امام سلیمان بن مہران الاعمش رحمہ اللہ

امام ابو لحسن المدائنی سے منقول ہے کہ ایک شخص نے امام سے کہا:

اے ابو محمد! میں نصف درہم میں ایک گدھا کرایہ کر کے تمہارے پاس آیا ہوں تاکہ فلاں فلاں حدیث کے بارے میں تم سے کچھ سوال کروں!

آنے والے اس شخص نے علم حدیث کو ایک ایسی سستی چیز بتایا کہ اس پر نصف درہم کے خرچ کرنے کو خاصی اہمیت کے ساتھ ذکر کیا۔ حدیث نبوی علی صاحبہا الصلاۃ و السلام کے ساتھ ایسا رویہ رکھنے اور اس کے لیے مال خرچ کرنے کو جب اس شخص نے اس طرزِ عمل سے جتلایا تو اس کا سدِ باب کرنے اور اس شخص کو متنبہ کرنے کو امام نے انتہائی ضروری سمجھا۔ اس لیے اس آنے والے سے مخاطب ہو کر فرمایا:

بقیہ نصف درہم پر پھر گدھا کرایہ پر لے کر واپس لوٹ جاؤ۔

ایک بار امام کے پاس کچھ ایسے لوگ حدیث کا سماع کرنے کے لیے آئے جن کے بارے میں امام کی فراست ایمانی اور دور اندیشی نے پہچان لیا کہ یہ علمِ حدیث کے اہل نہیں ہیں بلکہ حدیث کے نام پر اپنی خواہشات کی تکمیل کے درپے ہیں۔ چنانچہ آپ نے حدیث سنانے سے انکار کر دیا۔ کسی شخص نے کہا:

اے ابو محمد!اگر آپ ان مسکینوں کو حدیث سنا دیتے تو بہت ہی اچھا ہوتا۔

امام کی غیرت ایمانی نے جوش مارا اور آپ نے اس شخص کوفرمایا:

تیرے لیے ہلاک ہو! خنزیر کے گلے میں موتی کون لٹکاتا ہے؟!

یعنی نا اہل کو قیمتی چیز سپرد نہیں کی جاتی۔

حدیث رسول اللہ صلی اللہ علیہ وسلم کے مایہ ناز قدر دان، عبادت و ریاضت کے عظیم پیکر، علم و عمل کو اپنا اوڑھنا بچھونا بنانے والے انسان، فقر و عسرت کے باوجود دامنِ حدیث سے وابستہ یہ شخصیت شیخ الاسلام امام سلیمان بن مہران الاعمش رحمہ اللہ تھے۔ ”قال رسول اللہ صلی اللہ علیہ و سلم“ کے زمزموں سے آپ کی مجلس کشتِ زعفران بنی رہتی تھی۔ حدیث پیغمبر صلی اللہ علیہ و سلم کا تحفظ اور نشر واشاعت آپ کی زندگی کا مقصد بن چکا تھا۔

آپ کا نام ”سلیمان بن مہران“، کنیت ”ابو محمد“ اور لقب ”اعمش“ ہے۔

امام اعمش کو ”الکاہلی الاسدی“ بھی کہا جاتا ہے۔ چونکہ آپ بنو کاہل کے آزاد کردہ غلام تھے، اس لیے ”الکاہلی“ مشہور ہوئے۔

”الکاہل“ سے مراد کاہل بن اسد بن خزیمہ ہے، اس کی طرف نسبت کی وجہ سے آپ کو ”اسدی“ بھی کہا جاتا ہے۔

آپ کے والد ”مہران“ دیلم کے کسی معرکہ میں گرفتار ہوئے تھے۔ والد کی غلامانہ زندگی کا اثر آپ پر بھی رہا اس لیے آپ بھی بچپن میں غلامانہ زندگی سے دو چار رہے۔

ایک روایت میں آتا ہے کہ بچپن میں آپ غلامی کی زندگی گزار رہے تھے کہ کوفہ کے بنی کاہل کے ایک شخص نے آپ کو خریدااور خرید کر آزاد کر دیا۔

بہرحال اتنی بات یقینی ہے کہ اعمش ابتداء میں غلام تھے اوراسی غلامی کی نسبت سے آپ ”الکاہلی الاسدی“ کہلائے۔

