سورج گرہن

اللہ تعالیٰ کی قدرت کی نشانیوں میں سے سورج اور چاند دو بڑی نشانیاں ہیں، جو اللہ تعالیٰ کے مقرر کردہ ایک حساب کے تحت طلوع و غروب کے نظام میں جکڑے ہوئے ہیں اسی مقرر کردہ حساب کی ایک نوع یہ بھی ہے کہ ان کو مختلف اوقات میں گرہن لگتاہے۔

ماہرین فلکیات کے مطابق 26 دسمبر کو سورج کو گرہن لگے گا اور پاکستان کے تمام جنوبی علاقے کے لوگ 20 سال بعد مکمل سورج گرہن دیکھیں گے، آخری بار ایسا 11 اگست 1999 کو ہوا تھا، سورج گرہن جنوبی پاکستان خاص طور پر ساحلی علاقوں کراچی اور گوادر میں سب سے زیادہ ہوگا ۔

سورج گرہن اللہ تعالیٰ کی قدرت کی نشانی ہے اوران کے دکھلانے کا مقصد اللہ تعالیٰ قرآن کریم میں یہ ذکر فرماتے ہیں :

ترجمہ: اور ہم ڈرانے کےلیے ہی نشانیاں بھیجتے ہیں ۔

ترجمہ: حضرت قتادہ رحمہ اللہ فرماتے ہیں کہ اللہ تعالیٰ لوگوں کو اپنی نشانیوں سے ڈراتے ہیں تاکہ وہ عبرت و نصیحت حاصل کریں اور اللہ ہی کی طرف رجوع کریں۔ یہ واقعہ ذکر کیا گیا ہے کہ حضرت عبداللہ بن مسعود رضی اللہ عنہ کے زمانے میں ایک مرتبہ کوفہ میں زلزلہ آیا تو آپ رضی اللہ عنہ نے فرمایا:لوگو!یہ پکی بات ہے کہ تمہارا پرودرگار) تمہارے گناہوں پر ( تنبیہ اور سرزنش فرما رہا ہے لہذا اسے)نیک اعمال کر کے ( راضی کر لو۔اسی طرح یہ بات بھی نقل کی گئی ہے کہ حضرت عمر رضی اللہ عنہ کے زمانے میں مدینہ طیبہ میں زلزلے کے کئی جھٹکے آئے تو آپ رضی اللہ عنہ نے فرمایا: لوگو تمہاری بدعملیوں کی وجہ سے زلزلہ آیا ہے قسم بخدا!اگر دوبارہ زلزلہ آیا تو میں تمہیں سخت سزا دوں گا ۔

سورج گرہن کو ظاہر فرمانے کا مقصد بھی ڈرانا ہے کہ اللہ جل شانہ کی کبریائی اور قدرت کو دیکھ ڈرنا چاہیے اس سے قیامت کی یاد آتی ہے کہ جیسے اب تھوڑی دیر کے لیے سورج ہلکا سا بے نور ہوجاتا ہے اسی طرح قیامت کے دن بھی سورج مکمل بے نور ہو جائے گا اور اس کو لپیٹ دیا جائے گا ۔ انسان غور کرے کہ سورج اتنی بڑی مخلوق ہونے کے باوجود اللہ کی قدرت کاملہ اور قدرت قاہرہ کے سامنے بالکل بے بس اور مجبور ہے اللہ جب چاہے اسے بے نور کر دے اور جب چاہے اسے روشنی عطا کر دے جب سورج اور چاند جیسی بڑی مخلوقات کی یہ حالت ہے تو ہم کس شمار قطار میں ہیں؟ لہذا اس ذات کےعظیم اور اس ذات کے جبار و قہار ہونے کا خوف دل میں پیدا کرنا چاہیے۔

اس دنیا میں نظام ارضی و سماوی کےتغیرات و انقلابات چونکہ اللہ تعالیٰ کی جانب سے ڈرانے کےلیے ہوتے ہیں تو جس کے دل میں اللہ تعالیٰ کی جتنی معرفت ہوگی اسی قدر اس میں خوف اورخشیت پیدا ہوگی اوریہ بات بھی یقینی ہے کہ مخلوقات میں سے سب سے زیادہ اللہ تعالیٰ کی معرفت پیغمبر صلی اللہ علیہ وسلم کو حاصل ہوتی ہے اس لیے پیغمبر صلی اللہ علیہ وسلم بہت زیادہ خوف وخشیت میں مبتلا ہوجاتے ہیں۔

