دل اللہ کی طرف متوجہ رکھیں

حدیث پاک ملاحظہ فرمائیں:

ترجمہ: حضرت ابو ہریرہ رضی اللہ عنہ سے روایت ہے رسول اللہ صلی اللہ علیہ وسلم نے فرمایا: اللہ سے دعاء مانگو تو اس کے قبول ہونے کا یقین رکھو! یہ بات اچھی طرح سمجھ لو کہ اللہ تعالیٰ ایسی دعاء کو قبول نہیں فرماتے جو غافل اور لاپرواہ دل سے مانگی جائے۔

حدیث مبارک میں غور فرمائیے کہ دعاء اگرچہ ظاہری عمل ہےدیکھنے میں ہاتھ اٹھانا ، منہ ہلانا ، زبان سے مانگنا سب کچھ نظر آ رہا ہوتا ہے لیکن یہ قبول اس وقت ہوتی ہے جب دل اور باطن کو غفلت اور لاپرواہی کی کیفیت سے پاک کر لیا جائے ۔ غفلت اور لاپرواہی ایسا خطرناک روحانی مرض ہے جو دیکھنے میں نظر بھی نہیں آتا اور اس کی وجہ سے انسان دعاء کی قبولیت سے بھی محروم ہو جاتا ہے ۔

آج ہماری بدقسمتی دیکھیے کہ ہم سب اس موذی مرض کا شکار ہو چکے ہیں ۔ عبادات کے وقت بلکہ اہم العبادات نماز میں بھی ہماری توجہ اللہ کی طرف نہیں ہوتی ، دلِ غافل دنیا کے بکھیڑوں میں اتنا الجھا ہوا ہوتا ہے کہ کچھ پتہ نہیں ہوتا کہ ہم اللہ کے حضور اس کے ایک اہم فریضے کی ادائیگی کے لیے کھڑے ہیں ، ہم اس سے کیا کہہ رہے ہیں ؟ کیا مانگ رہے ہیں؟

حالانکہ حق تو یہ بنتا ہے کہ ہم مکمل توجہ اور دل جمعی کے ساتھ اللہ کے حضور کھڑے ہوں ، ہمیں معلوم ہو کہ ہم اس سے کیا مانگ رہے ہیں ؟اللہ کریم ہمیں ایسی عبادات کرنے کی توفیق عطا فرمائے کہ زبان کے ساتھ ساتھ دل بھی اللہ کی یاد میں مشغول ہو ۔ غفلت اور لاپرواہی جیسے روحانی مرض کی اصلاح کی فکر نصیب فرمائے اور اپنے نیک بندوں کی صحبت کی برکت سے دل غافل کو دل ذاکر بنائے۔ دل سے غفلت اور لاپرواہی کو دور کرکے کامل توجہ کے ساتھ اللہ تعالیٰ سے دعا مانگیئے ۔

یہاں یہ بات اچھی طرح ذہن نشین فرمائیں کہ مختلف حالتوں میں دعاء مانگنے کے طریقے بھی مختلف ہیں :

بعض مقامات ایسے ہیں جہاں پر ہاتھ اٹھائے بغیر دعاء مانگی جاتی ہے ، جیسے صبح اٹھتے وقت کی دعاء ، بیت الخلاء جاتے وقت کی دعا ، وہاں سے نکلتے وقت کی دعاء ، وضو شروع کرتے وقت اور وضو کے بعد کی دعاء ،اذان کے بعد کی دعاء ،گھر سے نکلنے کی دعاء، گھر میں داخل ہونے کی دعاء، مسجد داخل ہونے کی دعاء ، مسجد سے باہر نکلنے کی دعاء ، بازار میں داخل ہونے کی دعاء ، کھانا کھانے کی دعاء ، دودھ پینے کی دعاء، میاں بیوی کے ملاپ کے وقت کی دعاء، رات کو سوتے وقت کی دعاء ،وغیرہ وغیرہ ۔