آپ کا لقب ”اعمش“ ہے اور اسی لقب سے آپ زیادہ مشہور ہیں۔ ”اعمش“ کا مطلب ہے ”کمزور بینائی والا“، آپ کو اعمش اس لیے کہا جاتا ہے کہ آپ کی بینائی کمزور تھی۔

آپ کی ولادت 61ھ میں ہوئی۔ امام وکیع بن جراح فرماتے ہیں:

کہ امام اعمش حضرت حسین بن علی بن ابی طالب رضی اللہ عنہما کی شہادت والے دن یعنی ماہ محرم میں یوم عاشورہ کے دن سن 60 ہجری میں پیدا ہوئے۔

ممکن ہے یہاں سہوِ کاتب ہوا ہو اور سن 61 کے بجائے سن60 لکھا گیا ہو، اس لیے کہ حضرت حسین بن علی رضی اللہ عنہما کی شہادت سن61ھ کو ہوئی تھی، یہی وجہ ہے کہ امام ابو اسحاق ذہلی فرماتے ہیں:

کہ عمر بن عبد العزیز، ہشام بن عروہ، زہری، قتادہ اور اعمش حضرت حسین بن علی رضی اللہ عنہما کی شہادت والے دن پیدا ہوئے اور آپ کی شہادت 61 ہجری کو ہوئی۔

یہی بات امام عجلی اور امام ابن حبان نے بھی ذکر کی ہے کہ آپ کی ولادت 61ھ میں ہوئی۔

اصلاً آپ کا تعلق ”دباوند“ سے تھا۔

یاقوت حموی نے ”دباوند“ کے متعلق لکھا ہے:

”دباوند“ یہ رئے کے نواح میں ایک پہاڑ کا نام ہے۔

بعض حضرات کا کہنا ہے کہ آپ اپنی والدہ کے گاؤں طبرستان کے علاقے میں پیدا ہوئے پھر بچپن میں ہی آپ کو کوفہ لے آیا گیا۔ اسی وجہ سے آپ کو ”الكوفی“ کی نسبت سے بھی جانا جاتا ہے۔

امام اعمش نے تحصیل علم میں جس محنت کو اپنا اوڑھنا بچھونا بنایا تھا اس کے نتیجہ میں آپ کندن بن گئے تھے، آسمان دنیا نے دیکھا کہ زبانِ خلق نے آپ کو ”محدث الكوفة“ کے لقب سے نوازا۔

سلاطین علم و فن آپ کی تعریف میں رطب اللسان نظر آئے۔ چند حضرات کی آراء درج ذیل ہیں:

[۱]: امام شعبہ بن الحجاج (ت160ھ) فرمایا کرتے تھے:

کہ حدیث میں مجھ کو جو تشفی اعمش سے ہوئی وہ کسی اور سے نہیں ہوئی۔

[۲]: سہل بن حلیمہ کہتے ہیں کہ امام سفیان بن عیینہ (ت198 ھ) نے فرمایا:

کہ امام اعمش نے اپنے دوستوں کو چار چیزوں میں پیچھے چھوڑ دیا ہے: پہلی کہ وہ ان میں قرآن کے سب سے بڑے قاری تھے، دوسری یہ کہ وہ ان میں حدیث کے سب سے بڑے حافظ تھے،تیسری یہ کہ وہ فرائض (علمِ میراث) کو ان میں سب سے زیادہ جانتے تھے۔ راوی (سہل بن حلیمہ) کہتے ہیں کہ چوتھی چیز جو سفیان بن عیینہ نے کہی تھی میں بھول گیا ہوں۔

[۳]: امام احمد بن حنبل (ت241ھ) سے پوچھا گیا: ابو حصین اور اعمش میں سے کون بڑا ہے؟ آپ نے فرمایا:

کہ ابو حصین عمر میں اعمش سے بڑے ہیں، لیکن اعمش مجھے زیادہ محبوب ہیں اس لیے کہ اعمش، ابو حصین کی بنسبت علم اورقرآن کے زیادہ عالم تھے۔ ابو حصین بھی بنی اسد سے تعلق رکھتے تھے اور صالح شیخ تھے۔

