امام کے پیچھے قراءۃ نہ کرنا

ہمارے آج کے مسئلے کا عنوان ہے ترک قراءۃ خلف الامام۔ امام کے پیچھے مقتدی قرآن کریم کی تلاوت نہ کرے۔ عموما بعض حضرات اس مسئلہ کو خلط ملط کرنے اور عوام کی نگاہ سے اصل مسئلہ اوجھل کرنے کے لیے عنوان قائم یہ کرتے ہیں، فاتحہ خلف الامام کہ امام کے پیچھے فاتحہ پڑھنی چاہیے جبکہ عنوان ہے۔ اصل عنوان یہ ہے کہ امام کے پیچھے قرآن کریم پڑھنا چاہیے یا امام کے پیچھے قرآن کریم نہیں پڑھنا چاہیے۔

عجیب بات یہ ہے آپ حضرات گھر جب تشریف لے جائیں کسی عالم سے رابطہ کرنے کے بعد کتب احادیث منگوائیں اور ان کا مطالعہ فرمائیں۔ کسی محدث نے کتب حدیث میں یہ عنوان قائم ہی نہیں کیا کہ امام کے پیچھے فاتحہ پڑھیں یا فاتحہ نہ پڑھیں، عنوان یہی چلتا ہے ترک القراءۃ خلف الامام یا القراءۃ خلف الامام تو جو عنوان محدثین نے دیا ہے اور جو عنوان محدثین نے قائم کیا ہے اس کی ترتیب کے مطابق ہی گفتگو کرنی چاہیے۔ اس لیے ہم نے عنوان یہ نہیں رکھا کہ امام کے پیچھے فاتحہ نہیں پڑھنی چاہیے بلکہ اہل السنۃ والجماعۃ احناف کا مؤقف یہ ہے کہ امام کے پیچھے مقتدی کو قرآن کریم کی تلاوت نہیں کرنی چاہیے اور 114 سورتوں میں سے سورۃ فاتحہ بھی اسی طرح قرآن کریم کا حصہ ہے جس طرح الم سے لے کر والناس تک باقی 113 قرآن کا حصہ ہیں تو امام کے پیچھے قرآن کریم کی تلاوت نہیں کرنی چاہیے۔

اس کے لیے میں نے سب سے پہلے قرآن کریم پارہ نمبر 9 سورۃ الاعراف آیۃ نمبر 204 تلاوت کی ہے جس میں اللہ رب العزت ارشاد فرمارہے ہیں:

ترجمہ: اور جب قرآن کریم کو پڑھا جائے اس کو سنو اور خاموش رہو تاکہ تم پر اللہ کی رحمت نازل ہو۔ تمہارے اوپر رحم کیا جائے }

اس آیۃ کریمہ کی تفسیر بیان کرنے کے لیے حسب وعدہ میں صحا بہ کرام کا تذکرہ کروں گا میں نے اس عنوان پر گفتگو شروع کرنے سے قبل آپ حضرات سے وعدہ کیا تھا کہ قرآن کریم کی آیت اپنے مسئلہ پر میں پیش کروں گا اس کی تفسیر اپنی طرف سے نہیں کروں گا بلکہ اس کی تفسیر اصحاب پیغمبر صلی اللہ علیہ وسلم سے آپ کی خدمت میں پیش کروں گا۔ قرآن کریم کی یہ جو آیت ہے واذا قرئ القرآن بظاہر اس آیت کو پڑھنے سے یہ محسوس ہوتا ہے ہر حال میں قرآن کریم کو جب بھی پڑھا جائے باقی لوگ سنیں، خواہ قرآن کریم نماز کے اندر پڑھا جائے یا نماز کے باہر پڑھا جائے جب کہ یہ حقیقت کی بات نہیں ہے اور جو بات میں نے آپ کی خدمت میں عرض کی ہے۔بالکل یہی بات مشہور مفسر قرآن عبد اللہ بن احمد النسفی نے ذکر کی ہے جو بات میں نے آپکی خدمت میں نقل کی ہے۔ کہتے ہیں:

قرآن کریم کے ظاہر سے محسوس ہوتا ہےکہ قرآن کریم کی تلاوت نماز میں ہو یا نماز سے باہر کی جائے تو تلاوت سننے والے پر خاموش رہنا واجب ہے۔ جب کہ یہ معنی قرآن کریم کی آیت کا نہیں ہے اس آیت کا حکم کب ہے او رکس وقت کے لیے ہے اس کی تفسیر صحابہ کرام سے سماعت فرمائیں۔ امام عبد اللہ بن احمد النسفی جن کی وفات 710ھ میں ہے اپنی معروف کتاب” مدارک التنزیل وحقائق التاویل" میں تحریر فرماتے ہیں:

صحابہ کرام رضی اللہ عنہم میں سے ایک دو نہیں اکثر اصحاب پیغمبر صلی اللہ علیہ وسلم کی رائے یہ تھی کہ یہ آیت مقتدی کے سننے کے بارے میں ہے کہ جب نماز کے اندر امام قرآن کی تلاوت کررہاہو تو مقتدی امام کا قرآن سنے او ر امام کے پیچھے قرآن کریم کی تلاوت نہ کرے۔

امام احمد ابن تیمیہ جن کی وفات728ھ میں ہے مجموعہ فتاوی ابن تیمیہ میں تحریر فرماتے ہیں کہ قال احمد اجمع الناس علی انھا نزلت فی الصلوۃ اس بات پر امت کا اجتماع ہے کہ یہ آیت کریمہ نماز کے بارے میں نازل ہوئی ہے۔ نماز کے بارے کا مطلب کیا ہے ایک امام نماز پڑھ رہاہے مقتدی اسی نماز کے اندر شامل ہے حکم یہ ہے امام قرآن پڑھے اور مقتدی اس کی سماعت کرے۔

میں نے اسی نماز کی بات کیوں کی ہے؟ عموما غیر مقلدین یہ اعتراض کر گزرتے ہیں کہ جب امام قرآن پڑھ رہا ہو اس کی تلاوت کو سننا واجب ہے تو احناف کے ہاں مسئلہ یہ ہے فجر کی نماز میں امام نماز پڑھا رہاہو بعد میں اگر کوئی شخص آئے گا تو اگر اتنی گنجائش موجود ہو کہ کوئی شخص سنتیں پڑھ کر جماعت کے ساتھ شریک ہوسکتا ہو تو سنتیں پڑھے اور جماعت کے ساتھ شریک ہو۔