ترجمہ: حضرت ابوموسی اشعری رضی اللہ عنہ فرماتے ہیں کہ ایک مرتبہ سورج گرہن ہوا تو نبی کریم صلی اللہ علیہ وسلم بہت گھبرا کر اٹھے اس خوف سے کہ کہیں قیامت نہ قائم ہو جائے۔

ترجمہ: حضرت نعمان بن بشیر رضی اللہ عنہ سے مروی ہے رسول اللہ صلی اللہ علیہ وسلم کے زمانے میں سورج گرہن ہوا آپ صلی اللہ علیہ وسلم پر خشیت الہٰی کا اتنا گہرا اثر ہوا کہ آپ کپڑوں کو ٹھیک طرح سے سمیٹے بغیر ہی گھر سے باہر تشریف لائے۔

ترجمہ: حضرت ابوموسی اشعری رضی اللہ عنہ فرماتے ہیں ایک مرتبہ سورج گرہن ہوا تو نبی کریم صلی اللہ علیہ وسلم بہت گھبرا کر اٹھے اس خوف سے کہ کہیں قیامت نہ قائم ہو جائے۔ آپ نے مسجد میں آکر بہت ہی لمبا قیام ، لمبا رکوع اور لمبے سجدوں کے ساتھ نماز پڑھی)حضرت ابو موسیٰ اشعری رضی اللہ عنہ فرماتے ہیں کہ ( میں نے کبھی آپ صلی اللہ علیہ وسلم کو اس طرح کرتے ہوئے نہیں دیکھا تھا۔

ساری دنیا کو اپنی روشنیوں سے روشن کرنے والے سورج کا بے نور ہونا چونکہ غیر معمولی نوعیت کا واقعہ ہوتا ہے اس لیے اس موقع پرمختلف قسم کی باتیں پھیل جاتی ہیں بعض لوگ تو اسے محض اتفاق ہی سمجھتے ہیں جبکہ بعض اس کو اپنے مخصوص نظریات کی زاویے سے دیکھتے ہیں۔ اسلام ایسے موقع پر اپنے ماننے والوں کو جہاں نیک اعمال کی تعلیم دیتا ہے اس سے پہلے اُن کے عقائد کی اصلاح کرتا ہے تاکہ اس طرح محیر العقول واقعات کو دیکھ کر توہمات میں مبتلا ہو کر اسے محض اتفاق کا کرشمہ مت سمجھیں اور نہ ہی اس بارے کسی طرح کے غیر حقیقی نظریات اپنائیں۔

دہریہ خدا تعالیٰ کے وجود ہی کے منکر ہیں جب وہ خدا کی ذات کو ہی نہیں مانتے تو خدا کی صفات قدرت وغیرہ کیسے مانیں گے؟ وہ یہ سمجھتے ہیں کہ تمام حوادثات زمانہ محض اتفاق سے ہورہا ہے کوئی ذات اسے کنٹرول نہیں کر رہی اسی طرح سورج گرہن اور چاند گرہن بھی محض اتفاقاً کبھی کبھار رونما ہوجاتے ہیں۔

اسلام اس نظریے کی تردید کرتا ہے:

ترجمہ: ام المومنین سیدہ عائشہ صدیقہ رضی اللہ عنہا سے روایت ہے کہ رسول اللہ صلی اللہ علیہ وسلم کے زمانہ میں سورج گرہن ہوا… اس موقع پر آپ صلی اللہ علیہ وسلم نے فرمایا: سورج اور چاند اللہ تعالیٰ کی قدرت کی نشانیوں میں سے ہیں۔

معلوم ہوا کہ یہ اللہ کی قدرت کی نشانیوں میں سے نشانیاں ہیں محض اتفاق کا کرشمہ نہیں جیسا کہ خداتعالیٰ کے منکرین خدا کا نظریہ ہے۔

مشرکین عرب سورج گرہن جیسے غیر معمولی واقعے کو دیکھ کر اس سے یہ نتیجہ اخذ کرتے تھے کہ یہ کسی بڑی عظیم الشان شخصیت کی موت کی وجہ سے ہوتا ہے۔

