حضرت زید بن ثابت رضی اللہ عنہ

نام ونسب:کنیت ابوسعید، انصاری قبیلہ خزرج سے تعلق رکھتے تھے۔ نسب نامہ یوں ہے:زید بن ثاب بن ضحاک بن زید بن وذان بن عمرو بن عبد عوف الانصاری الخزرجی

حافظ ابن اثیر جزری رحمہ اللہ فرماتے ہیں: جب حضور صلی اللہ علیہ وسلم نے مدینہ کی طرف ہجرت فرمائی تو اس وقت حضرت زید رضی اللہ عنہ کی عمر گیارہ سال تھی۔ اس حساب سے آپ کا سن ولادت تقریبا 2نبوی بنتاہے

حضرت زید رضی اللہ عنہ خود فرماتے ہیں کہ جب حضور علیہ السلام مدینہ تشریف لائے تو لوگ مجھے آپ کی خدمت میں لے گئے اور حضور کو بتایا:

کہ قبیلہ بنی نجار کے اس لڑکے کو قرآن مجید کی 17سورتیں یاد ہیں، میں نے وہ سورتیں حضور علیہ السلام کو سنائیں تو آپ بہت خوش ہوئے۔

آپ کی ذہانت ،قوت حافظہ اور دینی علوم کے شوق کو دیکھتے ہوئے حضور علیہ السلام نے ان کو حکم فرمایا :

تم یہود کی زبان سیکھو، مجھے اپنے خطوط میں ان پر بھروسہ نہیں۔

حضرت زید رضی اللہ عنہ نے حضور کے حکم کو مانتے ہوئے خوب محنت کرکے صرف دو ہفتوں میں یہود کی زبان سیکھ لی اس کے بعد آپ حضور علیہ السلام کی طر ف سے یہود کو خطوط لکھتے اور ان کی طرف سے آنے والے خطوط پڑھ کر حضور کو سناتے۔

خیر القرون میں قرآن کریم کے حوالے سے تین اہم مرحلے پیش آئے۔ ان تینوں میں حضرت زید رضی اللہ عنہ کے کردار کی مثال نہیں۔آپ رضی اللہ عنہ حضور صلی اللہ علیہ و سلم کے دور میں بھی کاتب وحی رہے،حضور صلی اللہ علیہ و سلم کی وفات کے بعد عہد صدیقی میں جمع قرآن کا مرحلہ پیش آیا تو آپ رضی اللہ عنہ قرآن جمع کرنے پر مامور ہوئے۔پھرحضرت عثمان رضی اللہ عنہ کے دور میں جب قرآن کو ایک لغت پر جمع کرکے اطراف عالم میں پھیلایا گیا تو اس کام کے لیے بھی ایک نمایاں نام حضرت زید رضی اللہ عنہ ہی کا تھا۔گویا کتابت قرآن،جمع قرآن اور نشر قرآن تینوں میں حضرت زید کا اہم کردار رہاہے۔

1:حضور علیہ السلام نے حضرت زید رضی اللہ عنہ کو علم وراثت کا سب سے بڑا عالم قرار دیا ہے۔ فرمان نبوی ہے.

2:آپ کے علمی کمال کا اندازہ اس سے بھی لگایا جاسکتاہے کہ مشہور کبار صحابہ رضی اللہ عنہم نے آپ رضی اللہ عنہ سے حدیث نقل کی ہے جن حضرت عبداللہ بن عمر، حضرت ابوسعید۔ حضرت ابوہریرہ۔ حضرت انس رضی اللہ عنہم وغیرہ شامل ہیں۔