کہتا ہے کہ جب سنتیں پڑھے گا تو امام قرآن کریم پڑھ رہا ہے تو یہ تو قرآن نہیں سنے گا پھر نہ سننے کی وجہ سے گناہ گار ہوگا ہم نے کہا اس آیت کا معنی یہ ہے امام نماز پڑھارہاہو اسی نماز میں مقتدی امام کے پیچھے موجود ہو اس وقت حکم یہ ہے کہ امام کی قراءۃ کو سننا واجب ہے۔ اگر امام نما ز پڑھارہاہو کوئی آدمی الگ سنتیں پڑھ رہاہوتو اس حکم کے اندر داخل نہیں۔ نماز کے بعد حفظ کی درس گاہ ہے دس طالب علم اکٹھے قرآن کریم پڑھ رہے ہیں ان کے لیے حکم نہیں ہے کہ ایک پڑھے اور باقی خاموشی سے سنیں بلکہ حکم اس صورت میں ہے جماعت کی نماز ہو امام قرآن پڑھ رہا ہو مقتدی امام کے پیچھے ہو اس مقتدی کے لیے امام کے پیچھے خاموش رہنا واجب ہے۔

اس آیت کریمہ کے بعد دوسری بات یہ سمجھیں کہ سورۃ الفاتحہ کا پڑھنا بالکل اسی طرح قرآن کریم کا پڑھنا ہے جس طرح الحمد سے لے کر والناس تک قرآن کریم کا پڑھنا ہے۔ میں آسان لفظوں میں یوں کہتا ہوں کہ قراءۃ فاتحہ بھی قراءۃ قرآن ہے اور اس پر میں دلائل احادیث مبارکہ سے آپ کی خدمت میں عرض کرتاہوں۔

امام محمد بن اسماعیل بخاری رحمہ اللہ جن کی وفات 256ھ میں ہے صحیح بخاری میں یہ روایت نقل کرتے ہیں:

حضرت ابوہریرہ رضی اللہ عنہ فرماتے ہیں نبی کریم صلی اللہ علیہ وسلم اللہ اکبر فرماتے اور اس کے بعد کچھ دیر خاموش رہتے پھر قراءۃ شروع کرتے تو میں نے پوچھا یارسول اللہ صلی اللہ علیہ وسلم یہ درمیان میں جو آپ خاموشی اختیار کرتے ہیں یعنی تکبیر اور قراءۃ کے درمیان تو اس وقت آپ کیا فرماتے ہیں؟ تو نبی کریم صلی اللہ علیہ وسلم نے فرمایا اس وقت میں دعا پڑھتا ہوں:

ہم کہتے ہیں کہ نماز پڑحنے والا اس مقام پر پڑھ لے یا اور ادعیہ ماثورہ جو اس مقام پر منقول ہیں وہ پڑھ لے۔ میں عرض یہ کرنا چاہتا ہوں کہ حضرت ابو ہریرہ رضی اللہ عنہ نے سورۃ الفاتحہ کو قراءۃ سے تعبیر کیا ہے اور نبی کریم صلی اللہ علیہ وسلم نے یہ نہیں فرمایا کہ ابو ہریرہ سورۃ الفاتحہ کا پڑھنا قراءۃ نہیں ہے۔

امام محمد بن عیسی ترمذی جن کی وفات 279ھ میں ہے جامع ترمذی میں نقل کرتے ہیں:

حضرت انس رضی اللہ عنہ روایت کرتے ہیں کہ خاتم النبیین صلی اللہ علیہ وسلم اور حضرت ابوبکر وعمر وعثمان رضی اللہ عنہم قراءۃ کو سے شروع فرماتے تھے۔

تو بخاری اور ترمذی کی روایت کے مطابق سورۃ الفاتحہ کا پڑھنا قراءۃ ہے۔

اب سوال یہ پیدا ہوتا ہےکہ جب فاتحہ کا پڑھنا قراءۃ ہے امام بھی قراءۃ کرے مقتدی بھی قراءۃ کرے کیا امام کی قراءۃ کرتے ہوئے مقتدی کے لیے الگ قراءۃ کرنا ضروری ہے یا امام کی قراءۃ مقتدی کے لیے کافی ہے اور مقتدی کو قراءۃ کرنے کی ضرورت نہیں؟

اس کےلیے احادیث میں آپ کی خدمت میں پیش کرتا ہوں:

حضرت ابوبکر عبد اللہ بن محمد ابن ابی شیبہ جن کی وفات 235ھ میں ہے اپنی کتاب مصنف ابن ابی شیبہ میں تحریر فرماتے ہیں:

حضرت ابو جعفر احمد بن محمد الطحاوی جن کی وفات 321ھ میں ہے اپنی معروف کتاب شرح معانی الآثار میں فرماتے ہیں:

حضرت احمد بن ابی بکر جن کی وفات 840ھ میں ہے اپنی کتاب میں نقل فرماتے ہیں

اور یہ حدیث امام بخاری اور مسلم رحمہ اللہ کی شرائط کے مطابق ہے۔

حضرت جابر بن عبد اللہ رضی اللہ عنہ فرماتےہیں کہ ان روایا ت کا خلاصہ یہ ہے نبی کریم صلی اللہ علیہ وسلم نے فرمایا من کان لہ امام فقراءۃ الامام لہ قراءۃ جس کا امام موجود ہو اس کے امام کی قراءۃ اس مقتدی کی قراءۃ ہے گو یا امام کے ہوتے ہوئے اور امام کے قراءۃ کرتے ہوئے مقتدی کو قراءۃ کی ضرورت نہیں بلکہ امام کی قراءۃ مقتدی کی قراءۃ ہے اس میں الحمد ہو الم ہو اس میں قل اعوذ برب الناس ہو 114 سورتوں کا یہی حکم ہے نبی کریم صلی اللہ علیہ وسلم کی احادیث مبارکہ سے ثابت ہے کہ امام کی قراءۃ مقتدی کی قراءۃ ہے۔ اس کے بارے میں نبی کریم صلی اللہ علیہ وسلم کا واضح ارشاد ہے۔