ترجمہ: حضرت ابوبکرہ رضی اللہ عنہ سے مروی ایک طویل حدیث میں ہے جب نبی کریم صلی اللہ علیہ وسلم کے صاحب زادے حضرت ابراہیم کا انتقال ہوا تو لوگوں نے کہا کہ ان کی وفات کی وجہ سے سورج کو گرہن لگا ہے ۔

اسلام اس نظریے کی تردید کرتا ہے :

ترجمہ: حضرت ابوبکرہ رضی اللہ عنہ سے مروی طویل حدیث میں ہے جب نبی کریم صلی اللہ علیہ وسلم کے صاحب زادے حضرت ابراہیم کا انتقال ہوا تو لوگوں نے کہا کہ ان کی وفات کی وجہ سے سورج گرہن ہوا ہے۔اس موقع پر آپ صلی اللہ علیہ وسلم نے فرمایا کہ سورج اور چاند اللہ تعالیٰ کی قدرت کی نشانیوں میں سے دو بڑی نشانیاں ہیں ان کو گرہن کسی کی موت کی وجہ سے نہیں لگتا۔

ترجمہ: حضرت نعمان بن بشیر رضی اللہ عنہ سے مروی ہے رسول اللہ صلی اللہ علیہ وسلم کے زمانہ مبارک میں سورج گرہن ہوا آپ صلی اللہ علیہ وسلم نے فرمایا لوگوں نے نظریہ بنالیا ہے سورج و چاند کو گرہن اس لیے لگتا ہے کہ کسی عظیم شخصیت کی موت واقع ہوئی ہے حالانکہ یہ حقیقت کے بالکل خلاف ہے سورج اور چاند کو گرہن کسی کی موت و حیات کی وجہ سے نہیں لگتا یہ اللہ تعالیٰ کی نشانیوں میں سے بڑی نشانیاں ہیں ۔

نجومی یعنی سورج ، چاند اور ستاروں کی عبادت کرنے والے اور انہی کو نفع و نقصان کا مالک سمجھنے والے لوگوں کا نظریہ ہے کہ سورج اور چاند گرہن کے موقع پر خوف کھانا اور نماز ،دعا استغفار وغیرہ کی تعلیم سے یہ بات معلوم ہوتی ہے کہ سورج اور چاند میں ذاتی طور پرنفع و نقصان دینے کے اختیارات موجود ہیں تبھی تو ان کے گرہن لگنے کے موقع ڈرا جاتا ہے ۔

اسلام اس نظریے کی تردید کرتا ہے:

ترجمہ: حضرت ابوبکرہ رضی اللہ عنہ سے مروی ایک طویل حدیث میں ہے آپ صلی اللہ علیہ وسلم نے فرمایا : کہ سورج اور چاند اللہ تعالیٰ کی قدرت کی نشانیوں میں سے دو بڑی نشانیاں ہیں۔

معلوم ہوا کہ یہ خود اللہ تعالیٰ کی قدرت کی نشانیاں ہیں خود رب اور الہ نہیں کہ ذاتی طور پر کسی کو نفع یا نقصان دے سکیں بلکہ ان کی حیثیت محض قدرت باری تعالیٰ کی نشانیوں کے طور پر ہے اور بس ۔

