امام عامر بن شراحیل الشعبی رحمہ اللہ

نام عامر بن شراحیل، کنیت ابوعمر، لقب شعبی۔ آپ قبیلہ ہمدان سے تعلق رکھتے ہیں۔ [تذکرۃ الحفاظ ج1ص81،سیر اعلام النبلاء ج4ص482]

حضرت عمر فاروق رضی اللہ عنہ کے دور خلافت میں مرکز علم کوفہ میں ہوئی۔

آپ رحمہ اللہ صحابہ کرام رضی اللہ عنہم کی کثیر تعداد کی زیارت سے مشرف ہوئے۔ فرماتے ہیں۔

کہ میں نے پانچ سو صحابہ رضی اللہ عنہم کو پایا یعنی ان سے ملاقات کی۔

امام شعبی رحمہ اللہ کی پیدائش اور پرورش ایسے دور اور شہر میں ہوئی جہاں نبی اکرم صلی اللہ علیہ وسلم کے تربیت یافتہ صحابہ کرام رضی اللہ عنہم کی کثیرتعداد موجود تھی۔شہر کوفہ کئی صحابہ رضی اللہ عنہم کا مسکن تھا۔ چنانچہ آپ رحمہ اللہ اس موقع کو غنیمت جانتے ہوئے اپنی علمی پیاس بجھانے کے لیے علوم نبوی کی بحر بیکراں شخصیات اور نفوس سے تحصیل علم میں مصروف ہوگئے، آخر کار ان جبال علم کے علوم نے آپ کو امام العصر اور علامۃ التابعین بنا دیا۔

آپ رحمہ اللہ علمی اعتبار سے اپنےزمانے کے امام اور علامہ تھے۔ جملہ علوم میں یکساں کمال حاصل تھا۔ چنانچہ امام ابواسحاق الحبال فرماتے ہیں کہ شعبی جملہ علوم میں یگانہ عصر تھے۔

قرآن وحدیث ،فقہ ومغازی،ریاضی وادب اور شاعری میں انہیں یکساں دسترس حاصل تھی۔

آپ رحمہ اللہ احادیث نبوی کے جلیل القدر حافظ ہی نہیں بلکہ امام العصر تھے۔اللہ تعالیٰ نے آپ کو بہت بڑی سعادت اور نعمت یہ عطافرمائی کہ شرف تابعیت کے ساتھ ساتھ حضرات صحابہ کرام رضی اللہ عنہم کی شاگردی سے بھی مالا مال فرما دیا۔ جن نفوس قدسیہ سے آپ نے روایت حدیث کی ،ان میں سے چند ایک حضرات کے اسماء گرامی یہ ہیں:

سیدنا علی المرتضیٰ رضی اللہ عنہ

سیدنا سعد بن ابی وقاص رضی اللہ عنہ

سیدنا ابوہریرہ رضی اللہ عنہ

سیدنا عبداللہ بن عمر رضی اللہ عنہما

سیدنا عبداللہ بن عباس رضی اللہ عنہما

سیدنا عبداللہ بن عمرو رضی اللہ عنہ

سیدنا جابر بن عبداللہ رضی اللہ عنہ

سیدنا انس بن مالک رضی اللہ عنہ

سیدنا ابوموسیٰ الاشعری رضی اللہ عنہ

ام المومنین سیدہ عائشہ صدیقہ رضی اللہ عنہا

امام ابوالحسن مدینی رحمہ اللہ نے اپنی کتاب (الحکمۃ)میں بیان کیا ہےکہ کسی نے امام شعبی رحمہ اللہ سے پوچھا کہ آپ نے اتنا وسیع علم کیسے حاصل کیا ؟فرمایا ۔

اپنے موجودہ علم پہ بےاعتمادی، گدھوں کی طاقت برداشت کرنے ،جمادات کی طرح صبر اور کوے کی طرح گھر سے سویرے نکلنے کی بدولت حاصل ہوا ہے۔

آپ کا اپنا بیان ہے۔

کہ میں نے بیس سال کے عرصہ میں کسی سے کوئی ایسی نئی حدیث نہیں سنی کہ اس سے بیان کرنے والے سے زیادہ واقف نہ رہا ہوں۔