سورۃ فاتحہ کے بارے میں بعض حضرات کو اشکال رہتاہے آپ نے ایسی احادیث پیش کی ہیں کہ اس میں مطلقاً امام کی قراءۃ کو مقتدی کی قراءۃ کہاگیا ہے کوئی ایسی حدیث پیش کریں جس میں صاف طورپر امام کے پیچھے سورۃ فاتحہ کی قراءۃ کے بارے میں نبی کریم صلی اللہ علیہ وسلم نے ارشاد فرمایا ہو۔

امام ابو جعفر احمد بن محمد الطحاوی جن کی وفات 321 ھ میں ہے شرح معانی الآثار میں فرماتے ہیں:

حضرت جابر فرماتے ہیں نبی کریم صلی اللہ علیہ وسلم نے ارشاد فرمایا جس شخص نے ایک رکعت نماز پڑھی اور اس میں ام القرآن یعنی فاتحہ کو نہیں پڑھا اس کی گویا نماز ہی نہیں۔ ہاں اگر امام کے پیچھے ہو تو نبی پاک صلی اللہ علیہ وسلم نے فیصلہ فرمایا کہ ہر شخص کو نماز میں ہر رکعت میں فاتحہ پڑھنی چاہیے لیکن اگر امام کے پیچھے ہو پھر اس شخص کو فاتحہ پڑھنے کی حاجت نہیں۔

حضرت عبد الوہاب ابن مندہ وفات 475ھ اپنی کتاب الفوائد میں حضرت جابربن عبد اللہ رضی اللہ عنہ سے نقل کرتے ہیں:

جس شخص نے نماز پڑھی اور اس میں فاتحۃ الکتاب کو نہ پڑھا گویا اس نے نماز کو نہیں پڑھا الایہ کہ امام کے پیچھے ہو معلوم ہوا کہ امام کے پیچھے فاتحۃ الکتاب پڑھنا ضروری نہیں۔

احمد بن حسین بن علی البیہقی جن کی وفات 458ھ میں ہے، اپنی کتاب کتاب القراءۃ خلف الامام میں حضرت جابر بن عبد اللہ رضی اللہ عنہ سے نقل کرتے ہیں نبی کریم صلی اللہ علیہ وسلم نے فرمایا:

جس شخص نے سورۃ فاتحہ نہ پڑھی اس کی نماز نہیں ہوتی الا یہ کہ وہ شخص امام کے پیچھے ہو۔

یہ تین روایات جو میں نے حضرت جابر رضی اللہ کی نقل کی ہیں، ایک روایت میں صلوۃ کا لفظ ہے ایک میں رکعۃ کا لفظ ہے نماز پڑھی یا رکعت، اس نے پڑھی او رفاتحہ نہ پڑھی نماز نہیں ہوگی۔اگر امام کے پیچھے موجود ہو تو فاتحہ پڑھنے کی حاجت نہیں۔

حضرت محمد بن یزید قزوینی جن کی وفات 273 ھ میں ہے اپنی کتاب سنن ابن ماجہ میں حضرت ابو ہریرہ رضی عنہ سے نقل کرتے ہیں:

حضرت ابو ہریرہ رضی اللہ عنہ فرماتے ہیں نبی کریم صلی اللہ علیہ وسلم نے فرمایا امام اس لیے بنایا جاتا ہے کہ امام پر اعتماد کیا جائے۔ جب امام اللہ اکبر کہے تم بھی اللہ اکبر کہو اور جب امام قرآن شروع کرے تم خاموش ہو جاؤ اور جب امام غیر المغضوب علیہم ولاالضالین پڑھے تب تم آمین کہہ دو۔

تو نبی کریم صلی اللہ علیہ وسلم نے خود تقسیم فرما دی ہے امام الحمد سےلے کر ولاالضالین تک پڑھے گا اور مقتدی نہیں پڑھے گا خاموش رہے گا جب امام ولاالضالین پڑھ چکے تو مقتدی آمین کہے گا یہ نبی کریم صلی اللہ علیہ وسلم کا ارشاد مبارک تھا کہ امام کے پیچھے مقتدی کو سورۃ فاتحہ پڑھنے کی حاجت نہیں ہے۔

ترک قراءۃ خلف الامام پر پیغمبر صلی اللہ علیہ وسلم کا اپنا عمل کیا ہے؟ امام محمد بن یزید قزوینی المعروف ابن ماجہ جن کی وفات 273ھ میں ہے اپنی کتاب سنن ابن ماجہ میں فرماتے ہیں:

کہ رسول اللہ صلی اللہ علیہ وسلم نے قراءۃ کو وہاں سے شروع فرمایا جہاں سے حضرت ابوبکر رضی اللہ عنہ تھے۔

حضرت امام احمد بن محمد بن حنبل رحمہ اللہ جن کی وفات 241ھ میں ہے اپنی کتاب مسند احمد میں نقل فرماتے ہیں:

حضرت امام احمد حسین البیہقی وفات 458 ھ اپنی کتاب السنن الکبری میں نقل کرتے ہیں:

ان تین روایات کا خلاصہ یہ ہے نبی کریم صلی اللہ علیہ وسلم جب مرض الوفات میں تھے اور حدیث مبارک میں تصریح موجود ہےکہ اسی مرض میں خاتم الانبیاء اس دنیا سے رخصت ہوئے۔ مرض الوفات میں خاتم الانبیاء صلی اللہ علیہ وسلم نے حضرت ابو بکر صدیق رضی اللہ عنہ کو حکم دیاقل ابا بکر یصلی بالناس ابوبکر سے کہو میرے مصلے پر جاکر نماز پڑھائے۔صدیق اکبر رضی اللہ عنہ نے نماز پڑھانا شروع کی نبی کریم صلی اللہ علیہ وسلم پیچھے سے تشریف لائے صحابہ کرام نے سبحان اللہ کہہ کر تسبیح کہی صدیق اکبر رضی اللہ عنہ پیچھے ہٹے نبی کریم صلی اللہ علیہ وسلم تشریف لائے صدیق دائیں جانب مقتدی بنے نبی پاک صلی اللہ علیہ وسلم بائیں جانب کھڑے ہوکر امام بنے باقی صحابہ پیچھے تھے تو حضرت صدیق اکبر رضی اللہ عنہ تلاوت شروع فرماچکے تھے حضرت ابن عباس رضی اللہ عنہما فرماتے ہیں:

جہاں تک ابوبکر صدیق رضی اللہ عنہ نے قراءۃ فرمائی تھی اللہ کے پیغمبر نے وہاں سے شروع کی ہے دوبارہ سورۃ الفاتحہ نہیں پڑھی آج غیر مقلدین کہتے ہیں اگر امام قراءۃ شروع کرچکا ہو آپ حضرات امام کے پیچھے شریک ہوں پہلے فاتحہ پڑھیں پھر امام کے پیچھے باقی نماز پڑھیں۔ یہاں تک کہا گیا ہے اگر امام رکوع میں ہو اور آپ فاتحہ پڑھے بغیر رکوع میں چلے گئے آپ کی نماز نہیں ہوگی یہ کہنے کی باتیں ہیں لیکن دلائل نہیں دے سکتے۔

مجھے وہاڑی کے قریب ایک جگہ ہے ماجھی وال وہاں سے فون آیا مولانا اسلم صاحب کا چند دن قبل ایک سنی، حنفی، آدمی ،امام نماز پڑھا رہا تھا یہ رکوع میں جاکر شامل ہوا بعد میں اس نے امام کے ساتھ سلام پھیرا غیر مقلد نے کہا چونکہ تم نے فاتحہ نہیں پڑھی اس لیے تمہاری نماز نہیں ہوئی۔

تاریخ طے ہوگئی، یکم فروری مناظرے کا دن طے ہوا مجھے ان حضرات نے فون پر حکم دیا میں نے کہا ہم بھی ان شاء اللہ آپ کی خدمت میں پہنچیں گے مگر مجھے چڑھتے سورج کی طرح یقین ہے کہ غیر مقلد مناظرے کے اندر نہیں آئیں گے تاریخ موجود ہے یکم فروری کی تاریخ درج ہے مگر غیر مقلدین نےکہا ہم اس موضوع پر مناظرے کے لیے تیار نہیں ہیں، الحمد للہ میں اللہ کی ذات پر بھروسہ کرکے کہتا ہوں میں خواہ مخواہ نہیں کہتا۔

اسی اتوار 4جنوری کوشہرعبد الحکیم ؛آپ رابطہ کریں؛ ہمارا مناظرہ طے تھا نماز مکمل کے عنوان پر تحریر درج تھی دستخط میرے اس پر موجود تھے یہاں تک لکھا کہ اگر کوئی مناظر نہ آئے یا ہار جائے تو مخالف فریق اپنا مسلک بدل دے گا، 4جنوری 11بجے جناح کالج عبد الحکیم میں پہنچا اور تولمبہ مدرسہ کے اساتذہ کرام اس کے اندر موجود تھے محمد مجتبی شاہ صاحب، مولانا ریاض صاحب، آپ ان تمام احباب سے رابطہ کریں ہم نے پونے گھنٹہ تک کھڑے ہوکر بیان کیا۔ عبد الحکیم شہر کا چکر لگایا مگر غیر مقلدین کو میدان مناظرہ میں آنے کی جرأت نہیں ہوئی اور ان شاء اللہ ثم انشاءاللہ آئندہ بھی نہیں آئیں گے۔

خیر میں عرض کررہاتھا کہتے ہیں اللہ کے پیغمبر نے ابوبکر صدیق رضی اللہ عنہ کی قراءۃ جہاں تک ہوئی تھی وہاں سے آگے قراءۃ کی ہے خاتم الانبیاء صلی اللہ علیہ وسلم نے خود بھی فاتحہ نہیں پڑھی بلکہ امام کی فاتحہ پر اعتبار کرلیا۔

تقریر رسول فی ترک القراءۃ خلف الامام یعنی نبی کی موجودگی میں صحابی عمل کرے نبی خاموش رہے اس کا نام ہے تقریر پیغمبر، نبی عمل فرمائے اس کا نام ہے فعل پیغمبر، نبی ارشاد فرمائے اس کانام ہے قول پیغمبر صلی اللہ علیہ وسلم، صحابی عمل کرے پیغمبر خاموش رہے اس کانام ہے تقریر پیغمبر، نبی صلی اللہ علیہ وسلم کی موجودگی میں صحابی نے امام کے پیچھے فاتحہ نہیں پڑھی پیغمبر خاموش رہے اس بات کی دلیل ہے کہ پیغمبر نے مہر تصدیق ثبت کردی ہے۔

حضرت محمد بن اسماعیل بخاری جن کی وفات 256ھ میں ہے کتاب صحیح بخاری میں فرماتے ہیں

حضرت ابوبکرہ رضی اللہ عنہ نبی کریم صلی اللہ علیہ وسلم کی خدمت میں آئے اللہ کے پیغمبر نماز پڑھارہے تھے اور حضور صلی اللہ علیہ وسلم رکوع کے اندر تھے ابوبکرہ تشریف لائے پچھلی صف کے اندر ہی رکوع میں چلے گئے اور رکوع کی حالت میں آکر جماعت سے مل گئے نبی صلی اللہ علیہ وسلم کو نماز کے بعد بتایا گیا کہ ابوبکرہ نے عمل یوں کیا ہے کہ جماعت کھڑی تھی پچھلی صف میں آکر رکوع میں کھڑے ہوگئے اوراسی طرح چلتے ہوئے حالت رکوع میں نماز میں ملے ہیں نبی پاک صلی اللہ علیہ وسلم نے فرمایا زادک اللہ حرصا اللہ اس عبادت پہ تمہارے حرص میں اصافہ کرے ولاتعد آئندہ ایسا نہ کرنا کہ رکوع کی حالت میں چلتاہوا آگے آئے بلکہ صف کے اندر آکر رکوع میں شامل ہونا۔

اس کابعض محدثین نے معنی یہ کیا ہے ولا تعد اس نماز کا اعادہ نہ کرنا نماز لوٹانے کی ضرورت نہیں ہے اور ولاتعد کی دلیل یہ بھی ہے ابوبکرہ کا نماز کو دوبارہ پڑھنا ثابت نہیں ہے اگر نہ ہوتی اللہ کے پیغمبر صلی اللہ علیہ وسلم فرماتے نماز پڑھو نبی کریم صلی اللہ علیہ وسلم نے دوبارہ نماز پڑھنے کا حکم نہیں دیا۔

اسی حدیث کو امام احمد بن شعیب النسائی جن کی وفات 303ھ میں ہے اپنی کتان سنن نسائی میں نقل کیا ہے۔

