رسولِ اکرم ﷺ کی شانِ عبدیت

اللہ تعالیٰ نے اپنے محبوب حضرت محمد صلی اللہ علیہ وسلم کو جو شان اور مقام عطا فرمائے ہیں وہ سب درجۂِ کمال تک پہنچے ہوئے ہیں۔

حسن و جمال، عقل و تدبر، رعنائی و دلربائی، عادات و اخلاق، صفات و شمائل، حکمت و بصیرت، سیادت و قیادت، عزت و مرتبت، عظمت و منقبت، رفعت و سلطنت ، ہیبت و سطوت، سیرت و صورت، حسب ونسب، قوم و قبیلہ، آل و اولاد، ازواج و بنات، اھل و اصحاب، حشم و خدم، نبوت و رسالت، کتاب و سنت الغرض زندگی کا ہر پہلو کاملیت سے اکملیت تک مکمل ہوتا ہے بالکل اسی طرح اللہ کریم نے آپ صلی اللہ علیہ وسلم کو ”شانِ عبدیت“ عطا فرمائی ہے کوئی اِس کی ابتداء کو نہیں پاسکتا چہ جائیکہ برابری اور انتہاء تک پہنچے ۔ آپ صلی اللہ علیہ وسلم اِس شان میں اُس انتہاء کو پہنچے ہوئے ہیں کہ جہاں عبدیت ”مولائے کل“ کے معنی میں ہویدا ہوتی ہے اور من تواضع للہ رفعہ اللہ کا سارا عموم آپ کا ہی خاصہ قرار دیا جا سکتا ہے ۔

عبد کا معنی ہوتا ہے: جو اپنے رب کے ہر فیصلے اور کام پردل و جان سے راضی ہو، یہ عبدیت کی ابتداء ہے۔ بندگی ، اطاعت ، فرمانبرداری ، تسلیم و رضا اور عبدیت کی انتہا یہ ہے کہ رب بھی اس کے ہر قول و عمل سے راضی ہو جائے۔

قرآن کریم میں اللہ تعالی نے سابقہ انبیاء کرام علیہم السلام کے تذکرے میں ان کی” صفتِ عبدیت“ کو مدح کے طور پر ذکر فرمایا ہے ۔

ترجمہ: اے ان لوگوں کی اولاد جن کو ہم نے نوح کے ساتھ کشتی میں سوار کیا تھا اور وہ بڑے شکر گزار بندے تھے۔

ترجمہ: اور ہمارے بندے داؤد) علیہ السلام (کو یاد کرو ۔

ترجمہ: اور ہم نے داؤد کو سلیمان جیسا بیٹا عطا فرمایا ، وہ بہترین بندے تھے اور بے شک وہ اللہ سے محبت کرنے والے تھے۔

ترجمہ: ہمارے بندے ایوب کو یاد کرو۔

ترجمہ: اور ہمارے بندوں ابراہیم ، اسحاق اور یعقوب کو یاد کرو۔

ترجمہ: فرمایا عیسیٰ )علیہ السلام (نے کہ بے شک میں اللہ کا بندہ ہوں اس نے مجھے کتاب دی ہے اور نبی بنایا ہے۔

غور فرمائیں کہ اللہ کے فیصلوں پر دل و جان سے راضی ہونا کتنی بڑی خوبی ہے کہ اللہ رب العزت اپنے جلیل القدر انبیاء کے تذکرے میں ان کی اس خوبی کو بطور خاص ذکر فرما رہے ہیں اور صرف یہی نہیں کہ وہ خود ”عبدیت“ کے پیکر بنے بلکہ اپنی اپنی قوموں کو بھی ”عبدیت“ اختیار کرنے کا حکم دیا، چند آیات ملاحظہ فرمائیں:

ترجمہ: ہم نے نوح کو ان کی قوم کے پاس بھیجا چنانچہ انہوں نے کہا کہ اے میری قوم اللہ کی بندگی اختیار کرو۔

ترجمہ: اور قوم عاد کی طرف ان کے بھائی ہود کو بھیجا انہوں نے کہا کہ اے میری قوم اللہ کی بندگی اختیار کرو ۔

ترجمہ: اور قوم ثمود کی طرف ان کے بھائی صالح کو بھیجا انہوں نے کہا کہ اے میری قوم اللہ کی بندگی اختیار کرو۔

ترجمہ: اور مدین کی طرف ان کے بھائی شعیب کو بھیجا انہوں نے کہا کہ اے میری قوم اللہ کی بندگی اختیار کرو۔

ترجمہ: اور ہم نے ابراہیم کو بھیجا جبکہ انہوں نے اپنی قوم سے کہا تھا کہ اللہ کی بندگی اختیار کرو۔

اللہ تعالی نے اپنے بندے کی پیدائش کےلیےاپنے بندے ”عبداللہ“ کے گھر کا انتخاب فرمایااور عرب کے شرک والے معاشرے کو عملی پیغام دیا کہ جھوٹے معبودوں کے عابدو!معبودِ برحق کا ”عبدِبرحق“ آ رہا ہے جو معبودیت وعبودیت کے مابین رشتہ عبادت کا حقیقی معنی اور صحیح مفہوم واضح کرے گا ۔

