روضہ مبارک پر حاضری کا طریقہ

قرآن کریم میں اللہ رب العزت فرماتے ہیں:

ترجمہ: اے ایمان والو! اپنی آوازیں نبی کی آواز سے بلند نہ کرو، اور نہ ان سے بات کرتے ہوئے اس طرح زور سے بولا کرو جیسے تم ایک دوسرے سے زور سے بولتے ہو، ایسانہ ہو کہ تمہارے اعمال برباد ہو جائیں اور تمہیں پتہ بھی نہ چلے۔

اس آیت کریمہ کی تفسیر میں امام ابن کثیر رحمۃ اللہ علیہ تحریر فرماتے ہیں:

احادیث میں ہے ایک مرتبہ حضرت عمر فاروق رضی اللہ عنہ نے مسجد میں دو آدمیوں کی آواز سنی تو ان کو تنبیہ فرمائی اور پوچھا: تم لوگ کہاں کے ہو؟ معلوم ہوا کہ یہ اہل طائف ہیں۔ تو فرمایا: اگر یہاں مدینے کے باشندے ہوتے تو میں تم کو سزا دیتا تم اپنی آوازیں مسجد رسول اللہ صلی اللہ علیہ وسلم میں بلند کر رہے ہو۔ اس حدیث سے علماءِ امت نے یہ حکم نکالا ہے کہ جیسا احترام آنحضرت صلی اللہ علیہ وسلم کی حیات مبارکہ میں تھا اسی طرح کا احترام و توقیر اب بھی لازم ہے کیونکہ حضور اکرم صلی اللہ علیہ وسلم اپنی قبر مبارک میں زندہ ہیں اور جس طرح آپ کی دنیاوی حیات میں کی حرمت و ممانعت تھی اسی طرح اب بھی ہے، اس قبر مبارک کے پاس بلند آواز سے بات کرنا اور سخت لب و لہجہ اختیار کرنا ممنوع ہے۔ وقار و سکون اور تعظیم و تکریم ملحوظ رہے۔

علامہ سخاوی رحمہ اللہ تحریر فرماتے ہیں:

مستحب یہ ہے کہ جب مدینہ منورہ کے مکانات اور درختوں پر نظر پڑے تو درود پاک کثرت سے پڑھے اور جتنا قریب ہوتا جائے اتنا ہی صلوٰۃ وسلام میں کثرت ہو اس لیے کہ یہ وحی اور قرآن پاک کے نازل ہونے کے مقامات ہیں۔

حضر ت جبرائیل علیہ السلام اور حضرت میکائیل علیہ السلام کی بار بار یہاں آمد ہوئی تھی اور اس کی مٹی سید البشر صلی اللہ علیہ وسلم پر مشتمل ہے۔ اسی جگہ سے اللہ کے دین اور آپ صلی اللہ علیہ وسلم کی مبارک سنتوں کی اشاعت ہوئی ہے۔ یہ فضائل وخیرات کے مناظر ہیں اور جس جگہ سے گزرے یہ خیال دل میں رکھے آپ صلی اللہ علیہ وسلم یہاں سے گزرتے، آتے اور جاتے تھے۔ مدینہ منورہ اپنی قیام گاہ پر پہنچ کر غسل کرے، اچھے سے اچھے کپڑے پہنے، ڈاڑھی اوربالوں میں کنگھا کرے، خوشبو لگائے اور مسجد نبوی کی طرف آئے۔ اگر آسانی ہو تو افضل یہی ہے کہ باب جبرائیل سے مسجد میں داخل ہوجائے اور دایاں قدم اندر رکھتے ہوئے دعاء پڑھے:

[اے اللہ! میرے لیے اپنی رحمت کے دروازے کھول دے]

اور اعتکاف کی نیت کرتے ہوئے یہ دعا پڑھے:

[میں سنت اعتکاف کی نیت کرتا ہوں]

اس کے بعد اگر موقع مل جائے تو ریاض الجنۃ پہنچ کر محراب میں یا اس کے قریب جگہ میں دو رکعت تحیۃ المسجد ادا کرے اگر وہاں جگہ نہ ملے تو لڑنے جھگڑے اور شور و شغب کرنے کی بجائے جہاں جگہ ملے وہیں پر تحیۃ المسجد کے نوافل ادا کرے۔

یہاں پہنچ کر اپنے دل کو نہایت ادب وتعظیم اور ہیبت سے بھر لے۔ یوں سمجھے کہ آپ صلی اللہ علیہ وسلم کی زیارت کررہاہوں، اور یہ ذہن میں رکھے کہ آپ صلی اللہ علیہ وسلم میرے صلوٰۃ وسلام کو سن رہے ہیں اور آپ علیہ الصلوٰۃ والسلام کی خدمت میں سفارش کی درخواست کررہاہوں اس لیے بلند آواز سے بولنا، لڑنا جھگڑنااس طرح کے تمام امور سے پرہیز کرے۔

