اللہ تعالیٰ نے فرمانبرداروں کے لیے جنت اور نافرمانوں کے لیے جہنم تیار کر رکھی ہے ۔ جنت کیسے حاصل ہو گی اور جہنم سے کیسے بچا جا سکتا ہے؟ اس کا جواب نبی کریم صلی اللہ علیہ وسلم کی تعلیمات میں جابجا ملتا ہے ۔ آپ صلی اللہ علیہ وسلم کبھی جہنم سے بچنے کی تلقین فرماتے اور کبھی جنت کی نعمتوں کو اپنانے کی ترغیب دیتے۔ذیل میں ایک حدیث مبارک مختصر سی تشریح کے ساتھ ذکر کی جا رہی ہے۔

ترجمہ: حضرت ثوبان رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:جو شخص تکبر، خیانت اور قرض سے بری ہونے کی حالت میں دنیا سے رخصت ہووہ جنت میں داخل ہو گا ۔

اچھا لباس، اچھی گاڑی ، اچھی رہائش وغیرہ استعمال کرنا نہ زُہد کے خلاف ہے اور نہ ہی تکبر کی علامت ہے بلکہ اللہ تعالیٰ کی دی ہوئی نعمتوں کو استعمال کر کے اللہ کا شکر ادا کرنا شریعت میں مطلوب ہے۔

حق بات کے باوجود اس کو قبول نہ کرنا اور اپنی غلط بات پر ڈٹے رہنا مزید یہ کہ لوگوں کو حقیر اور خود کو عقل کل سمجھنا تکبرکہلاتا ہے ۔ اس سے بچنا ضروری ہے ۔

ترجمہ: حضرت عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: وہ شخص جنت میں داخل نہیں ہو گا جس کے دل میں ذرہ برابر تکبر ہوگا ۔ یہ بات سن کر ایک شخص نے عرض کی کہ بندہ اس بات کو اپنے لیے پسند کرتا ہے کہ اس کے کپڑے اچھے ہوں ، جوتا اچھا ہو ۔ آپ صلی اللہ علیہ وسلم نے فرمایا: جوتی کپڑے کے اچھا ہونے میں کوئی حرج نہیں کیونکہ اللہ تعالیٰ کی ذات حسن و جمال والی ہے اور حسن و جمال کو پسند بھی فرماتی ہے ۔ ہاں البتہ تکبر یہ ہے کہ انسان حق بات کا انکار کرے اور مخلوق خدا کو اپنے سے حقیر و کمتر سمجھے۔

ترجمہ: حضرت عابس بن ربیعہ رحمہ اللہ سے مروی ہے کہ حضرت عمر رضی اللہ عنہ نے منبر پر خطبہ دیتے ہوئے یہ بات ارشاد فرمائی : لوگو!تواضع و انکساری اختیار کرو کیونکہ میں نے رسول اللہ صلی اللہ علیہ وسلم سے یہ بات سنی ہے کہ جو شخص اللہ کو راضی کرنے کے لیے تواضع و انکساری اختیار کرے گا اللہ رب العزت اس شخص کو بلندیاں عطا فرمائیں گے وہ خود کو بے حیثیت سمجھتا ہو گا جبکہ لوگوں کی نظروں میں اس کی بڑی عظمت اور حیثیت ہوگی ۔ اور جو شخص تکبر اختیار کرے گا اللہ رب العزت ایسے شخص کو لوگوں کی نظروں میں حقیر و بے حیثیت بنادیں گے جبکہ وہ خود کو بہت بڑا سمجھتا رہے گا ایسا شخص لوگوں کی نظروں میں کتے اور خنزیر سے زیادہ بے حیثیت ہو کر رہ جائے گا ۔

