سیدنا سعید بن مسیب رحمہ اللہ

بستان المحدثین کے تحت ان صحابہ کرام رضی اللہ عنہم کا تذکرہ خیر کیا جاتا رہا جنہوں نے حدیث کے حفظ و اشاعت میں کارہائے نمایاں سرانجام دیں۔”فقیہ“ کے سال نو کے آغاز پر اس سلسلہ کو وسعت دیتے ہوئے اب حضرات تابعین عظام رحمہم اللہ کا ذکر خیر اور ان کے حالات و واقعات کو پیش کیا جا رہا ہے۔

تابعی اس شخص کو کہا جاتا ہے جس نے ایمان کی حالت میں کسی صحابی رضی اللہ عنہ کی زیارت کی ہو۔

تابعین کاطبقہ حضرات صحابہ کرام رضی اللہ عنہم کا فیض یافتہ ہے۔قرآن و سنت کے علوم ان سے لے کر امت میں منتقل کرتا ہے۔اللہ تعالیٰ نے اپنے کلام مقدس اور نبی اکرم صلی اللہ علیہ وسلم نے اپنے فرامین مبارکہ میں ان کے فضائل بیان فرمائے ہیں۔ارشاد خداوندی ہے:

مہاجرین وانصار میں سے جن لوگوں نے اسلام قبول کرنے میں سبقت کی اور جن لوگوں نے خوش دلی کے ساتھ ان کا اتباع کیا، اللہ تعالیٰ ان سے خوش اور راضی ہے اور وہ اللہ سے خوش ہیں۔

گویا کہ اللہ تعالیٰ نے مہاجرین اور انصار کے ساتھ انہیں بھی اپنی رضا کے سرٹیفکیٹ سے سرفراز فرمایا اور یہی تابعین حضرات اس آیت کا مصداق ہیں جو عمل میں مہاجرین وانصار صحابہ رضی اللہ عنہم کے عمل کے تابع اور زمانہ کے اعتبار سے ان کے بعد تھے۔ اسی لیے عرف عام میں انہیں ”تابعی“کے لقب سے یاد کیا جاتا ہے۔ احادیث نبویہ میں ان کے بڑےفضائل ومناقب بیان کیے گئے ہیں۔

حضرت عبد اللہ بن مسعود رضی اللہ عنہ سے روایت ہے کہ رسول اللہ صلی اللہ علیہ و سلم نے فرمایا:

کہ سب سے بہتر لوگ میرے زمانہ کے ہیں( یعنی صحابہ کرام) پھر جو ان کے زمانے کے قریب ہیں ( یعنی تابعین) پھر جو ان کے زمانے کے قریب ہیں (یعنی تبع تابعین)

نبی اکرم صلی اللہ علیہ وسلم نے فرمایا: لوگوں پر ایک ایسا زمانہ آئے گا کہ ایک جماعت جہاد کرے گی تو اس سے پوچھا جائے گا :

کہ تم میں کوئی ہے جس نے اس شخص کو دیکھا ہو جو نبی کریم صلی اللہ علیہ وسلم کے ساتھ رہا ہو ؟تو وہ کہیں گے ہاں تو [ان کی برکت سے]فتح دی جائے گی۔

فضائل وکمالات کے حاملین حضرات صحابہ کرام رضی اللہ عنہم کی علمی،عملی اور اخلاقی وراثت کو امت تک پہنچانے والے تابعین کا ذکر خیر کیا جا رہا ہے۔ ان میں ایک اہم شخصیت سیدنا سعید بن مسیب رحمہ اللہ ہیں۔ ذیل میں ان کا تعارف اوار علمی کارنامے پیش خدمت ہیں۔اللہ تعالیٰ ہمیں ان کے نقش قدم پر چلنے کی توفیق عطا فرمائے۔آمین بجاہ النبی الامی الکریم

سیدنا ابومحمد سعید بن مسیب بن حزن قرشی مخزومی رحمہ اللہ جلیل القدر تابعی اور ان باکمال نفوس قدسیہ میں سے تھے جو اپنے علم وعمل کے اعتبار سے اتنے بلند بالا مقام پر فیض تھے کہ دنیائے اسلام کے پیشواء ومقتداء مانے جاتے تھے۔ آپ کے والد سیدنا مسیب اور دادا سیدنا حزن رضی اللہ عنہما دونوں صحابی تھے،فتح مکہ کے دن مشرف باسلام ہوئےتھے۔