حالت نماز میں کی جانے والی دعاء میں بھی ہاتھ نہیں اٹھانے ۔ قیام میں سورۃ فاتحہ کی تلاوت کے دوران اھدنا الصراط المستقیم یہ دعاء ہے،چونکہ سورۃ فاتحہ میں انسان اللہ سے دعاء مانگتا ہے اس لیے جب سورۃ فاتحہ مکمل ہو جائے تو آہستہ آواز سے ”آمین“ کہہ لے۔ اس کا مطلب یہ ہے کہ اے اللہ میں نے جو دعاء مانگی ہے اسے تو قبول فرما۔ سجدوں میں دعاء مانگنے کا حکم بھی حدیث پاک میں موجود ہے ۔

ترجمہ: حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: بندے کو اپنے رب کی اس وقت زیادہ قربت نصیب ہوتی ہے جب وہ سجدے کی حالت میں ہو اس لیے )اس حالت میں (کثرت کے ساتھ دعاء مانگو۔

نوٹ: سجدوں میں کی جانے والی دعاء بھی ہاتھ اٹھائے بغیر کرنی ہے۔

اسی طرح دو سجدوں کے درمیانی وقت میں بھی دعاء کے مختلف الفاظ احادیث مبارکہ میں موجود ہیں ۔لیکن یہاں بھی ہاتھ اٹھائے بغیر دعاء مانگنی ہے ، ہاتھ اٹھا کر نہیں مانگنی۔

ترجمہ: حضرت عبداللہ بن عباس رضی اللہ عنہما سے روایت ہے رسول اللہ صلی اللہ علیہ وسلم سجدوں کے درمیان یہ دعاء فرماتے تھے:

اے اللہ!میری مغفرت فرما، مجھ پر رحم فرما، میرے نقصان کو پورا فرما، مجھے عافیت نصیب فرما، مجھے ہدایت نصیب فرمااور مجھے رزق عطاء فرما۔

نوٹ: دو سجدوں کے درمیان دعاء کے مختصر الفاظ بھی منقول ہیں ۔

ترجمہ: حضرت حذیفہ رضی اللہ عنہ سے مرفوعاً روایت ہے کہ رسول اللہ صلی اللہ علیہ وسلم دو سجدوں کے درمیان یہ دعاء مانگا کرتے تھے :

اے میرے پروردگار !میری مغفرت فرما۔ اے میرے پروردگار میری مغفرت فرما۔

اسی طرح آخری تشہد میں درود پاک کے بعد بھی دعاء کے مختلف الفاظ حدیث پاک میں موجود ہیں ۔

تشہد میں درود پاک کے بعد والی دعاء کے بارے ضابطہ یہ ہے کہ ہر وہ دعاء جس کے الفاظ قرآن و سنت میں موجود ہوں وہ مانگی جا سکتی ہے۔ اس کے علاوہ جو الفاظ قرآن و سنت میں موجود نہیں اگرچہ عربی کے ہی کیوں نہ ہوں ان کے ساتھ دعا ء نہیں کی جا سکتی ۔

بعض مقامات ایسے ہیں جہاں ہاتھ اٹھا کر دعاء مانگنی چاہیے۔ جیسے فرض نمازوں کے بعد)سوائے جنازہ کے (، میت کوقبر میں دفن کرنے کے بعد ، دینی مجالس کے اختتام پر ، حوادثات سے حفاظت کے لیے ، خیر وبرکت کےلیے ، اپنی حاجات کو مانگنے کے لیے دن رات کے کسی بھی حصے میں،وغیرہ۔چنانچہ احادیث مبارکہ میں ہاتھ اٹھا کر دعاء مانگنے کا بھی ثبوت موجود ہے ۔

فائدہ: عموماً ہر وہ مقام جہاں پر دعاء کے الفاظ متعین ہیں وہاں پر ہاتھ اٹھائے بغیر دعاء مانگنا ثابت ہے اور جہاں دعاء کے الفاظ متعین نہیں وہاں ہاتھ اٹھا کر دعاء مانگنا ثابت ہے ۔