عقیدہ 37

ترجمہ: اہلِ جنت کے لیے دیدارِ باری تعالیٰ کے عقیدہ پر اس شخص کا ایمان درست نہیں جو جنتیوں کے لیے ایسے دیدار کا قائل ہو جس کی بنیاد وہم پر ہے یا ایسے دیدار کا قائل ہو جس کا معنی اس نے اپنے فہم سے کیا ہے۔ اس لیے کہ دیدارِ باری تعالیٰ کے متعلق اور ہر اس صفت کے متعلق جو اللہ تعالیٰ کی طرف منسوب ہو اصل عقیدہ یہی ہے کہ ان کی تاویل (یعنی اپنی طرف سے معانی اور کیفیات کی تعیین) نہ کی جائے بلکہ من و عن تسلیم کیا جائے۔ یہی موقف رسل علیہم السلام کے دین اور انبیاء علیہم السلام اور مسلمانوں کی شریعت کے عین مطابق ہے اور جو شخص نفی و تشبیہ سے نہ بچ سکا تو وہ (صراط مستقیم) سے پھسل گیا اور تنزیہ کا عقیدہ نہ پا سکا، اس لیے کہ ہمارا رب صفتِ وحدانیت کے ساتھ موصوف اور وصفِ فردانیت کے ساتھ متصف ہے (یعنی ذات میں اکیلا اور صفات میں یکتا ہے) اللہ تعالیٰ کی صفات مخلوق کی صفات کی طرح نہیں ہیں۔

اہل جنت کو جنت میں اللہ تعالیٰ کا دیدار نصیب ہو گا اس عقیدہ پر ایمان اس صورت میں درست سمجھا جائے گا جب دیدار کا تو اعتقاد رکھا جائے لیکن اس میں اپنے وہم و خیال کو دخل نہ دیا جائے اور نہ ہی اپنے فہم سے اس دیدار کی تاویل کی جائے۔ اس کی وجہ یہ ہے کہ دیدار باری تعالیٰ اور اللہ تعالیٰ کی صفات کے بارے میں اصل اعتقاد یہی ہے کہ اس میں تاویل کیے بغیر من و عن سلیم کیا جائے۔ اس لیے اسی پر کار بند رہنا چاہیے ۔