باہمی ہمدردی کی ضرورت

اللہ تعالیٰ نے ایمان والوں کو باہمی طور پر جس طرح رہنے کی تاکید فرمائی ہے اگر ہم اسی پر عمل کریں تو ہماری ساری مشکلات اور پریشانیاں حل ہو جائیں۔

ترجمہ: ایمان والے مرد و خواتین آپس میں ایک دوسرے کے مددگار ہیں ۔

ترجمہ: اس میں کوئی دوسری رائے ہو ہی نہیں سکتی کہ تمام ایمان والے آپس میں بھائی بھائی ہیں ۔

ترجمہ: حضرت ابو موسیٰ رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: بے شک ایک مومن دوسرے مومن کےلیے ایک عمارت کی مانند ہے کہ اس عمارت کا ہر حصہ دوسرے حصے کے لیے سہارا ہوتا ہے ۔

ترجمہ: حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ایک مسلمان دوسرے مسلمان کا بھائی ہے نہ تو یہ اُس پر ظلم و زیادتی کرتا ہے ، نہ اس کو مشکل وقت میں تنہا چھوڑتا ہے ، اور جو شخص اپنے بھائی کی ضرورت پوری کرنے میں مشغول رہتا ہے اللہ تعالیٰ اس کی ضروریات کو پورا فرما دیتے ہیں ، جو شخص )دنیا میں (کسی مسلمان کی مصیبت و پریشانی کو دور کرتا ہے اللہ تعالیٰ قیامت والے دن اس کی پریشانیوں میں سے بڑی پریشانی کو دور فرما دیں گے ۔ اور جو شخص اپنے کسی مسلمان بھائی کا عیب چھپاتا ہے اللہ تعالیٰ قیامت والے دن اس کے عیب چھپا لیں گے۔

ترجمہ: حضرت نعمان بن بشیر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: باہمی محبت ، مہربانی اور ہمدردی کے لحاظ سے ایمان والوں کی مثال ایک جسم کی مانند ہے جب اس جسم کے کسی عضو )حصے(میں تکلیف ہوتی ہے تو اس کی وجہ سے پورا جسم بے آرامی اور بخار )تکلیف (میں مبتلا ہوجاتا ہے۔

مذکورہ بالا آیات واحادیث سے یہ بات بالکل واضح ہو جاتی ہے کہ دین اسلام میں باہمی ہمدردی ، مہربانی اور جذبہ اتحاد کی بڑی اہمیت ہے ۔ خصوصاً ایسے حالات میں کہ جب ہر طرف پریشانی دکھائی دے رہی ہو ۔

اس وقت پوری دنیا میں کرونا وائرس کی وجہ سے ایک پریشان کُن صورتحال ہے۔ لوگوں کا کاروبار زندگی ٹھپ ہو کر رہ گیا ہے۔ ہمارے مومن بھائی بہن سخت آزمائش اور پریشانی میں مبتلا ہیں۔ یہ وقت ایک دوسرے کے کام آنے کا ہے، آپس میں ہمدردی اور خیرخواہی کا ہے ۔ اللہ کریم نے جن بھائیوں اور بہنوں کو مالی وسعت عطا فرمائی ہے اس موقع پر انہیں چاہیے کہ وہ بڑھ چڑھ کر پریشان حال لوگوں کے ساتھ مہربانی والا برتاؤ کریں۔

اللہ کریم ہمیں اچھے اوصاف اپنانے اور برے اوصاف سے بچنے کی توفیق عطا فرمائے اور اس وبا کو ہم سے دور فرمائے۔

والسلام

محمدالیاس گھمن

جمعرات ،16 اپریل ،2020ء