اسلام………امن کا علمبردار
مولانا محمد اشفاق ندیم
یہ ایک واضح حقیقت ہے کہ جب بھی کوئی داعی حق کھڑا ہوا تو اس کی مخالفت کرنےمیں سرمایہ دار اور بااقتدار لوگ پیش پیش رہے ہیں،حق کی مخالفت کرتے رہے اور ہمیشہ اہل حق کے استیصال کی کوشش کی ،مگر وہ جماعت قدسیہ داعی حق پیکر امن وامان اور غریبوں کے سہارا ان ظالموں کے ظلم و ستم اور جبر و تشدد کو برداشت کر کے بھی بھولے بھٹکے اور گمراہوں اور نا شناسانِ خدا کو خدا سے ملانے کے لیے کوشاں رہے ان کے رات دن انہیں کی فکر میں کٹتے رہے مگر ان کا مخالف طبقہ خدا اور اس کے رسولوں کے باغی بن کر شقاوت و بدبختی کی وادیوں میں بھٹکتے رہے اور یہی لوگ تھے جوغریبوں کا گلہ دباتے رہے اور ان کا خون چوستے رہے ان کی حق تلفی کرتے رہے غریب بے چارے ان کے ظلم کی چکی میں پستے رہے۔ لیکن جو بھی اللہ کی طرف سے داعی حق بن کر آیا اس نے غریبوں کو ان کے حقوق دلانے کی پوری کوشش کی ، سرمایہ داروں کے پنجے سے اور ان کے ظلم وستم سے نجات دلانے کی کوشش کی چونکہ سرمایہ دار خوب سمجھتے ہیں کہ یہی وہ دین اور مذہب ہے جو ہماری من مانی پر پانی پھیر دے گااور امیر و غریب کو ایک صف میں لا کر کھڑا کر دے گا، حاکم و محکوم آقا و غلام، مالک و مملوک سب کے لیے ایک ہی قانون پیش کر کے ان کی قانونی حیثیت یکساں کردے گا ۔غریبوں پر ان کے دست درازیاں ختم ہوجائیں گی ،وہ جانتے تھے کہ یہی وہ قانونِ خداوندی ہے کہ اگر ایک وقت میں غریب کو حاکم کے سامنے آنے پر مجبور کرتا ہے تو امیر بھی اس سے مستثنیٰ نہیں ہوسکتا، اگر غلام دربار میں مجرم بن کر سزا پاتا ہے تو آقا کو بھی معاف نہیں کرتا اگر عدالت میں محکوم کو گھٹنے ٹیک کر بیٹھنا پڑتا ہےتو حاکم بھی اس کی نظر میں اسی سلوک کا مستحق ٹھہرتا ہے ، اس لیے سرمایہ داروں نے سرمایہ داری اور با اقتدار طبقہ نے اپنے اقتدر کو باقی رکھنے کے لیے ہمیشہ اہل حق کی مخالفت کی ہے اور غریب پر برابر ظلم کرتے رہے۔ ہمیشہ اہل حق ہی غریبوں کا سہارا بنتے رہے اور ان کو ظالموں اور خونخوار درندوں کے ظلم سے نجات دلاتے رہے،چونکہ غریب بھی اس حقیقت کو جانتے تھے کہ ان کے دکھوں کا مداوا اگر کوئی ہے تو وہ یہی ”قانونِ خداوندی“ ہے۔ دنیا کے مظلوموں کو ان کے حقوق دلانے والاقانون ”اسلام“ہے۔ اگر ان کے حقوق کی حق تلفی کرنے والوں کو چیلنج کرتا ہے ان کو تہہ وبالا کردیتا ہے ان کو کچل دیتا ہے اوران کو جھنجوڑتا ہے تو وہ یہی قانونِ الہٰی ہے، غریب ہمیشہ اس میں اپنی نجات سمجھتے رہے۔ چنانچہ تاریخ گواہ ہے کہ سب سے پہلے اور سب سے زیادہ ان حق کے داعیوں کی صدا پر لبیک کہنے والے یہی غریب لوگ تھے اور مخالفت کرنے والے سرمایہ دار اور بااقتدار لوگ تھے۔ قرآن کریم نے تاریخ کے اس وسیع حصے کو محفوظ کر رکھا ہے آپ کسی بھی برحق پیغمبر کا واقعہ اٹھا کر دیکھ لیں انبیاء کرام علیہم السلام نے آکر دعوت دی تو مخالفت کرنے والے یہی سرمایہ دار اور بااقتدر لوگ تھے، اور جب آقا نامدار صلی اللہ علیہ وسلم تشریف لائے تو اس وقت بھی غریب اور غلام؛امیراور آقا کی ظلم کی چکی میں پس رہے تھے، ان کی حق تلفی ہو رہی تھی اور ان کے حقوق دبائے جارہے تھے امیروں نے ان کا خون خشک کر رکھا تھا اور وہ امیروں کے ظلم و ستم جبر تشدد کا نشانہ بنے ہوئے تھے بلکہ غلاموں اور غریبوں پر ظلم کرنا اپنا مشغلہ سمجھتے تھے، چند امراء جمع ہوجاتے اور سامنے غلام کو کھڑا کر کے نیزہ مارتے جب اس کو نیزہ لگتا وہ مچھلی کی طرح تڑپتا تو یہ ظالم ہنستے اور اپنا دل بہلاتے اور خوش ہوتے یہ ان کا تفریحی مشغلہ تھا۔ اب دیکھنا یہ ہے کہ آپ علیہ السلام نے آکر ان دو طبقوں میں سے کس کا ساتھ دیا اور اسلام کے آنے کے بعد ان میں سے کون سا طبقہ تھا جو محفوظ ہوگیا؟ تاریخ گواہ ہے کہ آپ علیہ السلام نے غریبوں کا ساتھ دیا غریبوں جیسے بن کے رہے اور اپنی اولاد کو غریبوں کے ساتھ ملایا اور پھر جب خطوط کے ذریعے سے بادشاہوں کو دعوت اسلام دینا شرع کی تو آپ نے قیصر روم کو جس کا نام ہِرَقْل تھا اس کو بھی دعوت نامہ بھیجا۔ اسلم تسلم اسلام لے آ، بچ جائے گا، دنیا و آخرت کی بھلائی اس میں ہے یوتیک اللہ اجرک مرتین، (دوہرا اجر ملے گا اپنے ایمان لانے کا اور عوام کے ایمان لانے کا) اور اگر تم نے رو گردانی کی اسلام نہ لایا تو یاد رکھو کہ تیرے اوپر دگنا بوجھ ہوگا تیرا بھی اور تیری رعایا کا بھی۔ آج کےدور میں تو مورخین بھی یہ بات ماننے پر مجبور ہوگے کہ اگر کوئی نجات کا ذریعہ ہے تو وہ اسلام ہی ہے۔ چنانچہ” لالہ لاجپت رائے“لکھتا ہے: میں مذہب اسلام سے انس رکھتا ہوں۔ گاندھی جی کا یہ قول بھی دیکھ لیجیے : اسلام کا مطالعہ کرنے والا اس کا قائل ہوجائے گا۔ جاج بربورڈ شاہ رقم طراز ہیں : مستقبل اسلام کا ہے، آنے والے سو سال میں ہماری دنیا کا مذہب اسلام ہوگا مگر یہ موجودہ زمانے کا اسلام نہ ہوگا بلکہ وہ اسلام ہوگا جو محمد صلی اللہ علیہ وسلم کے زمانہ میں لوگوں کے دلوں دماغوں اور روحوں میں جاگزیں تھا۔ برگرونج تحریر کرتے ہیں :اسلام قابل فخر مذہب ہے۔ فادرولیم اعتراف کرتے ہیں : اسلام امن کا مذہب ہے۔