اور اسی حدیث مبارک حضرت امام احمد بن حسین بن علی البیہقی جن کی وفات 458ھ میں ہے اپنی کتاب سنن کبری میں نقل کیا ہے۔

نبی کریم صلی اللہ علیہ وسلم کا قول ہے امام کے پیچھے مقتدی کو فاتحہ کی حاجت نہیں پیغمبر کا اپنا عمل مقتدی کے لیے فاتحہ پڑھنے کی ضرورت نہیں اللہ کے پیغمبر صلی اللہ علیہ وسلم کی تقریر یعنی صحابی کا عمل نبی کی موجودگی میں کہ امام کے پیچھے فاتحہ پڑھنے کی ضرورت نہیں ہے۔

خاتم الانبیاء صلی اللہ علیہ وسلم کی تقریر پیغمبر کے فعل اور پیغمبر کے قول کے بعد خلفاء راشدین کا کا عمل ملاحظہ فرمائیں۔

حضرت امام عبد الرزاق ابن ہمام جن کی وفات 211ھ میں ہے اپنی کتاب مصنف عبدالرزاق میں نقل کرتے ہیں۔

کہتے ہیں کہ حضرت خاتم الانبیاء، ابوبکر وعمر وعثمان رضی اللہ عنہماامام کے پیچھے قراءۃ سے منع فرماتے تھے۔

عبداللہ بن ہمام اپنی اسی کتاب میں حضرت علی رضی اللہ عنہ کا حکم نقل کرتے ہیں۔

علی المرتضی رضی اللہ عنہ امام کے پیچھے قراءۃ سے منع فرماتے تھے۔

ان فتاوی کے بعد تابعین کرام رحمہم اللہ بھی کے قائل نظر آتے ہیں۔

امام عبد اللہ بن محمد جن کی وفات 235ھ میں ہے اپنی کتاب مصنف ابن ابی شیبہ میں نقل کرتے ہیں:

مشہور تابعی حضرت ابراہیم رحمہ اللہ امام کے پیچھے قرآن کریم پڑھنا مکروہ سمجھتے تھے۔

حضرت عبد اللہ بن محمد جن کی وفات 235ھ میں ہے اپنی کتاب مصنف ابن ابی شیبہ میں نقل کرتےہیں

فرماتے ہیں میں نے سوید بن غفلہ سے پوچھا میں امام کے پیچھے ظہر اور عصر میں پڑھوں؟ فرمایا کہ امام کے پیچھے تونے قرآن کی تلاوت نہیں کرنی۔

میں نےسب سے پہلے قرآن کریم کی آیت فاذا قرئ القرآن فاستمعوا لہ وانصتوا سے ثابت کیا اصحاب پیغمبر سے کہ یہ آیت حالت نماز میں امام کے پیچھے قرآن کریم سننے کے بارے میں نازل ہوئی۔ امام قرآن پڑھے اور مقتدی سنے، خاتم الانبیاء صلی اللہ علیہ وسلم کی حدیث مبارکہ سے کہ فاتحہ کا پڑھنا قراءۃ ہے نبی پاک صلی اللہ علیہ وسلم کے ارشادات سے امام کی قراءۃ مقتدی کی قراءۃ ہے۔خاتم الانبیاء صلی اللہ علیہ وسلم کے فعل مبارک سے کہ امام کی قراءۃ پر اعتبار کیا، پیغمبر صلی اللہ علیہ وسلم کے دور میں تقریر پیغمبر سےصحابی نے امام کی قراءۃ پر اعتماد کیا ،خلفائے راشدین کا فتوی کہ امام کے پیچھے مقتدی کو قراءۃ نہیں کرنی چاہیے اور اسی طرح تابعین کا عمل اور تابعین کا فتوی کہ امام کے پیچھے قراءۃ مکروہ ہے۔

اللہ رب العزت ہمیں قرآن کریم کی آیت پر عمل کرنے کی توفیق عطا فرمائے۔ نبی کریم صلی اللہ علیہ وسلم کے قول وفعل اور تقریر پر عمل کی توفیق عطا فرمائے خلفائے راشدین کے فتوے کوماننے کی توفیق عطا فرمائے اور تابعین کے مبارک عمل اور تابعین کے فتوے کو قبول کرنے کی توفیق عطا فرمائے ان دلائل کی روشنی میں اہل السنت والجماعت احناف کا مسلک یہ ہے کہ مقتدی امام کے پیچھے قراءۃ نہ کرے نہ سورۃ فاتحہ نہ کوئی دیگر صورت بلکہ امام کی قراءۃ پر مقتدی کو اعتماد کرنا چاہیے۔ اللہ ہمیں ان دلائل پر عمل کرنے کی توفیق عطا فرمائے۔

گذشتہ نشست میں میں نے آپ کی خدمت میں عرض کیا تھا کہ آپ حضرات چٹیں لکھیں وہ چٹیں جو مجھ سے متعلقہ نہیں ہوتیں ان کو ایک طرف رکھ دیتے ہیں۔ چٹیں آئی ہیں میں نے جواب دیا اس میں ایک چٹ آئی ہے تین طلاق کے موضوع پر اسے کہتے ہیں سوال گندم جواب چنا سوال کیا ہے اور جواب کیا دیا جارہاہے میں نے گزارش کی جن مسائل کی گفتگو ہے ان مسائل کی چٹیں لکھیں جب تین طلاق کی باری آئے گی تو آپ حضرات اس پر چٹیں لکھیں گے ان شاء اللہ اور پھر جواب دیں گے آپ حضرات دعا فرمائیں یہ جو ہمارا سلسلہ چلا ہے اللہ اس کو آگے تک چلانے کی توفیق عطا فرمائے اب اسی طرح مسائل چلتے رہیں گے انشاءاللہ۔

حضرت امام بخاری رحمہ اللہ نے عبادہ بن صامت رضی اللہ سے ایک حدیث نقل کی ہے غیر مقلدین اس حدیث مبارکہ کو پیش کرتے ہیں اور دعوی کرتے ہیں کہ جو شخص فاتحہ نہ پڑھے اس کی نماز نہیں ہوتی۔ اس میں امام بھی ہے مقتدی بھی اور منفرد بھی ہے یہ سب کو شامل ہے لہذا سب کے لیے یہ حکم ہے سب کو فاتحہ پڑھنا ضروری ہے۔ فاتحہ نہیں پڑھیں گے تو نماز نہیں ہوگی۔