3:صحابہ کرام رضی اللہ عنہم میں سے علم تفسیر میں حضرت ابن عباس رضی اللہ عنہ کا نام ایک نمایاں مقام رکھتاہے مگر آپ رضی اللہ عنہ بھی حضرت زید رضی اللہ عنہ کے علم کو قدر کی نگاہ سے دیکھتے تھے۔چنانچہ امام شعبی رحمہ اللہ فرماتے ہیں: حضرت زید بن ثابت رضی اللہ عنہ سواری پر سوار ہوکر جانے لگے تو حضرت ابن عباس رضی اللہ عنہ ان کی سواری کی رکاب پکڑ کر چلنے لگے، حضرت زید نے منع کیا کہ اس طرح نہ کریں۔توحضرت ابن عباس نے فرمایا:

ہم تو اپنے علماء اور بڑوں کا یوں ہی احترام کرتے ہیں۔

جس شخصیت کو حضرت ابن عباس رضی اللہ عنہ جیسی ہستی علماء اور اکابرین میں سے تسلیم کرے تواس کے علم کا کیا مقام ہوگا؟!

1: حضرت فاروق اعظم اور حضرت عثمان غنی رضی اللہ عنہما آپ رضی اللہ عنہ کی فقیہانہ حیثیت کی بڑی قدر کرتے تھے۔ امام ذہبی رحمہ اللہ فرماتے ہیں :

کہ حضرت عمر وحضرت عثمان رضی اللہ عنہمافتوی[یعنی علم فقہ ]وراثت اور قرآت قرآن میں حضرت زید کو سب سے مقدم سمجھتے تھے۔

2: حافظ ابن حجر عسقلانی رحمہ اللہ نقل کرتے ہیں کہ وہ چھ صحابہ رضی اللہ عنہم جو صاحب فتوی شمار ہوتے ہیں، ان میں ایک نام زید بن ثابت کا ہے۔

نیز یہ بھی نقل کرتے ہیں:

حضرت زید کومدینہ منورہ میں قضاء، فتویٰ، قرآت اور فرائض میں بڑا مقام حاصل تھا۔

3: آپ کے فقہی مقام کا یہ حال تھا کہ اہل اسلام کی ایک کثیر جماعت آپ کے قول وفتویٰ کے مقابلے میں کسی اور فقیہ کی بات عمل نہیں کرتی تھی۔حضرت عکرمہ رحمہ اللہ فرماتے ہیں:مدینہ والوں نے حضرت ابن عباس سے ایک مسئلہ پوچھا، اس میں حضرت ابن عباس کا قول او ر تھا حضرت زید کا اور۔مدینہ والوں نے کہا:

کہ ہم آپ کے فرمان کو لیں اور حضرت زید کے فتویٰ کو چھوڑ دیں، ایسا نہیں کرسکتے۔ اس سے معلوم ہوا کہ اس دور میں اہل مدینہ ایک متعین فقیہ کی تقلید کرتے تھے۔

45ھ میں علم وفقہ کا یہ عظیم چراغ کئی سالوں تک دنیا کو علم کی روشنی سے منور کرنے کے بعد قبر کی زینت بن گیا۔آپ کی وفات پر اکابر صاحب نے انتہائی دردناک جملوں میں غم کا اظہار فرمایا۔

حضرت ابوہریرہ نے فرمایا.

آج اس امت کا بہت بڑا عالم دنیا سے چلا گیا۔امید ہے اللہ تعالیٰ ابن عباس کو ان کا جانشین بنا دیں گے۔

شاعر بزم ختم نبوت حضرت حسان بن ثابت رضی اللہ عنہ نے فرمایا:

حسان اور اس کے بیٹے کے بعد ایسے اشعار کون پڑھ سکے گا اور قرآن کا مطلب ومفہوم زید کے بعد کون بیان کر سکے گا۔

مفسر قرآن حضرت ابن عباس رضی اللہ عنہما نے فرمایا:

جو شخص جاننا چاہتاہے کہ علم کیسے دنیا سے جاتاہے وہ دیکھ لے کہ زید جیسے شخص کے جانے سے علم جاتاہے، آج زید کے دفن ہونے سے علم کا بہت بڑا حصہ دفن ہوگیا۔