علامہ شعبی کی مرسل روایت کس درجے کی ہے؟ اس کے متعلق علامہ ذہبی رحمہ اللہ امام احمد بن عبداللہ العجلی کا فرمان نقل کرتے ہوئے لکھتے ہیں کہ علامہ شعبی کی مرسل احادیث صحیح ہوتی ہیں، آپ صحیح کے علاوہ کسی حدیث مرسل کو بیان نہیں کرتے ہیں۔

امام ابوداؤد رحمہ اللہ فرماتے ہیں کہ مجھے امام نخعی کی مراسیل سے امام شعبی کی مراسیل زیادہ پسند ہیں۔

امام مکحول رحمہ اللہ فرماتے ہیں۔

کہ میں نے امام شعبی رحمہ اللہ سے زیادہ جاننے والا نہیں دیکھا۔

امام ابن عیینہ رحمہ اللہ فرماتے ہیں:

کہ کامل عالم تین ہیں؛ حضرت عبداللہ بن عباس رضی اللہ عنہما اپنے زمانے میں،امام شعبی رحمہ اللہ اپنے زمانے میں اور امام سفیان ثوری رحمہ اللہ اپنے زمانے میں۔

امام عاصم بن سلیمان فرماتے ہیں۔

کہ میں نے کوفہ،بصرہ اور حجاز کے مرکزوں کے محدثین کی احادیث کا جاننے والا ان سے بڑا عالم کوئی نہیں دیکھا۔

امام ابن ابی لیلیٰ امام شعبی اور ابراہیم نخعی کا ذکر کرتے ہوئے فرماتے ہیں۔

کہ امام شعبی محدث ہیں اور ابراہیم نخعی مجتہد ہیں۔

امام صلت بن بہرام کہتے ہیں کہ میں کوئی ایسا آدمی نہیں جانتا جو شعبی جتنا وسیع علم رکھتاہو۔

امام عاصم احول کہتے ہیں: شعبی حسن بصری سے علم حدیث زیادہ رکھتے تھے۔

امام زہری رحمہ اللہ فرماتے ہیں کہ اس دور کے علماء چار ہیں:مدینہ میں سعید بن مسیب،کوفہ میں عامر بن شراحیل شعبی،بصرہ میں حسن بصری اور شام میں مکحول۔

آپ رحمہ اللہ کو جس قدر تحصیل علم کا شوق تھا اس قدر اللہ تعالیٰ نے آپ کو حافظہ بھی عطا فرمایا تھا، کیونکہ اللہ تعالیٰ جس سے جتنا بڑا اور عظمت والا کام لینا چاہتے ہیں اتنی استعداد وصلاحیت سے بھی مالا مال کردیتے ہیں۔چونکہ آپ سے علم حدیث کا کام لینا تھا تو آپ کو بھی بہت ساری صلاحیتوں اور انعامات سے نوازا ،خصوصاً قوت حافظہ سے۔ چنانچہ آپ کا اپنا بیان ہے۔

کہ میں نے آج تک کاغذ پر کچھ نہیں لکھا، جب کوئی شخص مجھے کوئی حدیث سناتا تو مجھے حفظ ہوجاتی تھی،مجھے کبھی ضرورت محسوس نہیں ہو ئی کہ وہ اسے میرے سامنے دوبارہ پڑھے۔

آپ رحمہ اللہ قوتِ حافظہ اور وسعتِ علم کے باوجود روایت حدیث میں بڑے محتاط تھے اور زیادہ روایت کرنا پسند نہیں کرتے تھے۔ امام مجالد علامہ شعبی سے بیان نقل کرتے ہیں کہ آپ نے فرمایا: صلحائے امت زیادہ احادیث بیان کرنے کو پسند نہیں کرتے تھے۔

آپ رحمہ اللہ اتنے محتاط ہونے کے باوجود روایت بالمعنیٰ کو خلاف احتیاط نہیں سمجھتے تھے۔ چنانچہ امام ابن عون رحمہ اللہ فرماتے ہیں کہ علامہ شعبی حدیثیں بالمعنیٰ روایت کرتے تھے۔(یعنی الفاظ کی پابندی ضروری نہیں سمجھتے تھے)