اب اس حدیث مبارک کا ایک معنی وہ ہے جو غیر مقلد کرتے ہیں اور ایک معنی وہ ہے جو پیغمبر صلی اللہ علیہ وسلم کا صحابی کرے۔ ایک معنی وہ جو چودہ سو سال کے بعد غیر مقلد کرے اور ایک معنی وہ جو اس حدیث کا مرکزی راوی کرے۔ فرق یہ ہے کہ ہم صحابی کا معنی مانتے ہیں اور غیر مقلد وہابی کا معنی مانتے ہیں تو اختلاف تو فہم وہابی اور فہم صحابی میں ہوگا ناں! اختلاف اس میں نہیں کہ فاتحہ قراءۃ نہیں۔ اب ایک معنی انہوں نے کیا ایک معنی ہم نے کیا۔

حضرت امام ترمذی رحمہ اللہ جامع ترمذی جلد1صفحہ 86 پر ارشاد فرماتے ہیں حضرت امام احمد بن حنبل رحمہ اللہ نے فرمایا جابر بن عبد اللہ رضی اللہ عنہ پیغمبر کے صحابی ہیں وہ اس حدیث کا معنی کرتے ہیں ان ھذا اذا کان وحدہ یہ حدیث مبارک اس وقت ہے کہ جب آدمی تنہا نماز پڑھ رہا ہو اور ہم بھی کہتے ہیں کہ جب آدمی تنہا نماز پڑھ رہاہو تو اس کے لیے فاتحہ پڑھنا ضروری ہے مسئلہ یہ تھا کہ مقتدی کے لیے ضروری ہے یا نہیں اس حدیث کا تعلق مقتدی کے ساتھ نہیں ہے صحابی رسول کے مطابق اس کا تعلق منفرد اور اکیلے آدمی کی نماز کے ساتھ ہے۔

حضرت سلیمان بن اشعث جن کی وفات 275ھ میں ہے اپنی کتاب سنن ابو داؤد جلد نمبر 1صفحہ 126 پر نقل فرماتے ہیں سفیان بن عیینہ نے اس روایت کا معنی بیان کیا لمن یصلی وحدہ،اور ایک بات یہ ذہن نشین فرمالیں۔ کہ سفیان بن عیینہ ہی سے امام بخاری رحمہ اللہ روایت کرتے ہیں سفیان بن عیینہ سے امام ابو داود لاتے ہیں، فرق یہ ہے کہ امام بخاری نے روایت کو پیش کیا کا لفظ صحیح بخاری میں نہیں ہے سنن ابی داود میں فصاعدا کا لفظ بھی ہے۔ اور سفیان بن عیینہ سے معنی بھی ہے گویا امام ابوداود فرمانا چاہتے ہیں پوری حدیث یہ ہے اس شخص کی نماز نہیں ہوگی جو سورۃ الفاتحہ اور فاتحہ کے ساتھ کچھ اور نہ پڑھے۔ یعنی فاتحہ بھی پڑھے اور فاتحہ کےساتھ اور بھی پڑھے فرمایا کہ اس کا تعلق مقتدی کے ساتھ نہیں ہے بلکہ لمن یصلی وحدہ یہ منفرد کے لیے ہے کہ فاتحہ بھی پڑھے اور اس کے ساتھ ایک اور سورۃ کی تلاوت بھی کرے محض فاتحہ پڑھنا اس کے لیے کافی نہیں۔

ایک بڑی مشہور حدیث پیش کی جاتی ہے صحیح مسلم میں حضرت ابو ہریرہ رضی اللہ عنہ ارشاد فرماتے ہیں:

حضرت ابوہریرہ رضی اللہ عنہ نے فرمایا کہ نبی کریم صلی اللہ علیہ وسلم نے ارشاد فرمایا جس شخص نے نماز پڑھی اور اس میں سورۃ الفاتحہ نہ پڑھی تو اس کی نماز ناقص ہے کسی شخص نے عرض کیا کہ حضرت ہم تو امام کے پیچھے ہوتے ہیں تو ابو ہریرہ رضی اللہ عنہ نے اقرٲبھا فی نفسک اس کا معنی غیر مقلدین یہ کرتے ہیں کہ اقرٲ بھا فی نفسک کا مطلب یہ ہے کہ تو امام کے پیچھے آہستہ پڑھ لیا کر کہتے ہیں دیکھو حدیث موجود ہے کہ فاتحہ کے بغیر نماز ناقص اور نامکمل ہوتی ہے۔

ایک اس کا جواب یہ ہے کہ حضرت ابو ہریرہ رضی اللہ عنہ کا اپنا جملہ ہے لہذا یہ حدیث بیان کرکے یہ کہنا کہ اللہ کے نبی فرماتے ہیں امام کے پیچھے فاتحہ آہستہ پڑھا کرو یہ اللہ کے پیغمبر پر بہتان ہے اور الزام ہے اللہ کے پیغمبر صلی اللہ علیہ وسلم نے نہیں فرمایا بلکہ حضرت ابو ہریرہ رضی اللہ عنہ فرماتےہیں۔

غیر مقلدین انکار کرنے پر آئیں تو کہتے ہیں جی صحابہ کا قول حجت نہیں ہے اورماننے پر آئیں تو صحابی کے قول کو بطور دلیل پیش کرتے ہیں۔

تو اقرٲ بھا فی نفسک نبی پاک صلی اللہ علیہ وسلم کا ارشاد نہیں ہے بلکہ صحابی حضرت ابو ہریرہ رضی اللہ عنہ کا قول ہے اور اقرٲ بھا فی نفسک کا یہ معنی کرنا درست نہیں کہ آہستہ پڑھا کرو اقرٲ بھا فی نفسک کا معنی قرآن کریم کی روشنی میں پوچھیں احادیث پیغمبر کی روشنی میں پوچھیں اگر نفس پر فی داخل ہو تو فی نفس کا معنی الگ ہوتا ہے یا فی نفسک کا معنی آہستہ ہوتا ہے؟ فی نفس کا معنی کیا ہے؟