دودھ کے سمندر سے خداؤں نے راکشسوں کی مدد سے ایک ایسا مشروب نکالا جس کو پینے والا امر ہو جائے گا یعنی اسے کبھی موت نہیں آئے گی۔ راکشسوں کو خداؤں نے وہ مشروب دینے سے انکار کر دیا، پھر جس محفل میں تمام خدا بیٹھے تھے اور باری باری سب کو امرت دیا جا رہا تھا۔ امرت دینے والی دیوی کا نام موہینی تھا۔ ایک سواربھانو نامی راکشس خدا کا روپ اور بھیس بدل کر اس محفل میں آ بیٹھا۔ اس کے دائیں جانب چندرا دیوتا (چاند کا خدا) اور بائیں جانب سوریا دیوتا (سورج کا خدا) بیٹھے تھے جنہوں نے سواربھانو کو پہچان لیا کہ یہ خدا کے روپ میں راکشس ہے۔ انہوں نے فوراً سے یہ بات موہینی کو بتلائی، موہینی درحقیقت وِشنو دیوتا تھا جو موہینی کے روپ میں آیا ہوا تھا۔ وِشنو نے فورا یہ بات سنتے ہی اس راکشس سواربھانو کی گردن کو اپنے سودرشن چکرا سے کاٹ ڈالا، مگر اس وقت تک سواربھانو کے گلے تک وہ امرت پہنچ چکا تھا جس وجہ سے اس کا سر امر ہو گیا اور جسم مر گیا اور سر آسمان کی طرف اڑ گیا اس کے سر کو” راہو“ اور اس کے پیچھے رہ جانے والے دھڑ کو” کیتو“ کہا جاتا ہے۔ اس وجہ سے اس کا نام ”راہو کیتو“ پڑ گیا۔سواربھانو اس وقت سانپ کی شکل اختیار کر چکا تھا جب اس کا سر اور دھڑ علیحدہ ہوئے تو راہو (سر) کیتو(دھڑ) نے ایک دوسرے سے وعدہ کیا کہ ہم چندرا اور سوریا سے بدلا لیں گے کیونکہ اسے چندرا و سوریا پر بہت غصہ تھا کہ ان دونوں کی شکایت کی وجہ سے اس کا یہ حشر ہوا تو اس نے ان دونوں سے بدلا لینے کی ٹھان لی۔ اسی وجہ سے سال کے کسی حصے میں جب راہو سوریا (سورج) یا چندرا (چاند)کے قریب ہوتا ہے تو اسے وہ بدلے کےلیے نگل لیتا ہے اس کو سورج گرہن اور چاند گرہن کہتے ہیں ۔

ہندو دھرم والوں کا نظریہ ہے کہ گرہن کے اس عمل کے وقت ملک کے کسی بڑے آدمی کی موت ہوتی ہے ۔

اسلام اس نظریے کی تردید کرتا ہے:

ترجمہ: حضرت نعمان بن بشیر رضی اللہ عنہ سے مروی ایک طویل حدیث میں ہے کہ آپ صلی اللہ علیہ وسلم نے فرمایا: سورج اور چاند گرہن کی وجہ سے کسی کی موت واقع نہیں ہوتی۔

فائدہ: کے شروع والے لام کو اَجلیہ بھی بنا سکتے ہیں اور تعلیلیہ بھی ۔

ملحدین کہتے ہیں کہ ایک طرف تم کہتے ہو کہ قرآن کریم میں ہےسورج اور چاند اپنےاپنے مقرر کردہ حساب کے مطابق چل رہے ہیںاَلشَّمْسُ وَالْقَمَرُ بِحُسْبَانٍ جب سورج چاند کا سارا نظام ہی ایک طے شدہ حساب میں جکڑا ہوا ہےتو یہ ایک طبعی چیز ہے اس پر خوف زدہ نہیں ہونا چاہیے کیونکہ یہ اسباب کے تحت رونما ہوتا ہے اس موقع پر دعا ، استغفار ، صدقہ خیرات اور دیگر کام بھی نہیں کرنے چاہییں۔ یہ تو ایسا ہے کہ جیسے روزانہ سورج طلوع اور غروب ہوتا ہےتو جیسے روزانہ کے طلوع و غروب سے کوئی خوف زدہ نہیں ہوتا اس سے بھی نہیں ہونا چاہیے۔

اسلام اس نظریے کی تردید کرتا ہے:

اس نظریے کے مطابق ہر وہ چیز جس کا تعلق اسباب کے ساتھ جڑا ہوا ہو اس سے ڈرنے کی ضرورت نہیں ہونی چاہیے۔ تمام تکالیف یہاں تک کہ موت بلکہ قیامت بھی اسباب کے تحت ہے ان سے بھی ڈرنے کی ضرورت نہیں ہونی چاہیےجبکہ اس نظریے کے حاملین کو ان چیزوں کا خوف کھائے جاتا ہے ۔