علامہ کو اللہ تعالیٰ نے علمی اعتبار سے بہت بلند مقام عطا فرمایا تھا۔ آپ کا حلقہ درس صحابہ کرام رضی اللہ عنہم کی موجودگی میں قائم ہوگیا تھا۔ امام ابن سیرین رحمہ اللہ کا بیان ہے۔

کہ میں جس زمانے میں کوفہ آیا، اس وقت امام شعبی کا بہت بڑا حلقہ درس قائم تھا، حالانکہ اس وقت صحابہ رضی اللہ عنہم کی بہت بڑی تعداد موجودتھی۔

علم حدیث کے علاوہ دوسرے علوم پر بھی امام شعبی کو دسترس حاصل تھی۔قرآن مجید کے اتنے زبردست قاری تھے کہ ”زعیم القراء“ کہلاتے تھے۔

آپ رحمہ اللہ کو اگرچہ جملہ علوم وفنون میں بلند مقام حاصل تھا لیکن فقہ میں ایک امتیازی شان رکھتے تھے۔ چنانچہ امام ابومجلز فرماتے ہیں کہ میں نے شعبی سے بڑا فقیہ کوئی نہیں دیکھا،سعید بن مسیب،طاؤس،عطاء،حسن بصری اور محمد بن سیرین بھی ان کے مقابلہ کے نہیں تھے۔

امام ابو حصین کہتے ہیں میں نے امام شعبی سے بڑھ کر کوئی فقیہ نہیں دیکھا۔

آپ کا فقہی کمال اتنا مسلم تھا کہ صحابہ کرام رضی اللہ عنہم جو علوم نبوی کے حقیقی وارث تھے ،کی موجودگی میں مسند افتاء پر بیٹھ گئے تھے۔چنانچہ امام ابوبکر الہذلی رحمہ اللہ فرماتے ہیں کہ مجھے امام ابن سیرین رحمہ اللہ نے فرمایا:

امام شعبی رحمہ اللہ کے دامن سے وابستہ رہو،میں نے دیکھا کہ وہ صحابہ کرام کی کثیر تعداد کی موجودگی میں فتویٰ دیتے تھے۔

آپ رحمہ اللہ دوسرے علوم کی طرح مغازی[جنگ کے حالات]کے بھی ممتاز عالم تھے۔ عبدالملک بن عمیر سیدنا عبداللہ بن عمر رضی اللہ عنہما کے متعلق فرماتے ہیں۔

کہ ایک مرتبہ امام شعبی مغاز(یعنی حضور اکرم صلی اللہ علیہ وسلم اور صحابہ کرام کے جنگی کارنامے) بیان کر رہے تھے ،ادھر سے حضرت عبداللہ بن عمر رضی اللہ عنہما کا گزر ہوا تو انہوں نے سن کر فرمایا: میں ان لوگوں کے ساتھ خود جنگوں میں شریک رہا ہوں، لیکن یہ(شعبی)ان واقعات کو مجھ سے بہتر جانتے ہیں۔

آپ رحمہ اللہ شعر وشاعری میں بھی کسی سے پیچھے نہیں تھے۔ شعرائے قدیم کے ہزاروں اشعار یاد تھے۔ ان کا اپنا دعویٰ تھا کہ میں نے سب سے کم شعر وشاعری کا علم حاصل کیا لیکن پھر بھی اگر میں چاہوں تو مسلسل ایک مہینہ تک اشعار سنا سکتاہوں اور کوئی شعر مکرر نہ ہونے پائے گا۔

آپ رحمہ اللہ کے تلامذہ کی فہرست کافی طویل ہے۔ چند ایک کے اسماء گرامی پیش خدمت ہیں:

امام مکحول شامی،عطاء بن سائب،ابن ابی لیلیٰ،اعمش ،امام ابوحنیفہ نعمان بن ثابت رحمہ اللہ وغیرہ

آپ رحمہ اللہ کی وفات کے متعلق مختلف اقوال ہیں۔

۱: 109ھ، ۲: 106ھ، ۳: 103ھ

۴: 104ھ۔

جب علامہ شعبی کے دنیا فانی کو چھوڑنے کی افسوسناک خبر حضرت حسن بصری رحمہ اللہ کو پہنچی تو ان کی زبان پر یہ کلمات جاری ہوگئے:

آپ بڑےعلم والے تھے اور اسلام میں عظیم مقام پر فائز تھے۔