قرآن کریم میں اللہ رب العزت نے فرمایا کہ وہ بڑے بڑے لوگ جو مجمع میں دعوت قبول کرنے میں اپنی سبکی محسوس کرتے ہیں تو میرے پیغمبر ان کو دعوت دو لیکن کیسے؟ فی انفسھم اب فی انفسھم کا معنی کریں کہ آہستہ دعوت دو تو آہستہ اتنی پڑھو جس کو وہ سنیں ہی نہیں اس دعوت دینے کا کیا فائدہ؟ قل لھم فی انفسھم کا معنی یہ ہےکہ ان کو دعوت علیحدہ دو جب اکیلے ہوں تو دعوت دو تو فی انفسھم کا معنی ہوا اس کا تعلق آہستہ کے ساتھ نہیں ہے بلکہ الگ ہونے کے ساتھ ہے اور ہم بھی کہتے ہیں کہ الگ ہونے کا مسئلہ اور ہے اور آہستہ ہونے کا مسئلہ اور ہے۔

امام بخاری رحمہ اللہ نے حدیث مبارک نقل کی ہے نبی کریم صلی اللہ علیہ وسلم نے فرمایا من ذکرنی فی نفسہ ذکرتہ فی نفسجو آدمی مجھ کو فی نفسہ یادکرے گا اب اس کا معنی محدثین نے یہ نہیں کیا جو مجھے آہستہ یاد کرے گا میں آہستہ یاد کروں گا بلند آواز سے یاد کرے گا بلند آواز سے یاد کروں گا۔ فرمایا جو مجھے خلوت میں یاد کرےگا میں اسے خلوت میں یاد کروں گا اور جو مجھے مجمع میں یاد کرے گا میں اس کو مجمع میں یاد کروں گا من ذکرنی فی ملأذکرتہ فی ملأخیرا منہ ملأکا تذکرہ کرنا اس بات کی دلیل ہے کہ فی نفس سے مراد خلوت ہے آہستہ نہیں۔

امام بخاری رحمہ اللہ فرماتے ہیں:

اگر کوئی آدمی اپنے نفس میں اپنے جی میں طلاق دے تو یہ طلاق شمار نہیں ہوگی اپنے دل میں پڑھی جانے والی فاتحہ بھی قراءۃ شمار نہیں ہوگی ابوہریرہ رضی اللہ عنہ فرمانا چاہتے ہیں اس کے وسوسے کو دور کرنے کے لیے اقرٲ بھا فی نفسک یعنی تو قرآن کریم آہستہ نہیں بلکہ اپنے دل میں یعنی تو امام کی پڑھی جانے والی قراءۃ کا تصور کرلیا کر کہ جو امام قرآن پڑھ رہا ہے اپنے دل میں اس تلاوت کا تو بھی تصور کرلیا کر تو یہ نہیں فرمایا کہ تو آہستہ قرآن امام کے پیچھے پڑھ لیا کر۔

اور سب سے اہم ایک بات اور سمجھیں۔ اس شخص کا سوال کرنا اس بات کی دلیل ہے اس وقت عموما مزاج امام کے پیچھے قراءۃ کرنے کا نہیں تھا کیوں حضرت ابوہریرہ رضی اللہ عنہ نے جب فرمایا اقرا بھا فی نفسک تو اس نے کہا جی ہم بسا اوقات امام کے پیچھے ہوتے ہیں، تو یہ سوال کیوں کیا؟

مثال کے طور پر اس درس سے فراغت کے بعد مجھے آپ پوچھتے ہیں کہ مولانا آپ کہا ں جارہے ہیں؟ میں نے کہا جی سرگودھا جارہاہوں تو مجھے آپ کہیں جی یہ ہمارا ساتھی ہے اس کو بھی ساتھ لے جائیں میں کہتا ہوں جی میرے ساتھ گھر والے بھی ہیں۔ اب اس کا مطلب یہ ہے کہ میں آپ کو ساتھ نہیں لے جاسکتا عذر پیش کررہاہوں۔ حضرت ابوہریرہ رضی اللہ عنہ نے فرمایا کہ فاتحہ نہ پڑھو نماز ناقص ہے آدمی نے کہا جی ہم تو امام کے پیچھے ہوتے ہیں۔ یعنی اس کا ذہن یہی تھا کہ امام کے پیچھے فاتحہ نہیں پڑھی جاتی آپ کہتے ہیں ناقص ہوتی ہے امام کے پیچھے ہوں تو پھر کیا کریں؟ تو اس سوال کا انداز بتارہاہے اس وقت عموماًً مزاج امام کے پیچھے فاتحہ نہ پڑھنے کا تھا حضرت ابو ہریرہ رضی اللہ عنہ سے جس طرح حدیث مبارکہ نقل کی گئی ہے یہ حدیث مبارک بھی ہے۔

اور حدیث مبارک مکمل حضرت ابو ہریرہ رضی اللہ عنہ سے حضرت امام بیہقی نے کتاب القراءۃ میں نقل کی ہے وہ روایت آپ کے سامنے بیان نہیں کریں گے حضرت ابو ہریرہ رضی اللہ عنہ فرماتے ہیں:

ہر وہ نماز جس میں فاتحہ نہ پڑھی جائے وہ نماز ناقص ہے مگر وہ نماز جو امام کے پیچھے ہے۔ تو حضرت ابو ہریرہ رضی اللہ عنہ تو خود فرمارہے ہیں کہ نماز ناقص اس وقت ہوتی ہے جب آدمی فاتحہ نہ پڑھے اور اکیلا ہو لیکن اگر امام کے پیچھے موجود ہوتو اس آدمی کو فاتحہ پڑھنے کی حاجت نہیں ہے بلکہ اس آدمی کی نماز کامل اور مکمل ہے۔

جامع ترمذی سے ایک حدیث مبارک پیش کی جاتی ہے حضرت عبادہ بن صامت رضی اللہ عنہ فرماتے ہیں:

نبی کریم صلی اللہ علیہ وسلم نے صبح کی نماز پڑھی

نبی کریم صلی اللہ علیہ وسلم قراءۃ فرمارہے تھے اور بوجھ محسوس فرمارہے تھے فلما انصرف اللہ کے پیغمبر نماز سے فارغ ہوئے فرمایا انی اراکم تقرؤن وراء امامکم تم امام کے پیچھے قراءۃ کرتے ہو؟ ہم نے کہا یا رسول اللہ ای واللہ جی ہاں اللہ کی قسم ہم امام کے پیچھے قراءۃ کرتے ہیں فرمایا کہ فرمایا کہ ٹھیک ہے تم قراءۃ کیا کرو مگر تم امام کے پیچھے قراءۃ نہ کیا کروسوائے سورۃ فاتحہ کے فاتحہ پڑھ لو باقی قراءۃ نہ کرو کیونکہ فاتحہ کے بغیر نماز مکمل نہیں ہوتی۔