اس کے بعد قبلہ کی جانب سے روضہ مبارک پر حاضر ہو اور تھوڑے سے فاصلہ پر کھڑا ہوکر اپنی نگاہوں کو نیچے رکھتے ہوئے نہایت خشوع وخضوع اور ادب واحترام سے یہ پڑھے:

آپ پر سلام ہو اے اللہ کے رسول

آپ پر سلام ہو اے اللہ کے نبی

آپ پر سلامتی ہو اے اللہ کی بر گزیدہ ہستی

آپ پر سلام ہواے اللہ کی مخلوق میں سب سے بہتر

آپ پر سلام ہو اے اللہ کے حبیب

آپ پر سلام ہو اے رسولوں کے سردار

آپ پر سلام ہو اے خاتم النبیین

آپ پر سلام ہو اے رب العالمین کے رسول

آپ پر سلام ہو اے قیامت کے دن روشن چہروں اور ہاتھ پاؤں والوں کے سردار

آپ پر سلام ہو اے جنت کی بشارت دینے والے

آپ پر سلام ہو اے جہنم سے ڈرانے والے

آپ پراور آپ کے اہل بیت پر سلام جو طاہر اور پاک ہیں

آپ پر اور آپ کی ازواج پرسلام جو سارے مومنین کی مائیں ہیں

آپ پر اور آپ کے تمام اصحاب پرسلام ہو

آپ پر اور تمام انبیاء اور رسولوں پر اور اللہ کے تمام نیک بندوں پرسلام ہو

اے اللہ کے رسول اللہ پاک آپ کو جزائے خیر عطا فرمائے اس بے بھی زیادہ جتنی کسی نبی کو اس کی قوم کی طرف سے اور کسی رسول کو اس کی امت کی طرف سے عطا کی ہو

اللہ پاک آپ پر رحمت بھیجے جب بھی آپ کا کوئی ذکر کرے اور جب بھی غافل لوگ آپ کے ذکر سے غافل ہوں

اللہ پا ک آپ پر اولین میں رحمت بھیجے

اللہ پاک آپ پر آخرین میں رحمت بھیجے

اس سب سے افضل، اکمل اور پاکیزہ جو اللہ نے اپنی ساری مخلوق میں سے کسی پر بھیجی ہو

جب کہ اس نے ہمیں آپ کی برکت سے گمراہی سے نجات دی

اور آپ کی وجہ سے جہالت اور اندھے پن سے نجات دی

میں گواہی دیتا ہوں کہ اللہ کے سوا کوئی معبود نہیں اور آپ اللہ کے بندے اور رسول ہیں۔ اس کے امین ہیں، ساری مخلوق میں سے اس کے برگزیدہ ذات ہیں۔ اور اس بات کی گواہی دیتا ہوں کہ آپ نے اللہ کے پیغام کو پہنچا دیا اور اس کی امانت ادا کردی۔ امت کے ساتھ پوری پوری خیر خواہی کی اور اللہ پاک کے راستے میں کوشش کا حق ادا کر دیا۔ اللہ پاک آپ کو اس سے زیادہ دے جس کی امید کرنے والے امید کر سکتے ہیں۔

اس کے بعد اپنے لیے اور پوری امت مسلمہ کے لیے دعا کرے۔

اس کے بعد حضرات شیخین یعنی سیدنا ابوبکر صدیق اور سیدنا عمر فاروق رضی اللہ عنہما پر سلام پیش کرے اور ان کے لیے بھی دعا کرے۔

دعا قبلہ نہیں بلکہ روضہ انور کی طرف رخ کرکے مانگے۔

حضرت ملا علی قاری رحمۃ اللہ علیہ اپنی کتاب میں فرماتے ہیں:

ترجمہ: امام ابو حنیفہ رحمہ اللہ نے حضرت ابن عمر رضی اللہ عنہما سے نقل کیا ہے کہ آپ رضی اللہ عنہما فرماتے ہیں: سنت یہ ہے کہ جب تمہاری حاضری رسول صلی اللہ علیہ وسلم کی قبر مبارک پر ہو تو قبر مبارک کی طرف چہرہ کرکے اس طرح کہو: اے نبی! آپ پر سلام ہو اور اللہ کی رحمت و برکات نازل ہوں۔ حضرت ابن المبارک رحمہ اللہ فرماتے ہیں کہ ”میں نے امام ابو حنیفہ رحمہ اللہ کو یہ فرماتے ہوئے سنا ہے کہ جب حضرت ابو ایوب سختیانی رحمہ اللہ مدینہ منورہ تشریف لائے تو میں وہیں موجود تھا، میں نے پختہ ارادہ کیا کہ دیکھوں تو سہی آپ کیا کرتے ہیں؟ چنانچہ دیکھا کہ انہوں نے قبلہ کی طرف پشت کی اور رسول اللہ صلی اللہ علیہ وآلہ وسلم کے چہرہ انور کی طرف اپنا منہ کیا اورایک فقیہ کی شان کے مطابق بغیر کسی تکلف اور تصنع کے روئے ۔“ اس سے صاف ظاہر ہے کہ یہی صورت امام صاحب رحمہ اللہ کے ہاں پسندیدہ ہے ۔

ابن وہب رحمہ اللہ نے امام مالک رحمہ اللہ سے نقل کیاہے:

ترجمہ: یعنی جب کوئی آپ صلی اللہ علیہ و سلم کی خدمت میں سلام عرض کرلے تو اس طرح کھڑا ہوکہ منہ آپ صلی اللہ علیہ و سلم کی طرف ہو نہ کہ قبلہ کی طرف اور قریب ہوجائے اور سلام عرض کرلے اور دعا کرے ۔

امام ابو عبداللہ محمد بن عبداللہ الحنبلی تحریر فرماتے ہیں:

روضہ مبارک کی طرف منہ کرکے منبر کو اپنی بائیں جانب کرکے کھڑا ہو اور دعا مانگے۔

علامہ سمہودری رحمہ اللہ نقل کرتے ہیں:

ترجمہ: حضرت ابو بکر صدیق رضی اللہ عنہ نے فرمایا: آپ صلی اللہ علیہ و سلم پر آواز کو بلند کرنا جائز نہیں، نہ زندگی میں نہ موت کے بعد۔

ترجمہ: حضرت سائب بن یزید رضی اللہ عنہ فرماتے ہیں کہ میں مسجد میں کھڑا تھا کہ کسی شخص نے مجھے کنکری ماری، میں نے دیکھا تو وہ حضرت عمر رضی اللہ عنہ تھے، آپ رضی اللہ عنہ نے فرمایا: جاؤ اور ان دونوں آدمیوں کو میرے پاس لے آؤ۔ میں انہیں آپ رضی اللہ عنہ کے پاس لے آیا۔ آپ رضی اللہ عنہ نے اُن سے پوچھا: تم کن لوگوں میں سے ہو؟ یعنی کس قبیلے سے تمہارا تعلق ہے؟ انہوں نے کہا: ہم اہل طائف میں سے ہیں۔اس پرحضرت عمررضی اللہ عنہ نے فرمایا :اگر تم اہل مدینہ میں سے ہوتے تو میں تمہیں سزادیتا اس لیے کہ تم مسجد رسول اللہ صلی اللہ علیہ وسلم میں اپنی آوازیں بلند کررہے ہو۔

علامہ تقی الدین سبکی رحمہ اللہ تعالی اپنی معروف کتاب شفاء السقام میں سیدنا علی رضی اللہ عنہ کے بارے میں نقل کرتے ہوئے لکھتے ہیں:

ترجمہ: حضرت علی رضی اللہ عنہ نے اپنے گھر کے دروازے مدینہ میں ایک باہر کی جگہ میں بنوائے تاکہ کواڑ بننے کا شور پیدا نہ ہو اور رسول اللہ صلی اللہ علیہ و سلم کو تکلیف نہ ہو۔

حضرت عائشہ رضی اللہ عنہا کے بارے میں مروی ہے:

ترجمہ: آپ جب کبھی ان گھروں میں جو مسجد نبوی صلی اللہ علیہ وسلم سےمتصل تھے، کسی میخ لگنے یا کیل لگانے کی آواز سنتی تھیں تو یہ حکم بھیجتی تھیں کہ خبردار! حضور اکرم صلی اللہ علیہ وسلم کو ا س آواز سے اذیت نہ دو۔

صحابہ کرام رضی اللہ عنہم آپ علیہ السلام کی وفات کے بعد بھی روضہ مبارک اور مسجد نبوی میں بلند آواز سے بات نہیں کرتے تھے کہ کہیں ہماری اس گفتگو کی وجہ سے حضور اکرم صلی اللہ علیہ وسلم کو تکلیف نہ ہو اور دروازےبنانے کی آواز بھی آپ صلی اللہ علیہ و سلم تک نہیں پہنچنے دیتے تھے۔