آپ صلی اللہ علیہ وسلم نے فرمایا جو شخص اس حالت میں دنیا سے رخصت ہو کہ وہ خیانت سے بری اور پاک صاف ہو تو ایسا شخص جنت میں داخل ہو گا ۔ خیانت اور کسی کا حق دبانا ایسا بڑا گناہ ہے کہ جس کی وجہ سے انسان کی نیکیاں ضائع ہو جاتی ہیں ۔ کل بروز قیامت ایسے شخص کی نیکیاں حق داروں کو دے دی جائیں گی اور اس کا نامہ اعمال نیکیوں سے خالی ہو جائے گا ۔ اللہ کی پکڑ اس پر پڑے گی جس سے یہ بچ نہیں سکے گا ۔

ترجمہ: حضرت ابوہریرہ رضی اللہ عنہ سے مروی ہے کہ ہم فتح خیبر والے دن رسول اللہ صلی اللہ علیہ وسلم کے ساتھ تھے ۔ مال غنیمت میں ہمیں سونے چاندی کے بجائے سامان ، کھانے پینے کی اشیاء اور کپڑے وغیرہ ملے ۔قبیلہ بنو ضبیب کے ایک شخص رفاعہ بن زید نے رسول اللہ صلی اللہ علیہ وسلم کو ایک کالے رنگ کا غلام ہدیہ کیا جس کا نام مدعم تھا ۔جس وقت رسول اللہ صلی اللہ علیہ وسلم اور ہم وادی قریٰ کی جانب سفر کی تیاری میں مشغول ہوئے تو مدعم رسول اللہ صلی اللہ علیہ وسلم کا سامان سفر تیار کر رہا تھا اچانک انجانی سمت سے ایک تیر آ کر اسے لگا اور وہ مر گیا ۔ لوگوں نے کہا کیسا خوش نصیب انسان ہے اسے جنت کی خوشخبری ہو کہ شہادت نصیب ہوئی ہے ۔ آپ صلی اللہ علیہ وسلم نے فرمایا کہ ہرگز ایسی بات نہیں جیسے تم کہہ رہے ہو اس ذات کی قسم جس کے قبضہ قدرت میں میری جان ہے وہ چادر جو جنگ خیبر والے دن مال غنیمت میں سے اس نے خیانت کرتے ہوئے لی تھی وہ اس کے جسم پر آگ بن کر لپٹی ہوئی ہے۔

آپ صلی اللہ علیہ وسلم نے فرمایا جو شخص اس حالت میں دنیا سے رخصت ہو کہ اس کے ذمےکسی کا قرض ادا کرنا نہ ہو تو ایسا شخص جنت میں داخل ہو گا ۔

ترجمہ: حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نےفرمایا: مومن کی روح قرض کی وجہ سے اٹکی رہتی ہے نہ وہ جنت پہنچ پاتی ہے اور نہ ہی صالحین کے زمرہ میں شامل ہو پاتی ہے یہاں تک کہ اس کی طرف سے قرض ادا کر دیا جائے ۔

قرض لے کر واپس نہ کرنا ، ٹال مٹول سے کام لینا ، قرض خواہ سے وعدے پر وعدے کرتے جانا ، اسباب و وسائل کے موجود ہونے کے باوجود قرض کی ادائیگی میں تاخیر کرنا ہمارے معاشرے کا حصہ بن کر رہ گیا ہے ۔ بعض نام نہاد دین دار کہلانے والے لوگ بھی اس جرم سے اپنی حفاظت نہیں کر پا رہے ۔ یاد رکھیں کہ یہ ایسا جرم ہے کہ کوئی بھی نیکی اس کی معافی کا ذریعہ نہیں بن سکتی یہاں تک کہ شہادت والی باسعادت موت بھی مل جائے کہ جس سے باقی گناہ معاف ہوجاتے ہیں لیکن یہ جرم شہادت والی موت سے بھی معاف نہیں ہوتا ۔

ترجمہ: حضرت عبداللہ بن عمرو رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: شہید کی مغفرت کرتے ہوئے اس کا ہر گناہ معاف کر دیا جاتا ہے سوائے قرض کے کہ وہ معاف نہیں ہوتا ۔

اللہ تعالیٰ ہمیں نیک اعمال کی توفیق عطا فرمائے۔

والسلام

محمدالیاس گھمن

جمعرات ،18 جون ،2020ء