دوسری بات یہ ہے کہ اس پراسرار کائنات میں جو واقعات رونما ہوتے ہیں سائنسی ترقی کی بدولت بعض واقعات کے ظاہری اسباب تک ہماری رسائی ہو جاتی ہے اور اکثر واقعات و تغیرات ایسے ہیں جن تک سائنسی ترقی کے باوجود بھی رسائی نہیں ہوسکتی ان کا تعلق محض اللہ کی قدرت اور مشیئت کے ساتھ ہے جن کی نظریں ان واقعات کے ظاہری اسباب تک محدود رہتی ہیں ان کے لیے کائنات کےتغیرات دلچسپ تماشے سے زائد کچھ نہیں ہوتے لیکن جن کی نگاہ ان ظاہری اسباب سے بھی اوپر جاتی ہے وہ ان واقعات سے اللہ تعالیٰ کی حکمت بالغہ اور قدرت کاملہ کے عقیدہ کا رسوخ دل میں پیوست کرلیتے ہیں اس لیے ان جیسے واقعات کے جو ظاہری اسباب تجربے اور مشاہدے سے معلوم ہوتے ہیں انبیاء کرام علیہم السلام ان کے بیان کرنے کی ضرورت محسوس نہیں فرماتے کیونکہ ایسے ظاہری اسباب تک پہنچنے کےلیے اللہ تعالیٰ نے انسان کو عقل و شعور، تجربات اور مشاہدات کی دولت عطا کر رکھی ہے ، وحی کی ضرورت نہیں۔ ہاں انبیاء کرام علیہم السلام اُن باتوں کی طرف توجہ کراتے ہیں جن تک رسائی سے عقل، تجربہ اور مشاہدہ سب ناکام ہوجاتے ہیں ۔

یہی وجہ ہے کہ اللہ کے نبی صلی اللہ علیہ وسلم نے اس غلط عقیدے کی تو کھل کر تردید فرمائی کہ چاند اور سورج کے گرہن لگنے کو کسی کی موت و حیات سے کوئی تعلق نہیں لیکن اس کی سائنسی وجہ بیان نہیں فرمائی ۔ بلکہ ظاہری سبب سے اوپر کی اس حقیقت کی طرف توجہ دلائی جس کو عام طور انسان فراموش کر دیتا ہے اور یہ کہہ کر مطمئن ہو جاتا ہے کہ یہ سب کچھ تو اسباب کے تحت رونما ہو رہا ہے لہذا ڈرنے کی چنداں ضرورت نہیں اور فرمایا کہ سورج جیسی عظیم الجثہ مخلوق کا بے نور ہونا اللہ کی قدرت کی دلیل ہے کہ جس اللہ کو اس پر یہ اختیار حاصل ہے کہ جب چاہے بے نور کردے اور جب چاہے اس کی روشنی واپس لوٹا دے ایسے ہی اسے انسان جیسی کمزور مخلوق پر بھی مکمل قدرت حاصل ہے جب چاہے اسے موت دے اور محشر میں زندہ اٹھا کر اس کےلیے جنت و جہنم کا فیصلہ فرمائے ۔

ترجمہ: حضرت ابو مسعود انصاری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: سورج و چاند کو کسی کے مرنے سے گرہن نہیں لگتا، یہ تو قدرت خداوندی کی دو نشانیاں ہیں جب انہیں گرہن ہوتے دیکھو تو نماز پڑھو۔

ترجمہ: حضرت ابوموسیٰ اشعری رضی اللہ عنہ سے مروی ہے کہ سورج گرہن کے موقع پر …آپ صلی اللہ علیہ وسلم نے فرمایا کہ یہ )سورج اور چاند گرہن ( نشانیاں ہیں جنہیں اللہ تعالیٰ ظاہر فرماتا ہے یہ کسی کی موت وحیات کی وجہ سے نہیں آتیں بلکہ اللہ تعالیٰ ان کے ذریعہ اپنے بندوں کو ڈراتا ہے اس لیے جب تم اس طرح کی کوئی چیز دیکھو تو فوراً اللہ تعالی کا ذکر کرو ، اس سے دعا اور اس سے اپنے گناہوں کی معافی مانگو ۔

ترجمہ: حضرت عائشہ رضی اللہ عنہا سےمروی ایک طویل روایت میں ہے کہ رسول اللہ صلی اللہ علیہ وسلم نے لوگوں کو سورج گرہن کے بارے وہ سب باتیں تعلیم کے طور پر ارشاد فرمائیں جو اللہ چاہتے تھے اور بعد میں انہیں حکم دیا کہ عذاب قبر سے پناہ مانگیں۔

