تکمیل قرآن کریم کی مجالس

اللہ تعالیٰ تکمیل قرآن کریم کی مجالس پر اپنی رحمت نازل فرماتے ہیں۔ خوش نصیب ہیں وہ حفاظ اور قراء کرام جنہوں نے تراویح میں قرآن کریم مکمل کر لیا ہے یا کرنے والے ہیں اور وہ لوگ بھی قابل مبارکباد ہیں جنہوں نے ان کی اقتداء میں قرآن کریم کو مکمل سنا۔

الحمد للہ ثم الحمدللہ! اللہ کریم نے مجھے بھی یہ سعادت نصیب فرمائی کہ آج میرا بیٹا حافظ محمد عبداللہ بہادر تراویح میں قرآن کریم مکمل کر رہا ہے، میری طرح ہر اس باپ کو یہ دلی خوشی اس وقت نصیب ہوتی ہے جب ان کی اولاد قرآن کریم کی تکمیل کرتی ہے۔

قرآن کریم پڑھنے کے بالخصوص حفظ اور باتجوید پڑھنے کے بہت زیادہ فضائل ہیں جو ان شاء اللہ کسی وقت قدرے تفصیل سے ذکر کروں گا، آج تکمیل قرآن کی بابرکت مجلس کے حوالے سے چند باتیں ذکر کی جاتی ہیں۔

ترجمہ: حضرت عرباض بن ساریہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: جو شخص قرآن کریم مکمل کرے )تو اس موقع پر (اس کی دعاء کو قبول کیا جاتا ہے۔

ترجمہ: حضرت ثابت رحمہ اللہ سے روایت ہے کہ صحابی رسول حضرت انس بن مالک رضی اللہ عنہ جب قرآن کریم کی تکمیل فرماتے تو اپنے گھروالوں کو جمع فرماتے پھر ان کے لیے دعاء فرماتے۔

ترجمہ: حضرت حُمید اعرج رحمہ اللہ سے مروی ہے کہ جو شخص قرآن کریم )مکمل( پڑھے اس کے بعد دعا ءکرے تو اس کی دعاء پر چار ہزار فرشتے آمین کہتے ہیں۔

نوٹ: آمین کہنے کا مطلب یہ ہے کہ اے اللہ اس دعاء کو قبول فرما۔

ترجمہ: حضرت ابوقلابہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : جو شخص قرآن کریم کی افتتاح کی مجلس میں حاضر ہوا گویا وہ لشکر اسلام کی فتوحات کے وقت آیااور جو شخص تکمیل قرآن کی مجلس میں حاضر ہوا گویا وہ مال غنیمت کی تقسیم کےوقت حاضر ہوا۔

ترجمہ: حضرت زرارہ بن اوفی رضی اللہ عنہ سے مروی ہے کہ نبی کریم صلی اللہ علیہ وسلم سے پوچھا گیا: نیک اعمال میں سے کون سا عمل سب سے زیادہ فضیلت والا ہے؟ آپ صلی اللہ علیہ وسلم نے فرمایا:حال مرتحل۔ سوال کرنے والے نے پوچھا حال مرتحل کیا ہے؟ تو آپ صلی اللہ علیہ وسلم نے فرمایا: وہ شخص جو قرآن کریم کو اول سے شروع کرے یہاں تک کہ آخر قرآن تک پہنچ جائے تو پھر سے شروع کردے، جب بھی سفر تلاوت ختم کرے پھر سے چل پڑے۔

ترجمہ: حضرت سعد بن ابی وقاص رضی اللہ عنہ سے مروی ہے کہ تکمیل قرآن شروع رات میں ہو تو فرشتے صبح تک قرآن کریم مکمل کرنے والے کے لیے دعائے مغفرت کرتے ہیں اور اگر تکمیل قرآن شروع دن میں ہو تو فرشتے شام تک قرآن کریم مکمل کرنے والے کے لیے دعائے مغفرت کرتے رہتے ہیں۔

ترجمہ: حضرت مجاہد رحمہ اللہ فرماتے ہیں: تکمیل قرآن کریم کے وقت اللہ کی رحمت نازل ہوتی ہے۔

ترجمہ: حضرت سفیان ثوری رحمہ اللہ سے مروی ہے جب کوئی شخص قرآن کریم مکمل کرتا ہے تو فرشتہ اس کی پیشانی کا بوسہ لیتا ہے۔

معلوم ہوا کہ تکمیل قرآن کریم کی مجلس انتہائی بابرکت ہے، اس میں اللہ کی رحمت برستی ہے، اس میں شرکت کریں، اپنے لیے اور تمام عالم اسلام کے لیے دعائیں مانگیں۔ اللہ تعالیٰ اس رمضان کو ہماری مغفرت کا ذریعہ بنائے اور ہمارے لیے جہنم سے آزادی کا فیصلہ فرمائیں۔

یہاں ایک مسئلہ اچھی طرح ذہن نشین فرما لیں کہ تراویح میں قرآن کریم مکمل کرنے کے بعد بقیہ راتوں میں تراویح کو ہرگز نہ چھوڑیں۔ یہ دو الگ الگ سنتیں ہیں، تراویح میں قرآن کریم مکمل کرنا الگ سے سنت ہے اور پورا مہینہ تراویح پڑھنا الگ سے سنت ہے۔ اس لیے ایک سنت کی تکمیل پر دوسری سنت کے تارک نہ بنیں۔

اللہ تعالیٰ ہمیں احکام شریعت پر عمل کرنے کی توفیق عطا فرمائے۔

والسلام

محمد الیاس گھمن

خانقاہ حنفیہ ، مرکز اھل السنۃ والجماعۃ، سرگودھا

جمعرات، 7 جون، 2018ء