوئی ایسا لفظ زبان سے نہ نکل جائے جس کی قیامت کے دن باز پرس ہو۔