قسط-33 ذکر اللہ …… حصہ دوم

اللہ تعالیٰ کا مبارک نام اخلاص و للہیت ،ذوق و شوق اور محبت کے ساتھ لینے پرفوائد و انعامات تو ہیں ہی لیکن اس ذات کا نام مبارک اس قدر پر تاثیر ہے کہ اگر اس کو محبت و اخلاص کے بغیر بھی لیا جائے تب بھی نفع سے ہرگز خالی نہیں ۔ نبی کریم صلی اللہ علیہ وسلم نے مختلف مواقع پر صحابہ کرام رضی اللہ عنہم )اور ان کے واسطے سے پوری امت (کوذکر اللہ کی تعلیم اور ترغیب دی ہے ۔ چند احادیث مبارکہ ملاحظہ فرمائیں

ترجمہ: حضرت ابوموسیٰ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: جو شخص اپنے رب کا ذکر کرتا ہے، اور وہ جو اپنے رب کا ذکر نہیں کرتا، ان کی مثال زندہ اور مردہ کی سی ہے۔ (یعنی ذکر کرنے والا زندہ اور نہ کرنے والا مردہ ہے)

ترجمہ: حضرت عبداللہ بن بسر المازنی رضی اللہ عنہ سے روایت ہے کہ ایک آدمی نے آ کر رسول اللہ صلی اللہ علیہ وسلم سے عرض کی: یا رسول اللہ!مجھے اسلام کے احکام بہت زیادہ معلوم ہو گئے ہیں۔ آپ مجھے ایسی چیز بتایئے کہ میں اسے اختیار کروں۔ آپ صلی اللہ علیہ وسلم نے فرمایا: تمہاری زبان ہر وقت اللہ کے ذکر سے تر رہنی چاہیے۔

ترجمہ: حضرت جابر رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: جو کام انسان کرتا ہے ان میں سے کوئی بھی عمل ذکر اللہ سے زیادہ اللہ کے عذاب سے نجات دینے والا نہیں ۔

ترجمہ: حضرت معاذ بن انس جہنی رضی اللہ عنہ سے روایت ہے کہ ایک شخص نے رسول اللہ صلی اللہ علیہ وسلم سے سوال کیا : مجاہدین میں سے اجر کے اعتبار سے سب سے زیادہ عظمت والاکون ہے ؟ آپ صلی اللہ علیہ وسلم نے جواب دیا کہ جو اللہ کا ذکر کثرت کے ساتھ کرے ، پھر اس نے نماز ، زکوٰۃ ، حج اور صدقہ کے بارے میں بھی یہ سوال دہرایا کہ ان کاموں کو کرنے والوں میں سے اجر کے اعتبار سے زیادہ عظمت والا کون ہے ؟ تو آپ صلی اللہ علیہ وسلم نے ہر بار یہی جواب ارشاد فرمایا کہ جو اللہ کا ذکر کثرت کے ساتھ کرنے والا ہو ۔ اس پر حضرت ابو بکر صدیق رضی اللہ عنہ نے حضرت عمر رضی اللہ عنہ سے فرمایا: اے ابو حفص!ذکراللہ کرنے والے تو تمام بھلائیاں سمیٹ کر لے گئے ۔) یہ بات سن کر( نبی کریم صلی اللہ علیہ وسلم نے )تصدیق کرتے ہوئے ( فرمایا: جی ہاں ایسے ہی ہے۔

فائدہ: ابو حفص ۔۔حضرت عمر رضی اللہ عنہ کی کنیت ہے۔

ترجمہ: حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: جو رات کی عبادت کرنے سے عاجز ہو جائے ، مال کو )اللہ کی راہ میں (خرچ کرنے سے بخیل ہو جائے ، اور دشمن سے لڑنے میں بزدل ہو جائے تو اسے چاہیے کہ وہ اللہ کا ذکر کثرت سے کرے ۔)اس سے ساری کوتاہیاں دور ہو جائیں گی (

ترجمہ: حضرت معاذ بن جبل رضی اللہ عنہ فرماتے ہیں کہ جب میں رسول اللہ صلی اللہ علیہ وسلم سے الوداعی ملاقات کی تو اس وقت میں نے آپ صلی اللہ علیہ وسلم سے سوال کیا : نیکی کے کاموں میں سے اللہ تعالیٰ کو سب سے زیادہ محبوب کون سا عمل ہے ؟ آپ صلی اللہ علیہ وسلم نے فرمایاکہ تجھے اس حالت میں موت آئے کہ تیری زبان اللہ کے ذکر سے تر ہو ۔

ترجمہ: حضرت معاذ بن جبل رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: جنت والوں کو کسی چیز کی حسرت باقی نہیں رہے گی سوائے ان اوقات کی جن میں وہ اللہ کا ذکر نہیں کر سکے ہوں گے۔

اللہ تعالی ہمیں کثرت کے ساتھ اپنا مبارک نام لینے کی توفیق نصیب فرمائے اور اس نام کی حلاوت ، مٹھاس ، فوائد اور انعامات حاصل کرنے والا بنائے ۔ آمین بجاہ النبی الامی الامین صلی اللہ علیہ وسلم