عبدیت ؛ نبی کریم صلی اللہ علیہ وسلم کی محبوب صفت ہے ۔ ذرا اس کی جھلک دیکھیے ، کلمہ شہادت میں اقرار رسالت سے پہلے اقرار عبدیت کیا جاتا ہے :

ترجمہ: میں گواہی دیتا ہوں کہ اللہ کے علاوہ اور کوئی معبود نہیں اور میں اس بات کی بھی گواہی دیتا ہوں کہ حضرت محمد صلی اللہ علیہ وسلم اللہ کے بندے اور رسول ہیں۔

قرآن حکیم نازل فرماتے وقت اللہ رب العزت نے آپ کو صفت عبدیت سے یاد فرمایا ہے :

ترجمہ: اور اگر تمہیں اس میں شک ہے جو ہم نے اپنے بندے پر نازل فرمایا ہے تو تم اسی جیسی ایک سورۃ بنا کر لاؤ اور اگر تم واقعی سچے ہو تو اللہ کے علاوہ اپنے تمام مددگاروں کو بھی بلا لو ۔

ترجمہ: تمام تعریفیں اس اللہ کی ہیں جس نے اپنے بندے پر کتاب نازل فرمائی اور اس میں کسی طرح کی کوئی خامی نہیں ہے۔

ترجمہ: بہت شان والی ہے وہ ذات جس نے اپنے بندے پر حق و باطل کے درمیان فیصلہ کرنے والی یہ کتاب نازل فرمائی تاکہ وہ دنیا جہان کے لوگوں کو ان کے برے انجام سے ڈرائے ۔

ترجمہ: اللہ وہی تو ہے جو اپنے بندے پر کھلی کھلی نشانیاں نازل فرماتا ہے تاکہ تمہیں اندھیروں سے نکال کر روشنی میں لائے اور بے شک اللہ تم پر بہت شفیق اور بہت ہی مہربان ہے ۔

اللہ رب العزت اپنے محبوب کو سفر اسراء پر لے گئے تب بھی آپ کو صفت عبدیت سے یاد فرمایا :

ترجمہ: وہ ذات پاک ہے جس نے اپنے بندے کو رات کے تھوڑے سے وقت میں مسجد حرام سے مسجد اقصیٰ تک سیر کرائی جس کے اردگرد ہم نے برکتیں نازل کی ہیں تاکہ ہم انہیں اپنی کچھ نشانیاں دکھلائیں بلا شبہ وہ ذات ہر بات کو سننے والی اور ہر چیز کو دیکھنے والی ہے ۔

ترجمہ: حضرت سعد بن ابی وقاص رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: جو شخص اذان سن کر یہ پڑھے:

اس کے گناہ معاف کر دیے جاتے ہیں۔

نماز کے اندر تشہد میں نبی کریم صلی اللہ علیہ وسلم کے تذکرہ رسالت کے ساتھ تذکرہ عبدیت ضروری ہے :

ترجمہ: اور میں گواہی دیتا ہوں کہ حضرت محمد صلی اللہ علیہ وسلم اللہ کے بندے اور رسول ہیں۔

قبر میں سوال کے جواب میں رسول اللہ صلی اللہ علیہ وسلم کی شان عبدیت کی گواہی دینے پڑے گی تب کامیابی ملے گی :

ترجمہ: حضرت ابوہریرہ رضی الله عنہ سے روایت ہے کہ رسول اللہ صلی اللہ علیہ وسلم نے فرمایا: جب میت کو یا پھر یوں فرمایا کہ تم میں سے کسی ایک کو قبر میں دفنا دیا جاتا ہے تو اس کے پاس کالے رنگ کی نیلی آنکھ والے دو فرشتے آتے ہیں، ان میں سے ایک کو منکر اور دوسرے کو نکیر کہا جاتا ہے اور وہ دونوں پوچھتے ہیں: تو اس شخص کے بارے میں کیا کہتا تھا؟ وہ میت کہتی ہے کہ وہی جو وہ خود کہتے تھے کہ وہ اللہ کے بندے اور اللہ کے رسول ہیں، اور میں گواہی دیتا ہوں کہ اللہ کے سوا کوئی سچا معبود نہیں اور محمد صلی اللہ علیہ وسلم اس کے بندے اور رسول ہیں۔

یہاں تک کہ نبی کریم صلی اللہ علیہ وسلم بچوں کے نام رکھنے میں بھی عبدیت کو پسند فرماتے تھے :

ترجمہ: حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: اللہ کے ہاں تمہارے لیے بہترین نام عبداللہ اور عبدالرحمٰن ہیں۔

اللہ تعالیٰ سے دعا ہے کہ ہمیں اپنے بندوں میں داخل فرما کر جنت میں داخل فرمائیں۔ آمین بجاہ النبی الکریم صلی اللہ علیہ وسلم

والسلام

محمدالیاس گھمن

خانقاہ حنفیہ ، مرکز اھل السنۃ والجماعۃ ، سرگودھا

جمعرات، 3 جنوری 2019ء