عبادہ بن صامت رضی اللہ عنہ کی حدیث مبارک یہ جامع ترمذی میں ہے۔ یہ بات ذہن نشین فرمالیں حضرت امام ترمذی رحمہ اللہ نے اس حدیث مبارک کو نقل کیا ہے لیکن یہ کوئی نہیں بیان کرتا امام ترمذی نےکس مقام پر بیان کیا ہے۔ حضرت امام ترمذی رحمہ اللہ کی خوبی یہ ہے ایک مسئلہ پر دو قسم کی روایا ت لاتےہیں اور دونوں پر پھر باب قائم کرتے ہیں پہلے امام ترمذی رحمہ اللہ نے باب قائم کیا باب ماجاء فی القراءۃ خلف الامام امام کے پیچھے قراءۃ کرنی چاہیے پھر امام ترمذ ی نے ایک باب قائم کیا ہے باب ترک القراءۃ خلف الامامکہ امام کے پیچھے قراءۃ نہیں کرنی چاہیے امام ترمذی حضرت عبادہ بن صامت رضی اللہ عنہ کی حدیث کو باب قراءۃ خلف الامام کے تحت لائے ہیں۔

اور اس کے بعد پھر باب قائم کیا تو گویا امام ترمذی ثابت کرنا چاہتے ہیں حدیث عبادہ بن صامت رضی اللہ عنہ متروک ہے پہلے باب قائم کیا امام کے پیچھے قراءۃ کرنے کا کچھ احادیث اس کے تحت لائے پھرباب قائم کیا امام کے پیچھے قراءۃ نہ کرنے کا پھر احادیث اس کے تحت لائے ہیں امام ترمذی رحمہ اللہ جس کو پہلے باب کے تحت لائے ہیں اس کے بعد باب ترک کا قائم کرکے امام ترمذی رحمہ اللہ نے ثابت کردیا کہ یہ حدیث متروک ہے اس پر ہمیں بھی کوئی اشکال نہیں ہے یہ پہلے مسئلہ تھا اب یہ مسئلہ نہیں ہے۔

اس حدیث مبارک کےرواۃ کو دیکھیں اس حدیث کا ایک راوی ہے محمد بن اسحاق اس کے بارے میں امام ذہبی فرماتے ہیں امام مالک رحمہ اللہ نے کہا یہ دجال تھا،

ابن حجر عسقلانی نے تہذیب التھذیب میں فرمایا ہے کہ محمد بن اسحاق کذاب ہے۔

طبقات المدلسین میں ابن حجر فرماتے ہیں اس کا ایک راوی مکحول مدلس ہے۔

غیر مقلدین کا موجودہ وقت کا ایک مولوی جو غیر مقلدین کے نزدیک حجت ہے زبیر علی زئی ، غیر مقلدین اس کو ذہبی زمان کہتےہیں ہمارے اتحاد اہل السنت والجماعت کے سہ ماہی رسالہ قافلہ حق میں مسلسل اس کذاب اور دجال کے جھوٹ لکھے جا رہے ہیں۔ آج تک اپنے جھوٹوں کو وہ سچ ثابت نہیں کر سکا۔ جو تمہارا ذہبی ہے ابھی تک کسی ایک جھوٹ پر وہ یہ نہیں کہہ سکا کہ جی میں جھوٹ نہیں بولتا میں سچ کہتا ہوں۔ ہمارے ہاں کذاب ہے تمہارے ہاں ذہبی زمان ہے، اس ذہبی کذاب نے اپنی کتاب نور العینین میں لکھا ہے کہتا ہے مدلس کی روایت قابل قبول نہیں۔

ایک راوی محمد بن اسحاق جو کذاب ہے ایک راوی مکحول جو مدلس ہے اور تم نے خود کہا کہ مدلس کی روایت قابل قبول نہیں ہوتی امام ترمذی رحمہ اللہ نے اس کو متروک کہا ہے راوی دجال کذاب تھا ایسی روایت پیش کرو کہ جس کے راوی دجال اور کذاب بھی نہ ہوں اور اس روایت کو محدثین متروک نہ سمجھیں بلکہ اس کو معمول سمجھیں اس لیے اس روایت کو ہم حجت نہیں سمجھتے۔

اسے کہتے ہیں الٹا چور کوتوال کو ڈانٹے، کہتے ہیں یہ جو مسئلہ ہے امام کے پیچھے فاتحہ پڑھنے اور نہ پڑھنے کا یہ تو اجتہادی مسئلہ ہے اور آپ لوگ اس میں بہت تشدد کرتے ہیں آپ نے اس پر مسلسل بیانات کیے ہیں مناظرے کیے ہیں تو یہ تشدد کررہے ہیں میں کہا چلو یہ فیصلہ ہم نہیں کرتے یہ فیصلہ محدثین سے کروالیتے ہیں متشدد کون ہے

امام ترمذی رحمہ اللہ اپنی کتاب میں کیا فرماتے ہیں ؟ فتوی سماعت فرمائیں:

امام ترمذی رحمہ اللہ فرماتے ہیں جو یہ فتوی دے کہ امام کے پیچھے فاتحہ نہ پڑھے تو نماز نہیں ہوتی تو یہ فتوی دینے والا متشدد ہے۔

تو یہ فتوی امام ترمذی نے دیا ناں! اب جو لوگ امام کے پیچھے فاتحہ پڑھنے کو ضروری سمجھتے ہیں اور ساتھ یہ کہتے ہیں کہ جو امام کے پیچھے فاتحہ نہ پڑھے ا س کی نماز نہیں ہوتی اس کو محدث نہیں کہتے اس کو متشدد کہتے ہیں۔ محدثین نے متشدد تمہیں شمار کیا ہے اور تم الٹا متشدد ہمیں کہہ رہے ہو۔ اللہ رب العزت مجھے اور آپ کو قرآن و سنت کے دلائل کی روشنی میں امام پر اعتماد کرنے کی توفیق عطا فرمائے اور امام کی قراءۃ کو اپنی قراءۃ سمجھنے کی توفیق عطا فرمائے۔آمین ثم آمین}