علم حدیث اوراس کے متعلقہ فنون میں آپ کو خاص ملکہ حاصل تھا،ہزاروں حدیثیں سند متن سمیت آپ کے دماغ میں محفوظ تھیں۔ احادیث کے یاد رکھنے اور محدثین کے سامنے زانوئے تلمذ تہ کرنے کی برکت تھی کہ حضرت ابن مسعود رضی اللہ عنہ کی روایات کے بڑے عالم آپ ہی ٹھہرے۔ حضرت عبد اللہ بن مسعود رضی اللہ عنہ کی احادیث میں کمال یوں حاصل کیا کہ امام قاسم بن عبد الرحمن (ت120ھ) جو آپ کے استاذ اور حضرت ابن مسعود رضی اللہ عنہ کے پوتے تھے فرمایا کرتے تھے:

کہ کوفہ میں سلیمان الاعمش سے زیادہ حضرت ابن مسعود کی حدیث کا کوئی عالم نہیں۔

امام اعمش اس کمالِ حفظ کا تذکرہ ان الفاظ میں یوں فرمایا کرتے تھے:

کہ جب میں اور ابو اسحاق جمع ہوتے تو ہم حضرت عبد اللہ بن مسعود رضی اللہ عنہ کی احادیث کو محفوظ کیا کرتے تھے۔

امام اعمش کی حضرت انس رضی اللہ عنہ سے ملاقات کا تذکرہ تو ان شاء اللہ ”شرفِ تابعیت“ کے عنوان کے تحت آئے گا لیکن یہاں اتنی بات کرنا ضروری معلوم ہوتا ہے کہ آپ رحمہ اللہ کا حضرت انس رضی اللہ عنہ کی زیارت کرنا تو محدثین کے ہاں ایک مسلَّم امر ہے، روایت لی ہے یا نہیں؟ اس بارے میں آراء میں کچھ اختلاف نظر آتا ہے۔ علامہ ذہبی نے ”ذكر رواية الاعمش عن أنس بن مالك“ کے عنوان کے تحت چند روایات ذکر کی ہیں اور ان میں سے بعض کو صالح الاسناد اور بعض صحیح الاسناد کہا ہے۔

لیکن دیگر اربابِ فن نے ملاقات کا تو اقرار کیا ہے لیکن روایات کے اتصال کی تردید کی ہے بلکہ ”الاعمش عن انس بن مالک“ کے طریق کو ارسال و انقطاع پر محمول کیا ہے۔ چند آراء پیش کی جاتی ہیں:

1: امام علی بن المدینی فرماتے ہیں:

کہ امام اعمش نے حضرت انس بن مالک سے کچھ نہیں سنا، انہوں نے محض انہیں مکہ میں مقام کے پیچھے نماز پڑھتے دیکھا ہے۔ اعمش کے جو طرق حضرت انس سے مروی ہیں وہ انہوں نے یزید الرقاشی کے ذریعے روایت کیے ہیں۔

2: امام ترمذی نے ”الجامع“ میں ( تحت ح3533) یوں فرمایا:

کہ ہم امام اعمش کے حضرت انس سے سماع حدیث کے بارے میں نہیں جانتے، انہوں نے حضرت انس کو صرف دیکھا ہے اور زیارت سے مشرف ہوئے ہیں۔

گویا امام ترمذی کے نزدیک بھی یہ روایت انقطاع پر محمول ہے۔

3: حافظ ابن حجر رقمطراز ہیں:

کہ اعمش کا حضرت انس سے سماع ثابت نہیں ہے۔

آپ حضرت ابو ہریرہ رضی اللہ عنہ کی احادیث ان کے شاگرد ابو صالح السمان سے روایت کرتے تھے۔ چنانچہ ابو صالح کے متعلق ایک بار فرمایا:

کہ میں نے ابو صالح سے ایک ہزار احادیث سنی ہیں۔

گویا ابو صالح آپ کےسب سے قریبی شیوخ میں سے ہیں جن سے آپ نے سب سے زیادہ استفادہ کیا۔مزید براں کہ آپ کی ابو ہریرہ رضی اللہ عنہ سے روایت بذریعہ ابو صالح کو محدثین نے اصح الاسانید بھی قرار دیا ہے۔ علامہ ذہبی نے بھی ”الاعمش عن ابی صالح عن ابی ہریرۃ“ کے طریق سے چند روایات ذکر فرمائی ہیں۔