سیدنا سعید بن مسیب رحمہ اللہ کی ولادت باسعادت حضرت عمر رضی اللہ عنہ کی خلافت کے تیسرے سال ہوئی۔

سیدنا سعید بن مسیب رحمہ اللہ ایسے دور میں پیدا ہوئے کہ ابھی عہد رسالت کی بہار کو گزرے ہوئے کوئی زیادہ عرصہ نہیں ہوا تھا۔ مدینۃ الرسول کے گلی کوچے امام الانبیاء صلی اللہ علیہ وسلم کے صحبت یافتگانوں اور جانثاروں سے کھچاکھچ بھرے ہوئے تھے،اکثراکابر صحابہ کرام رضی اللہ عنہم علوم نبوی کی تشہیر وتبلیغ کیسے مسند اشاعت پر جلوہ افروزتھے۔ادھر اللہ تعالیٰ نے ابن مسیب رحمہ اللہ کی فطرت میں حصول علم کا ذوق ودیعت رکھ دیا تھا۔ انہوں نے اس موقع و وقت کو غنیمت جانا اور ان اکابرین سے بھرپور استفادہ کیا۔گویا کہ آپ کو اسی ذوق اور جستجو نے اکابرین کے علم وعمل کا بحر بیکراں بنا دیا۔ بالاتفاق آپ اپنےزمانے کے علمی واخلاقی فضائل وکمالات کے جامع اور گوہر نایاب تھے۔اسی بات کا اقرار آپ کے ہمعصر اہل علم نے بھی کیا۔

آپ رحمہ اللہ جن حضرات کے چشمہ سے سیراب ہوئے اور ان کے علوم کو اپنے اندر سمویا، ان میں سے چند جامع کمالات شخصیات کے اسمائے گرامی یہ ہیں:

حضرت عثمان غنی ،حضرت علی المرتضیٰ ،حضرت زید بن ثابت،حضرت ابوہریرہ، حضرت سعد بن ابی وقاص،حضرت ابوموسیٰ اشعری، حضرت عائشہ،حضرت ابن عمر،حضرت عبداللہ بن عمرو،حضرت عبداللہ بن عباس رضی اللہ عنہم اجمعین۔

ان حضرات کی شاگردی، صحبت اور تربیت نے آپ کو علم وعمل کا مجمع البحرین بنادیا تھا۔آپ اپنے وقت کے بلند پایہ محدث، صف اول کے فقیہ اور بہترین معبر تھے۔

سیدنا سعید بن مسیب رحمہ اللہ کو حدیث نبوی کا خاص ذوق تھا۔ خود بیان کرتے ہیں.

کہ میں نے ایک حدیث کے حصول کے لیے کئی کئی دن اور راتوں کا سفر کیا ہے۔

ایک طرف آپ کا یہ ذوق وشوق تھا، تو دوسری طرف آپ کا مقام ولادت شہر رسول صلی اللہ علیہ و سلم تھا جو حضرات صحابہ رضی اللہ عنہم معمور تھا جو علم حدیث کے اساطین تھے،عموماً آپ نے صحابہ کرام رضی اللہ عنہم کی کثیر تعداد سے علم حدیث حاصل کیا ، لیکن زیادہ تر استفادہ آپ نے اپنے خسر سیدنا ابوہریرہ رضی اللہ عنہ سے کیا۔ چنانچہ آپ کی مرویات کا زیادہ تر حصہ سیدنا ابوہریرہ رضی اللہ کی احادیث پر مشتمل ہے۔

اللہ تعالیٰ نے آپ کو قوت حافظہ سے نوازا تھا۔ ایک مرتبہ جو بات کانوں میں پڑ جاتی تھی، وہ ہمیشہ کے لیے محفوظ ہوجاتی تھی۔

تمام ہم عصرعلماء آپ کے کمال حفظ حدیث کے معترف تھے۔چنانچہ امام مکحول رحمہ اللہ جو خود بہت بڑے محدث ہیں ،فرماتے ہیں:میں نے علم کی تلاش میں ساری دنیا کا سفر کیالیکن سعید بن مسیب رحمہ اللہ جیسے کوئی عالم نہیں ملے۔

