قسط--38 حج بیت اللہ……حصہ دوم

اللہ تعالیٰ ہم سب کو مبرور حج کی توفیق نصیب فرمائے ۔ ”حج مبرور“ اسے کہتے ہیں کہ حج کرنے کے بعد حاجی کی دنیا سے بے رغبتی اور آخرت سے رغبت بڑھ جائے۔ اللہ تعالی کی طرف متوجہ رہنے لگے اور عبادات کی پابندی کرنے لگے اور شریعت جن کاموں کا حکم دیتی ہے اسے بجا لائے اور جن امور سے روکتی ہے ان سے باز آ جائے مزید یہ کہ جن گناہوں کو حج سے پہلے کیا کرتا تھا ان کو بالکل چھوڑ دےاور اگر گناہ سرزد ہو جائے تو فوراً توبہ کرے ۔

قرآن و سنت میں حج کے فضائل و مناقب بکثرت موجود ہیں ،چند ایک پیش خدمت ہیں:

ترجمہ: حضرت ابو ہریرہ رضی اللہ عنہ سے روایت ہے وہ فرماتے ہیں کہ حضرت رسول اللہ صلی اللہ علیہ وسلم سے سوال کیا گیا کہ (دینِ اسلام میں)کون سا عمل زیادہ بہتر ہے؟ تو آپ صلی اللہ علیہ وسلم نے ارشاد فرمایا کہ (دل سے)اللہ اور اس کے رسول پر ایمان لانا۔پھر پوچھا گیا کہ اس کے بعد کون سا عمل ( زیادہ بہتر ہے؟)تو آپ صلی اللہ علیہ وسلم نے ارشاد فرمایا کہ اللہ کی راہ میں جہاد کرنا،پھر عرض کیا گیا کہ اس کے بعد کون سا عمل زیادہ بہتر ہے ؟ تو آپ صلی اللہ علیہ وسلم نے ارشاد فرمایا کہ اس کے بعدحج مبرور۔

فائدہ: یہاں ایک بات اچھی طرح سمجھ لینی چاہیے کہ بعض احادیث میں افضل ترین عمل کبھی حج کو ، کبھی نماز،کبھی صدقہ ، کبھی جہاد کو اور کبھی والدین کی خدمت وغیرہ کو قرار دیا جاتا ہے ۔ ایسی تمام احادیث کا تعلق وقت ، اشخاص اور حالات کے ساتھ ہے ۔حالات کے مطابق جس عمل کی زیادہ ضرورت ہو وہی زیادہ نفع مند اور فضیلت والا بن جاتا ہے ۔ بعض کم علم لوگ کبھی کسی ایک عمل کی فضیلت کو بیان کرتے کرتے دوسرے عمل کی اہمیت کم کر دیتے ہیں ،اگر شریعت کے مزاج اور منشاء کو اچھی طرح سمجھ لیا جائے تو تمام الجھنیں دور اور جہالتیں کافور ہو جاتی ہیں ۔

ترجمہ: حضرت ابو ہریرہ رضی اللہ عنہ فرماتے ہیں ،میں نے رسول اللہ صلی اللہ علیہ وسلم کو یہ فرماتے ہوئے سنا کہ جو شخص اللہ تعالیٰ)کی رضا اور خوشنودی کو حاصل کرنے( کے لئے حج کرے اور دوران حج (احرام کی حالت میں (اپنی بیوی کے پاس نہ جائے )یعنی ہمبستری وغیرہ نہ کرے (اور (دوران سفر اپنے ساتھیوں سے)بیہودہ باتیں کلام یا لڑائی جھگڑا وغیرہ نہ کرے اور )کبیرہ( گناہوں سے بچتا رہے تو وہ حج کرنے کے بعد (گناہوں سے ایسا پاک و صاف ہو جاتا ہے)جیسا کہ وہ اپنی ماں کے پیٹ سے پیدا ہوتے وقت پاک و صاف تھا۔

ترجمہ: حضرت ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا کہ حج کو آنے والے اور عمرہ ادا کرنے والے اللہ تعالی کے معزز مہمان ہیں؛ اگر وہ اللہ تعالی سے دعاء مانگیں تو اللہ تعالی ان کی دعاء قبول فرماتا ہے اور اگر وہ گناہوں کی مغفرت طلب کریں تو اللہ تعالی ان کے گناہوں کو بخش دے گا۔

ترجمہ: حضرت ابو موسیٰ اشعری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: حج کرنے والا حاجی اپنے قبیلے کے چار سو آدمیوں کی شفاعت کرے گا ۔

ترجمہ: حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے دعا دیتے ہوئے فرمایا: اللہ تعالیٰ حج کرنے والوں کی مغفرت فرمائے اور ان کی بھی مغفرت فرمائے جن کے لیے حاجی لوگ اللہ تعالیٰ سے مغفرت کی دعا مانگتے ہیں ۔

نوٹ: پہلے یہ ارادہ تھا کہ سفر حج کی مکمل تفصیل چند قسطوں میں تحریر کر دی جائے لیکن چونکہ مستقل طور پر حج بیت اللہ پر ایک کتاب زیرتحریر ہے اس لیے مکمل تفصیل اسی کتاب میں ملاحظہ فرما ئیں ۔ جو ان شاء اللہ بہت جلد تیار ہو کر مارکیٹ میں دستیاب ہو گی ۔

اللہ تعالیٰ ہمیں اپنی رضاء نصیب فرمائے اور تمام مناسک اور آداب کی رعایت رکھتے ہوئے حج مبرور نصیب فرمائے ۔

حجاج کرام کا حج قبول فرمائے ، ان کے حج کو ان کی مغفرت کا باعث بنائےاس کی جزاء جنت کی صورت میں عطا فرمائے اور انہیں ہمارے حق میں دعا کرنے کی توفیق نصیب فرما کر ان کی دعاؤں کو ہمارے حق میں قبول بھی فرمائے۔