یہاں ایک اہم امر کا تذکرہ کیا جاتا ہے کہ بعض الناس نے ”الاعمش عن ابی صالح“ کے طریق سے مروی روایت: ”الإمام ضامن“ کو امام سفیان الثوری کے اس مجمل و محتمل قول ”حديث الأعمش عن أبي صالح: الإمام ضامن، لا أراه سمعه من أبي صالح “ (اعمش کی ابو صالح سے الامام ضامن والی حدیث، میں نہیں سمجھتا کہ انہوں نے اسے ابو صالح سے سنا ہے۔ بحوالہ تقدمہ الجرح والتعدیل)“ کی وجہ سے ماننے سے انکار کر دیا ہے اور دلیل یہ دی ہے کہ امام نووی کے بقول: ”وكقوله من الأعمش عن أبي صالح والأعمش مدلس، والمدلس إذا قال "عن" لا يحتج به الا اذا ثبت السماع من جهة أخري• بحوالہ شرح مسلم)“ اعمش مدلس ہے اور روایت مذکورہ میں صیغہ ”عن“ سے روایت کر رہا ہے، لہذا مذکورہ قاعدہ کے تحت روایت ضعیف ہو گی۔

جوابا ًعرض ہے کہ یہ بات اپنی جگہ کہ خود صحیح بخاری و صحیح مسلم میں کئی مقامات پر ”الاعمش عن أبى صالح“ کے طریق سے روایات موجود ہیں۔ (دیکھیے؛صحیح البخاری:ح477، 2119، 2672، 4935، 6408 وغیرہ، صحیح مسلم: ح47، 52، 54، 67، 81، 132 وغیرہ) اور بقول امام نووی مدلس کی روایات جو صحیحین میں بصیغہ عن ہوں وہ دوسری جہت سے سماع پر محمول ہوتی ہیں۔

ہم مزید یہ کہتے ہیں کہ اسی حدیث ”الامام ضامن“ میں دوسرے مقام پر امام اعمش نے خودسماع کی تصریح بھی کردی ہے۔ امام طحاوی رحمہ اللہ یہی حدیث اس سند سے نقل کرتے ہیں:

اس میں امام اعمش نے بالیقین سماع کی تصریح کر دی ہے۔ لہٰذا بعض الناس کا تدلیس کی وجہ سے روایت کو ضعیف کہنے کا شبہ دور ہو جاتا ہے۔

شب و روزانہی احادیث کی مجالس کو منعقد کرنے اور ہمہ تن اس کی اشاعت میں مصروف رہنے کے بسبب آپ کا شمار ان چھ محدثین میں کیا گیا جن پر روایت حدیث کا مدار سمجھا گیا۔ امام علی بن المدینی (ت234ھ) کا بیان ہے:

کہ امت محمدیہ علی صاحبہا السلام کے دینی نفع کے لیے چھ آدمیوں نے (خاص طور پر)علم (حدیث) کو حفظ کیا ہے؛ امام عمرو بن دینار نے مکہ میں، امام زہری نے مدینہ میں، ابو اسحاق السبیعی اور امام اعمش نے کوفہ میں، امام قتادہ اور امام یحیٰ بن کثیر نے بصرہ میں۔

مالی اعتبار سے امام اعمش خستہ حالی کی زندگی بسر کر رہے تھے لیکن علم حدیث کی وجہ سے کئی امراء اور مالدار لوگ آپ کی مجلس کے گداگر نظر آتے تھے۔ امام عیسی بن یونس بن ابی اسحاق السبیعی (ت187 ھ) کا بیان ہے:

کہ ہم نے اپنے زمانے اور ہمارے قبل والے زمانے میں امام اعمش کا مثل نہیں دیکھا۔ اعمش کے فقر واحتیاج کے باوجود ہم نے ان کی مجلس سے زیادہ امراء اور سلاطین کو کسی اور کی مجلس میں حقیر نہیں پایا۔

آپ کے شیوخ حدیث کی تعداد بہت زیادہ ہے، چند ناموں کا تذکرہ کیا جاتا ہے:زيد بن وهب، ابو وائل، ابو عمرو الشیبانی، قيس ابن ابی حازم، اسماعیل بن رجاء، ابو صخرة جامع بن شداد، ابو ظبیان بن جندب، خیثمہ بن عبدالرحمن الجعفی، سعيد بن عبیدہ، ابو حازم الاشجعی، سلیمان بن مسہر، طلحہ بن مصرف، ابو سفیان طلحۃ بن نافع، عامر الشعبی، ابراهیم النخعی، عبد الله ابن مرة، عبد العزيز بن رفیع، عبد الملك بن عمیر، عدی بن ثابت، عمارة بن عمیر، عمارة ابن القعقاع، مجاہد بن جبر، ابو الضحى، منذر الثوری، ہلال بن يساف وغیرہ۔