ترجمہ: ام المومنین سیدہ عائشہ صدیقہ رضی اللہ عنہا سے روایت ہے کہ رسول اللہ صلی اللہ علیہ وسلم کے زمانہ میں سورج گرہن ہوا … اس موقع پر آپ صلی اللہ علیہ وسلم نے فرمایا: سورج اور چاند اللہ تعا لیٰ کی نشانیوں میں سے ہیں ان کو کسی کی مو ت یا زند گی کی وجہ سے گرہن نہیں لگتا جب تم انہیں (اس حالت میں ) دیکھو تو اللہ کی بڑائی بیان کرو، اللہ تعا لیٰ سے دعا مانگو، نماز پڑھو اور صدقہ کرو۔

اس بارے مذکورہ بالا روایات ہماری رہنمائی کرتی ہیں ان میں مجموعی طور پر نماز ، دعا، ذکراللہ ، استغفار اور صدقہ و خیرات کرنے کا حکم دیا گیا ہے ۔

سورج گرہن کے وقت جو نماز ادا کی جاتی ہے اسے صلوٰۃ الکسوف کہتے ہیں جس کے چند اہم مسائل ہم ان شاء اللہ آخر میں ذکر کریں گے ۔ ابھی یہاں یہ عرض کرنا ہے کہ سورج گرہن کے وقت نماز کا حکم کیوں دیا گیا ہے ؟تو یہ بات معلوم ہونی چاہیے کہ نماز اہم العبادات ہے، تمام عبادات میں اس کی فضیلت نرالی اور بلند ہے، اللہ کی رحمت کو اپنے اوپر متوجہ کرنے کا ذریعہ ہے، مصیبت میں دل کی تسلی کا باعث ہے، اللہ کو راضی کرنے کا سبب ہے، اپنی عاجزی اور بے بسی کا اظہار ہے ، یہی وجہ ہے کہ عام معمولات کے علاوہ جب کبھی کوئی غیر معمولی واقعہ پیش آتا مثلاً تیز ہوا ، آندھی اور طوفانی بارش وغیرہ تو آپ صلی اللہ علیہ وسلم نماز میں مشغول ہو جاتے ۔ سورج گرہن بھی ایک غیر معمولی نوعیت کا معاملہ ہوتا ہے کیونکہ اس میں سورج جیسا عظیم الشان جثہ بے نور ہوجاتا ہے تو اس موقع پر نماز کا حکم دیا گیا ہے ۔

دعا ایسا نیک عمل ہے کہ جس کی وجہ سے اللہ تعالیٰ ہمارے حق میں اپنی صفت رحمت کو صفت غضب پر غالب فرما لیتے ہیں اور مصائب سے چھٹکارا نصیب فرماتے ہیں ۔ سورج گرہن کا وقت بھی انہی اوقات میں شامل ہے جس میں انسان مصیبت اور پریشانی میں مبتلا ہوتا ہے اس لیے دعا کا حکم دیا گیا ہے ۔

ترجمہ: رسول اللہ صلی اللہ علیہ وسلم نے فرمایاجو مصائب نازل ہوچکےیا ہونے والے ہوں اس میں دعا کام آتی ہے۔اس لیے اللہ کے بندو! دعاؤں کا خوب اہتمام کرو ۔

اللہ کا ذکر بہت بڑی عبادت ہے اصل تو یہ ہے کہ انسان کا کوئی لمحہ اللہ کی یاد کے بغیر نہیں گزرنا چاہیے لیکن جب کوئی مصیبت یا پریشانی غیر معمولی واقعہ پیش آجائے تو اس موقع پر زبان اور دل دونوں سے اللہ اللہ کی صدا سنائی دینی چاہیے۔ سورج گرہن سے خوف کی کیفیت پیدا ہوتی ہے اگر اس خوف میں اللہ کی رحمت کی آمیزش نہ کی جائے تو محض خوف مایوسی پیدا کرتا ہے اور یہ مایوسی اللہ سے دور کرتی ہے اس لیےحکم دیا گیا ہے کہ اس موقع پر اللہ کا ذکر کرنا چاہیے کیونکہ قرآنی فیصلہ ہے کہ ذکر اللہ سے دلوں کو اطمینان نصیب ہوتا ہے ۔

اللہ کی طرف سے سورج کو گرہن لگنا بطور تنبیہ کے ہوتا ہے کہ اپنے برے اعمال سے باز آجاؤ اور تائب ہو کرمعافی مانگو ورنہ دیکھو کہ میں سورج جیسی عظیم الشان مخلوق کو یوں بے نور کر سکتا ہوں تو تمہیں سزا دینا میرے لیے کیا مشکل ہے ؟ لہذا اس موقع پر خصوصیت کے ساتھ استغفار کا حکم دیا گیا ہے ۔