فقیہ شام امام مکحول رحمہ اللہ کو جب ابن مسیب کے انتقال کی اطلاع ملی تو فرمایا :اب سب لوگ علم میں برابر ہوگئے۔

امام زین العابدین بن علی بن حسین فرماتے ہیں: سعید بن مسیب گزشتہ آثار کے سب سے بڑے واقف کار تھے۔

امام علی بن مدینی رحمہ اللہ فرماتے ہیں: میں تابعین کی جماعت میں سعید بن مسیب رحمہ اللہ سے زیادہ وسیع العلم کسی کونہیں جانتا۔ میرے نزدیک آپ رحمہ اللہ سب تابعین سے زیادہ جلیل القدر ہیں۔

شہاب بن عباد العصری فرماتے ہیں کہ میں حج کے بعد مدینہ میں آیا اور ان سے مدینہ کے سب سے بڑے عالم کا پوچھا کہ وہ کون ہیں؟تو انہوں نے جواب دیا کہ مدینہ کے بڑے عالم سعید بن مسیب رحمہ اللہ ہیں۔ [سیراعلام النبلاء ج4ص438]

امام قتادہ ،امام مکحول،اور امام زہری رحمہم اللہ وغیرہ فرماتے ہیں کہ ہم نے سعید بن مسیب سے بڑا عالم نہیں دیکھا [سیر اعلام النبلاء ج4ص437]

حضرات محدثین اور ماہرین فن کے نزدیک آپ کی مرویات کا مقام بہت بلند ہے۔ امام احمد بن حنبل رحمہ اللہ و دیگر ائمہ فرماتے ہیں کہ آپ کی مرسلات بھی صحاح کے مرتبے کی ہیں۔

امام محمد بن ادریس شافعی رحمہ اللہ فرماتے تھےکہ سعید رحمہ اللہ کی مرسلات ہمارے نزدیک حسن درجے کی ہیں۔

امام یحییٰ بن معین رحمہ اللہ آپ کی مراسیل کو امام حسن بصری رحمہ اللہ کی مراسیل پر ترجیح دیتے تھے۔

آپ رحمہ اللہ احادیث رسول کا بیماری کی حالت میں بھی بہت ادب واحترام کرتے تھے۔ ایک مرتبہ بیماری کی حالت میں کسی شخص نے آپ سے ایک حدیث پوچھی، آپ لیٹے ہوئے تھے، اٹھ کر بیٹھ گئے۔سائل کہنے لگا کہ میں چاہتا تھا کہ آپ کو زحمت نہ ہو تو آپ نے فرمایا کہ میں لیٹے لیٹے حدیث رسول بیان کرنا مکروہ سمجھتاہوں۔

اللہ تعالیٰ نے آپ کو فقاہت عطا فرمائی تھی۔آپ رحمہ اللہ مدینہ کے سات فقہاء میں سے تھے۔حضرت عبداللہ بن عمر رضی اللہ عنہما فرماتے ہیں: ابن مسیب ہو واللہ احد المفتین۔ [سیراعلام النبلاء ج4ص438،تہذیب التہذیب ج4ص86]

واللہ! ابن مسیب مفتیوں میں سےایک ہیں۔

امام قدامہ بن موسی فرماتے ہیں:کان ابن مسیب یفتی والصحابۃ احیاء

کہ حضرت سعید بن مسیب صحابہ کرام کی زندگی میں فتویٰ دیتے تھے۔

امام سلیمان بن موسیٰ فرماتے ہیں :سعید بن مسیب افقہ التابعین۔

کہ تابعین میں سب سے بڑے فقیہ تھے۔

آپ کے تلامذہ میں سالم بن عبداللہ،یحییٰ بن سعید انصاری،قتادہ،عمرو بن دینار،زہری،ابوجعفر محمد باقر بن علی،داود بن ابی ہند،میمون بن مہران،عطا خراسانی،عمرو بن شعیب رحمہم اللہ وغیرہ شامل ہیں۔

وفات: 94ھ میں آپ کا انتقال ہوا۔[سیراعلام النبلاء ج4ص436]