آپ کےسرچشمۂ علم سے جن تشنگانِ علم نے فائدہ اُٹھایا ان کی صحیح تعداد تونہیں بتائی جاسکتی۔ اہلِ تذکرہ نے بھی کچھ نام گنائے ہیں۔ حافظ ابن حجر عسقلانی (ت852ھ) چند ائمہ کے نام لکھنے کے بعد فرماتے ہیں:

کہ اس کے علاوہ جو آپ کے تلامذہ بہت زیادہ ہیں۔

چند تلامذہ کے نام یہ ہیں: حكم بن عتیبہ، وزبید الیامی، ابو اسحاق السبیعی(یہ امام اعمش کے شیوخ میں سے ہیں)،سلیمان التیمی، سہیل بن ابو صالح (یہ آپ کے ہم عصر بھی تھے)،محمد بن واسع، ابو حنیفہ نعمان بن ثابت، شعبہ بن الحجاج،سفیان ثوری، سفیان بن عیینہ، ابراہیم ابن طہمان، جرير بن حازم، ابو اسحاق الفزاری، اسرائيل، زائدة، ابو بكر بن عياش، شيبان النحوی، عبد الله بن ادريس، عبد اللہ بن المبارك، ابن نمیر، الخریبی، عیسٰى بن يونس، فضیل بن عياض، محمد بن عبدالرحمن الطفاوی، ہشیم، ابو شہاب الحناط وغیرہ۔

ائمہ جرح وتعدیل سے آپ کی تعدیل و توثیق ثابت ہے۔ چند حضرات کی آراء پیشِ خدمت ہیں:

 امام ہشیم بن بشیر(ت183 ھ) :ما رأيت بالكوفة أحدا … أجود حديثا من الأعمش • میں نے کوفہ میں اعمش سے بڑا حدیث کا ماہر نہیں دیکھا۔

 امام ابوبكر بن عياش (ت194ھ)

ہم اعمش کو ”سید المحدثین“ یعنی محدثین کا سردار کہتے تھے۔

 امام يحيٰ بن معين (ت233ھ):سليمان بن مهران الاعمش ثقة. سلیمان بن مہران اعمش ثقہ تھے۔

 امام احمد بن حنبل (ت241 ھ):آپ سے پوچھا گیا کہ ابو صالح سے روایت کرنے میں سہیل اور اعمش میں سے کون آپ کو زیادہ پسند ہے؟ تو آپ نے فرمایا:”الأعمش أحب إلينا“ کہ اعمش ہمیں زیادہ پسند ہے۔

 امام محمد بن عبد اللہ بن عمار الموصلی (ت242 ھ)

محدثین میں اعمش سے زیادہ اثبت کوئی نہیں۔

 امام محمد بن اسماعیل البخاری (ت256 ھ)

آپ نے اپنی”الصحیح“کئی مقامات پر امام اعمش سے روایت لی ہے۔

 امام مسلم بن الحجاج (ت261 ھ)

آپ نے اپنی”الصحیح“کئی مقامات پر امام اعمش سے روایت لی ہے۔

 امام ابو الحسن عجلی (ت261ھ):

اعمش ثقہ تھے اور کوفہ والوں کے محدث تھے۔

 امام ابو حفص عمرو بن علی الفلاس (ت249 ھ)

اعمش کو اپنی صداقت کی وجہ سے ”مصحف“ کہا جاتا تھا۔

 امام ابو زرعہ رازی (ت264 ھ): سليمان الاعمش امام.اعمش امام تھے۔

 امام ابو حاتم الرازی (ت277ھ): الاعمش ثقة يحتج بحديثه اعمش ثقہ تھے، آپ کی روایات قابل حجت ہیں۔

 امام نسائی (ت303ھ): ثقة ثبت. اعمش ثقہ اور ثبت تھے۔

 علامہ شمس الدین ذہبی (ت748 ھ):

امام، شیخ الاسلام، قارئیوں اور محدثین کے شیخ، ابو محمد الاسدی الکاہلی ان کے آزاد کردہ غلام، الکوفی، الحافظ۔

 حافظ ابن حجر (ت852ھ):ثقة حافظاعمش ثقہ اور حدیث میں حافظ تھے۔

(جاری ہے……)