سرسری طور پر سورج گرہن اور عذاب قبر میں کوئی مناسبت نظر نہیں آتی لیکن اگر بغور دیکھا جائے تو ان دونوں میں مناسبت موجود ہے اسی لیے اس موقع پر اللہ کے رسول صلی اللہ علیہ وسلم نے عذاب قبر سے پناہ حاصل کرنے کا بھی حکم دیا ہے ۔

ترجمہ: ابن منیر رحمہ اللہ اس حدیث کی تشریح میں فرماتے ہیں کہ سورج گرہن کے وقت عذاب قبر سے پناہ حاصل کرنے میں مناسبت یہ ہے کہ جیسے قبر میں اندھیرا ہوتا ہے اسی طرح سورج گرہن کے وقت دن میں بھی اندھیرا ہوجاتا ہے )یہ الگ بات ہے کہ قبر کا اندھیرا سورج گرہن کے اندھیرے سے کہیں زیادہ ہوگا ( اور ضابطہ ہے کہ ایک چیز دوسری چیز کے یاد کرنے کا سبب ہوتی ہے اس لیے انسان سورج گرہن کے وقت خوف زدہ ہوتا ہے جس طرح قبر کے عذاب سے خوف زدہ ہوتا ہے تو وہ آخرت کی ہولناکیوں سے نجات دینے والی چیزوں کو اختیار کر کے عبرت حاصل کرتا ہے ۔

اللہ کے راستے میں اپنے مال کو خرچ کر کے مستحق افراد کی ضروریات کو پورا کرنا صدقہ وخیرات کہلاتا ہے ۔صدقہ اللہ تعالیٰ کے غضب کو دور کرتا ہے اور بری موت سے حفاظت کا ذریعہ بنتا ہے ۔

ترجمہ: حضرت انس رضی اللہ عنہ سے ایک طویل حدیث میں مروی ہے کہ رسول اللہ صلی اللہ علیہ وسلم نے فرمایا:چپکے سے صدقہ کرنا رب تعالیٰ کے غضب کو دور کرتا ہے اور علانیہ صدقہ کرنا بری موت سے بچاتا ہے۔

سورج گرہن چونکہ اللہ کے غضب کا عکاس ہوتا ہے اس موقع پر اگر اللہ تعالیٰ کا رحم و کرم شامل حال نہ ہو تو انسانیت فنا ہو جائےاس لیے اس موقع پر صدقہ و خیرات کا حکم دیا گیا ہے۔

صلوٰۃ الکسوف کا وقت سورج گرہن لگنے کی ابتداء سے لے کر گرہن کے زائل ہونے تک رہتا ہے ۔ البتہ اوقات مکروہ) جن میں نماز پڑھنا جائز نہیں ) میں نہیں پڑھی جاتی۔ ان اوقات مکروہ میں نماز کے علاوہ دعا ، استغفار ، ذکر اذکار وغیرہ کرتے رہنا چاہیے ۔

صلوٰۃ الکسوف کے لیے اذان و اقامت نہیں ۔

صلوٰۃ الکسوف میں خطبہ نہیں ہوتا ۔

صلوٰۃ الکسوف کی دو رکعتیں ہیں ۔

صلوٰۃ الکسوف باجماعت ادا کی جائے اگرچہ انفرادا بھی گنجائش ہے ۔

صلوٰۃ الکسوف سری نماز ہے لیکن جہر کی گنجائش بھی موجود ہے ۔

صلوٰۃ الکسوف بھی دو رکعات والی عام نماز وں کی طرح ہےیعنی ہر رکعت میں ایک رکوع ہے۔ ہاں قراءۃ اور رکوع و سجود طویل ہونے چاہییں ۔

فائدہ: جن روایات میں ایک رکعت میں ایک سے زائد رکوع کا تذکرہ ملتا ہے وہ آپ صلی اللہ علیہ وسلم کی خصوصیت تھی ۔

اللہ تعالیٰ ہمیں ہر دن اور ہر رات شریعت کے موافق گزارنے کی توفیق نصیب فرمائیں ۔

والسلام

محمدالیاس گھمن

خانقاہ ، چشتیہ شاہ عالم سلنگور ، ملائیشیا

جمعرات ،19 دسمبر ، 2019ء