نام مبارک کے ساتھ ”سیدنا“ کا لفظ بڑھا نا

درمختار میں ہے کہ آپ صلی اللہ علیہ وسلم کے نام نامی اسم گرامی کے شروع میں لفظ ”سیدنا“ بڑھانا مستحب اور افضل ہے۔

بعض لوگ کہتے ہیں کہ لفظ سیدنا نہیں بڑھانا چاہیے اور بطور دلیل ایک حدیث پیش کرتے ہیں کہ ابو مطرف رضی اللہ عنہ فرماتے ہیں میں ایک وفد وفد بنی عامر کے ساتھ آپ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم سے عرض کی: ”أَنْتَ سَيِّدُنَا“ کہ آپ ہمارے سردار ہیں۔ حضور صلی اللہ علیہ وسلم نے فرمایا: ”اَلسَّيِّدُ اللّهُ تَبَارَكَ وَتَعَالٰى“یعنی حقیقی سید اور سردار تو اللہ ہی ہے۔

تو اس سے معلوم ہوا اللہ کے لیے لفظ ”سید“ استعمال کرنا چاہیے اور غیر اللہ کے لیے استعمال کرنا درست نہیں۔

آپ علیہ السلام کا فرمان بالکل صحیح ہے کہ حقیقی سیادت اور کمال سیادت اللہ تعالیٰ ہی کے لیے ہے۔ لیکن اس کا یہ مطلب نہیں کہ آپ صلی اللہ علیہ وسلم کے نام پر سیدنا کا لفظ بڑھانا اور استعمال کرنا درست نہیں۔ خود آپ صلی اللہ علیہ وسلم نے اپنے لیے یہ لفظ استعمال فرمایا ہے۔

حضرت ابوہریرہ رضی اللہ عنہ سے روایت ہے آپ علیہ السلام نے ارشاد فرمایا:

کہ میں قیامت کے دن لوگوں کا سردار ہوں گا۔

ایک اور روایت میں ہے:

کہ میں قیامت کے دن اولاد آدم کا سردار ہوں گا۔

حضرت ابو سعید خدری رضی اللہ عنہ سے روایت ہے آپ علیہ السلام نے ارشاد فرمایا:

کہ میں قیامت کے دن اولاد آدم کا سردار ہوں گا اور مجھے اس پر کوئی تکبر یا فخر نہیں ہے۔

باقی رہا اس حدیث کا مطلب تو اس سے مراد کمال سیادت ہے اور وہ واقعی صرف خدا کی ذات کے اندر ہے اس نفی سے مطلقا نفی مراد نہیں۔ جیسا کہ حدیث پاک میں آتا ہے ایک صحابی نے آپ علیہ السلام کی پشت مبارک پر مہر نبوت کے بارے میں یہ درخواست کی تھی کہ میں طبیب ہوں، آپ کی پشت مبارک پر جو گوشت ابھرا ہوا ہے مجھے دکھلائیے میں اس کا علاج کروں۔ حضور اکرم صلی اللہ علیہ وسلم نے فرمایا طبیب تو اللہ جلّ شانہ ہی ہے جس نے اس کو پیدا فرمایا۔

اس حدیث پاک سے بظاہر یہ معلوم ہوتا ہے کہ معالج کو طبیب کہنا درست نہیں کیونکہ طبیب تو خدا کی ذات ہے۔ لیکن یہاں حقیقت کی نفی نہیں بلکہ کمال کی نفی ہے اسی طرح وہاں پر بھی حقیقت کی نفی نہیں بلکہ کمال سیادت کی نفی ہے۔

اسی طرح حضرت ابو ہریرہ رضی اللہ عنہ آپ علیہ السلام کا ارشاد نقل کرتے ہیں:

کہ پہلوان وہ نہیں جو دوسرے آدمی کو پچھاڑ دےبلکہ پہلوان وہ ہے جو غصہ کے وقت اپنے آپ پر قابو پالے۔

اس کا یہ مطلب نہیں کہ پچھاڑنے والے کو پہلوان کہنا درست نہیں، کیونکہ آپ صلی اللہ علیہ وسلم نے اس سے پہلوان ہونے کی نفی کردی۔ نہیں! پہلوانی کی نفی نہیں کی بلکہ کمالِ پہلوانی کی نفی کی ہے۔

علامہ مجد الدین صاحب قاموس تحریر فرماتے ہیں کہ بہت سے لوگ کہتے ہیں تو اس میں بحث ہے۔ نماز میں یوں کہنا تو درست نہیں البتہ نماز کے علاوہ میں جو چند لوگ روایت پیش کرتے ہیں کہ آپ علیہ السلام نے فرمایا اس سے معلوم ہوا کہ آپ علیہ السلام کے لیے سیدنا کا لفظ استعمال کرنا درست نہیں۔

