قسط -5 فکرِآخرت

اللہ تعالیٰ کا خوف اور فکرِآخرت کوانسانی زندگی کی کامیابی اور سنورنے میں بنیادی حیثیت حاصل ہے اور اسے حقیقی اسلامی تصوف کی بنیاد و اساس قرار دیا گیا ہے۔ یہی وجہ ہے کہ خاتم الانبیاء حضرت محمد صلی اللہ علیہ وسلم نے اپنی امت میں ان دو صفات کو پیدا کرنے کے لیے بہت محنت فرمائی، کبھی تو ان صفات کے فضائل و فوائد بیان فرمائے اور کبھی اللہ تعالیٰ کے جلال و قہر اور آخرت کے سخت ترین حالات کا تذکرہ فرمایا تاکہ دلوں میں اللہ کا خوف اور فکرِآخرت پیدا ہو۔

جب یہ صفات دل میں آجائیں تو انسان کی ساری زندگی بدل جاتی ہے ، خواہشات و شہوات کی اتباع سے جان چھوٹ جاتی ہے اور انسان کے لیے دین اسلام پر عمل کرنا بہت آسان ہو جاتا ہے ۔ نبی کریم صلی اللہ علیہ وسلم نےوعظ و نصیحت کے ذریعے لوگوں میں اللہ کا خوف اور فکر آخرت کو پیدا کیا جس کے اثرات یہ تھے کہ وہ معاشرہ جو ساری دنیا میں بدتہذیبی کی مثال بنا ہوا تھا وہی معاشرہ ساری دنیا کے سامنے مثالی معاشرہ کے طور پر رونما ہوا۔آج بھی رسول اللہ صلی اللہ علیہ وسلم کی انہی تعلیمات پر عمل کی ضرورت ہے تاکہ اسلامی معاشرہ اپنی کھوئی ہوئی اقدار حاصل کر سکے اس حوالے سے چند احادیث مبارکہ پیش خدمت ہیں ۔

ترجمہ: حضرت ابی بن کعب رضی اللہ عنہ سے روایت ہے کہ نبی کریم صلی اللہ علیہ وسلم کا معمول تھا جب دو تہائی رات گزر جاتی تو آپ صلی اللہ علیہ وسلم اٹھتے اور فرماتے: لوگو!اللہ کو یاد کرو ، اللہ کو یاد کرو ، قریب آ گیا ہے )کائنات کے نظام کو (ہلا ڈالنے والا قیامت کا بھونچال)یعنی جب اللہ کے حکم سے حضرت اسرافیل علیہ السلام پہلی مرتبہ صور پھونکیں گے( اور اس کے بعدآ رہا ہے دوسرا )یعنی جب دوسری مرتبہ حضرت اسرافیل علیہ السلام صور پھونکیں گے(، موت اُن سب احوال کو لے کر ساتھ لے کرسر پر آ چکی ہے ، موت اپنے احوال کے ساتھ سر پر آ چکی ہے ۔

ترجمہ: حضرت شداد بن اوس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا سمجھ دار وہ شخص ہے جو اپنے آپ کو پہچانے اور مرنے کے بعد کام آنے والے نیک اعمال کرےاوربے وقوف وہ شخص ہے جو اپنے آپ کو نفسانی خواہشات کا تابع بنائے )یعنی اللہ کے احکامات پر عمل کے بجائے اپنی خواہشات کے مطابق زندگی بسر کرے (اور اللہ سے امیدیں بھی باندھے۔

ترجمہ: حضرت عبداللہ بن مسعود رضی اللہ عنہ سے روایت ہے ،نبی کریم صلی اللہ علیہ وسلم نے فرمایا:قیامت کے دن اس وقت تک کوئی شخص پاؤں نہیں اٹھا سکے گا یہاں تک کہ اس سے پانچ سوالات نہ پوچھ لیے جائیں : اس نے عمر کیسے گزاری ؟ جوانی کہاں کھپائی؟ مال کیسے کمایا ؟اور کہاں خرچ کیا؟ اور اپنے علم پر عمل کتنا کیا ؟

ترجمہ: حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم ایک نوجوان کے پاس اس وقت تشریف لے گئے جب وہ دنیا سے رخصت ہونے کے قریب تھا، آپ صلی اللہ علیہ وسلم نے اس سے پوچھا کہ تمہاری دلی کیفیت کیسی ہے ؟ اس شخص نے عرض کی : یا رسول اللہ !اس وقت میری کیفیت یہ ہے کہ میں اللہ تعالیٰ سے رحمت کی امید بھی رکھتا ہوں اور اس کے ساتھ ساتھ مجھے اپنے گناہوں کی سزا اور عذاب کا ڈر بھی ہے ۔ آپ صلی اللہ علیہ وسلم نے ارشاد فرمایا: جس دل میں ایسے )موت کے ( وقت میں بھی یہ دو کیفیتیں جمع ہوں تو اللہ تعالیٰ اس کو وہ ضرور عطا فرمائیں گے جس کی اسے امید ہے یعنی اپنی رحمت ۔ اور اس چیز سے اس کو ضرور محفوظ رکھیں گے جس کا اس کے دل میں خوف ہے ۔ یعنی سزا اور عذاب سے ۔

ترجمہ: حضرت ام المومنین سیدہ عائشہ صدیقہ رضی اللہ عنہا سے روایت ہے کہ مجھ سے رسول اللہ صلی اللہ علیہ وسلم نے فرمایا: اے عائشہ اپنے آپ کو اُن گناہوں سے بچانے کی خاص طور پر فکر کرو جن کو معمولی سمجھا جاتا ہے کیونکہ اللہ تعالی کی طرف سے ان گناہوں کی بھی پوچھ تاچھ ہو گی ۔

ترجمہ: حضرت عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : جس بندے کی آنکھوں سے اللہ کے خوف اور ہیبت کی وجہ سے آنسو نکل آئیں اگرچہ وہ بہت معمولی مقدار میں ہوں مثلاً مکھی کے سر کے برابر ہی ہوں پھر وہ آنسو بہہ کر اس کے چہرے پر آ جائیں تو اللہ تعالیٰ اس چہرے کو جہنم کی آگ کے لیے حرام کر دیتے ہیں ۔ اللہ تعالیٰ ہمیں اپنا خوف اور آخرت کی فکر کرنے کی توفیق نصیب فرمائے ۔ آمین بجاہ النبی الامی الکریم صلی اللہ علیہ وسلم