نماز اہل السنت والجماعت

ترجمہ حضرت عبد اللہ بن مسعود رضی اللہ عنہ فرماتے ہیں: ’’ رسول اللہ صلی اللہ علیہ وسلم نے نماز پڑھی جس میں کمی یا زیادتی ہوگئی۔ جب سلام پھیرا تو آپ سے عرض کیا گیا یا رسول اللہ !نماز میں کچھ (کمی یا زیادتی) واقع ہوئی ہے؟ آپ صلی اللہ علیہ وسلم نے فرمایا کون سی? صحابہ رضی اللہ عنہ نے عرض کیا آپ نے اس اس طرح نماز پڑھی ہے۔ تو آپ صلی اللہ علیہ وسلم نے اپنے پائوں تہ کئے اور قبلہ کی طرف متوجہ ہوئے ،پھر دو سجدے کئے اور سلام پھیرا۔ پھر آپ صلی اللہ علیہ وسلم ہماری طرف متوجہ ہوئے اور فرمایا: جب تم میں سے کسی کو نماز میں شک ہوتو اسے چاہیے کہ خوب سوچ بچار کرکے صحیح صورت حال کے مطابق نماز مکمل کرے پھر (آخر میں) دو سجدے کر لے۔ ‘‘

ترجمہ: حضرت ابو سعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا جب کوئی نماز پڑھے اور اسے پتا نہ چلے کہ کم پڑھی ہے یا زیادہ، تو اسے چاہئے کہ (آخری تشہد) بیٹھنے کی حالت میں دو سجدے کرلے۔

ترجمہ: حضرت عبداللہ بن مسعود رضی اللہ عنہ سے روایت ہے کہ ایک بار رسول اللہ صلی اللہ علیہ وسلم نے ظہر کی پانچ رکعات پڑھائیں۔ تو آپ سے کہا گیا کہ کیا نماز میں اضافہ ہو گیا ہے ؟ آپ صلی اللہ علیہ وسلم نے فرمایا کیسے؟ کہا گیا کہ آپ نے پانچ رکعتیں پڑھی ہیں۔ تو آپ صلی اللہ علیہ وسلم نے سلام کے بعد دو سجدے کئے۔

ترجمہ: حضرت ثوبان رضی اللہ عنہ فرماتے ہیں کہ میں نے رسول اللہ صلی اللہ علیہ وسلم سے سنا کہ ہر سہو میں دو سجدے ہیں سلام کے بعد۔

ترجمہ: حضرت عمران بن حصین رضی اللہ عنہ فرماتے ہیں :’’ رسول اللہ صلی اللہ علیہ وسلم نے ایک بار عصر کی تین رکعتیں پڑھائیں (جب آپ کو کہا گیا) تو جو رکعت رہ گئی تھی وہ پڑھی پھر سلام کیا پھر سہو کے دو سجدے کئے پھر آخر میں سلام پھیرا۔ ‘‘

ترجمہ: حضرت حسن سے روایت ہے کہ نبی اکرم صلی اللہ علیہ وسلم ، حضرت ابو بکر رضی اللہ عنہ اور حضرت عمر رضی اللہ عنہ ایک سلام پھیرتے تھے۔

ترجمہ: حضرت ابو عبیدہ بن عبدا للہ اپنے باپ سے روایت کرتے ہیں :

’’ رسول اللہ صلی اللہ علیہ وسلم نے فرمایا جب تم نماز میں ہو او رشک پڑ جائے کہ تین رکعت پڑھی ہیں یا چار اور زیادہ گمان یہ ہو کہ چار ہی پڑھی ہیں تو تشہد پڑھو پھر دو سجدے کرو سلام سے پہلے بعد میں بھی تشہد پڑھو پھر سلام پھیرو۔‘‘

امام ابوداؤدرحمۃ اللہ علیہ محدثین کے امام ہیں۔صحاح ستہ میں شامل ان کی سنن ان کے زندہ وجاوید ہونے کے لیے کافی ہے ،ایک بار وہ کشتی میں سفر کررہے تھے ،دریا کے کنارے ایک آدمی کو چھینکنے کے بعد"الحمدللہ"کہتے ہوئے سنا۔چھینکنے والا"الحمدللہ "کہے تو جواب میں"یرحمک اللہ "کہنا سنت بھی ہے اورمسلمان بھائی کا حق بھی،امام کی کشتی آگے نکل گئی۔ آپ نے ایک دوسری چھوٹی کشتی ایک درہم کے عوض کرایہ پر لی،چھینکنے والے کے پاس آئے اور انہیں "یرحمک اللہ"کہا۔ اس نے جواب میں"یھدیکم اللہ "(اللہ آپ ہدایت دے)کہا،امام واپس اپنی کشتی پر آگئے،ساتھیوں نے ان سے اس تکلف کی وجہ پوچھی تو فرمانے لگے کہ "مجھے خیال ہوا کہ ہوسکتا ہے یہ آدمی مستجاب الدعوات ہو،اللہ کے ہاں اس کی دعا قبول ہوتی ہو،میرے "یرحمک اللہ "کہنے کے جواب میں وہ"یھدیکم اللہ"کہے گا۔توبہت ممکن ہے اس کی یہ دعا میرے حق میں قبول ہوجائے اس لیے میں کشتی لے کر اس کے پاس گیا۔کہتے ہیں کہ جب سفر کرتے ہوئے رات کو کشتی کے مسافر سوگئے تو سب نے یہ ہاتف غیبی سنی کہ آواز آرہی ہے"کشتی والو:ابوداؤد نے ایک درہم کے عوض اللہ سے جنت خرید لی ہے۔"