آپ علیہ السلام کا یہ فرمان یا تو تواضع کے لیے تھا یا پھر آپ علیہ السلام نے منہ پر تعریف کو پسند نہ فرمایا ہو یا پھر انہوں نے بہت مبالغہ کیا تھا اور زمانہ جاہلیت میں لوگوں کا یہ دستور تھا کہ اپنے سردار کے منہ پر اس قسم کی تعریفیں کرتے تھے۔ انہوں نے کہا آپ ہمارے سردار ہیں آپ ہمارے باپ ہیں آپ ہم سے فضیلت میں بہت بڑے ہوئے ہیں آپ ہم پر بخشش کرنےمیں سب سےبڑھے ہوئے ہیں اور آپ جفنۃ الغرا ءہیں۔ یہ زمانہ جاہلیت کا مشہور مقولہ ہے وہ اپنے سردار کو جو بڑا کہلانے والا ہو اور بڑے بڑے پیالوں میں لوگوں کودنبوں کی چکی اور گھی سے لبریز پیالوں میں کھلاتا ہو۔ ان سب باتوں پرآپ صلی اللہ علیہ وسلم نے انکار فرمایا تھا کہ تم کو شیطان مبالغہ میں نہ ڈال دے۔ ورنہ صحیح احادیث میں ہے کہ خود حضور صلی اللہ علیہ وسلم نے اپنے لیے لفظ سید کو استعمال فرمایا ہے اور اپنے نواسہ حضرت حسن رضی اللہ عنہ کے لیے فرمایا:

میرا یہ بیٹا سردار ہے۔

حضرت سہل بن حنیف کا حضور اکرم صلی اللہ علیہ وسلم کو ”یاسیدی“ کے ساتھ خطاب کرنا وارد ہے۔

آپ صلی اللہ علیہ و سلم کے علاوہ دیگر شخصیات کے لیے لفظ ”سید“ کا استعمال قرآن و حدیث میں کئی مقامات پر ملتا ہے۔ مثلاً:

1: قرآن کریم میں حضرت یحییٰ علیہ السلام کے بارے میں ہے:

ترجمہ: وہ لوگوں کے پیشوا ہوں گے، اپنے آپ کو نفسانی خواہشات سے مکمل طور پر روکے ہوئے ہوں گے، نبی ہوں گے اور ان کا شمار راست بازوں میں ہو گا۔

2: قرآن کریم میں سورۃ یوسف میں ہے:

ترجمہ: دونوں نے اس عورت کے شوہر کو دروازے پر کھڑا پایا۔

3: حضرت عمر رضی اللہ عنہ کا ارشاد ہے:

ابو بکر ہمارے سردار ہیں ہمارے سردار بلال کو آزاد کیا ۔

4: حنفیت کے بیباک ترجمان علامہ بدرالدین عینی رحمۃ اللہ علیہ فرماتے ہیں:

حضور پاک صلی اللہ علیہ وسلم نے جب انصار کو حضرت سعد رضی اللہ عنہ کے بارے میں فرمایا ”قُومُوا إِلَى سَيِّدِكُمْ“ یعنی اپنے سردار کے لیے کھڑے ہوجاؤ۔ [صحیح البخاری ج2 ص926] اس سے استدلال کیا جاتا ہے کہ اگر کوئی شخص ”سیدی ومولائی“ کہے تو اس کو نہیں روکا جائے گا اس لیے کہ سیادت کا مرجع اور مآل یعنی نتیجہ اپنے ماتحتوں پر بڑائی اور ان کے لیے حسن تدبیر ہے اسی وجہ سے خاوند کو بھی ”سید“ کہا جاتا ہے۔

5: آپ علیہ السلام نے بنو سلمہ سے پوچھا: تمہارا سردار کون ہے؟ انہوں نے کہا: جد بن قیس۔ حضور پاک صلی اللہ علیہ وسلم نے فرمایا: ”بَلْ سَيِّدُكُمْ عَمْرُو بْنُ الْجَمُوحِ“ بلکہ تمہارا سردار عمر و بن جموح رضی اللہ عنہ ہے۔

6: حضرت ابو ہریرہ رضی اللہ عنہ سے روایت ہے آپ علیہ السلام نے ارشاد فرمایا:

ترجمہ: کوئی شخص نہ کہے یعنی اپنے آقا کو رب کے لفظ سے تعبیر نہ کرے بلکہ یوں کہے ”سَيِّدِي مَوْلَايَ“ کہ میرا سید میرا مولیٰ۔

جب غیر نبی کے لیے خود حضور صلی اللہ علیہ وسلم نے ”سید“ کا لفظ استعمال کیا ہے تو حضور صلی اللہ علیہ وسلم کے لیے ناجائز کیسے ہوسکتا ہے؟!