دعاء کے آداب

چند ایسے آداب ذکر کیے جاتے ہیں جن کی وجہ سے دعاء جلد قبول ہوتی ہے ۔

ترجمہ: حضرت عبداللہ بن عباس رضی اللہ عنہما سے روایت ہے کہ اللہ تعالیٰ سے دعاء مانگتے وقت اپنے ہاتھوں کو کندھوں کے برابر اٹھائے … اور دعاء کے وقت انتہائی عاجزی یہ ہے کہ دونوں ہاتھوں کو پھیلائے۔

ترجمہ: حضرت مالک بن یسار رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:جب تم اللہ سے دعاء مانگو تو اپنی ہتھیلیاں کھول کر دعاء مانگو اور ہاتھ الٹے کر کے دعاء نہ مانگو ۔

ترجمہ: حضرت فضالہ بن عبید رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: جب تم دعاء مانگنے لگو تو اس کی ابتداء اللہ کی حمد و ثناء سے کرو پھر نبی صلی اللہ علیہ وسلم پر درود بھیجو اس کے بعد جو چاہو مانگو۔

ترجمہ: وہ )انبیاء کرام علیہم السلام ( ہم سے رغبت اور ڈر کے ساتھ دعاء کرتے ہیں ۔

ترجمہ : حضرت ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: تم میں سے کوئی شخص بھی دعا مانگتے وقت یوں نہ کہے کہ اے اللہ اگر تو چاہے تو میری مغفرت کردے ، اگر تو چاہے تو مجھ پر رحم فرما۔

ترجمہ: حضرت ابوبکر صدیق رضی اللہ عنہ سے مروی ہے کہ انہوں نے رسول اللہ صلی اللہ علیہ وسلم سے درخواست کی کہ مجھے کوئی دعاء سکھائیں جسے میں نماز میں مانگوں۔ آپ صلی اللہ علیہ وسلم نے فرمایا کہ یوں مانگا کرو:

اے اللہ!میں نے اپنی جان پر بہت زیادتی کی آپ کے علاوہ کوئی بخشنے والا ہے ہی نہیں اپنی طرف سے میری بخشش کا فیصلہ فرما کر میری مغفرت فرما ، مجھ پر رحم فرما ۔ بے شک آپ ہی بخشنے والے رحم کرنے والے ہیں ۔

ترجمہ: ام المومنین سیدہ عائشہ صدیقہ رضی اللہ عنہا سے مروی ہے کہ رسول اللہ صلی اللہ علیہ وسلم جب کسی مریض کے پاس تشریف لے جاتے یا آپ صلی اللہ علیہ وسلم کے پاس کسی مریض کو لایا جاتا تو آپ اس کے لیے یوں دعاء مانگتے:

اے انسانوں کے رب تکلیف کو دور فرما۔ اے شفاء دینے والے ایسی شفاء عطاء فرما کہ بیماری بالکل باقی نہ رہے۔

فائدہ : دعاء کے مناسب اللہ کی صفات کا تذکرہ کیا جائے ۔ جیسے:

ترجمہ: اے رحم فرمانے والے مجھ پر رحم فرما، اے کرم فرمانے والے مجھ پر کرم فرما، اے شفاء دینے والے مجھے شفاء عطا فرما ۔

ترجمہ: اے پروردگار!میری اور میرے والدین کی مغفرت فرما۔

ترجمہ: حضرت ابی بن کعب رضی اللہ عنہ سے روایت ہے کہ رسول اللہ صلی اللہ علیہ وسلم جب کسی کو یاد کرتے تو اس کے لیے دعاء فرماتے اور ابتداء اپنے سے کرتے ۔

نوٹ: یہ اس وقت ہے جب اپنے لیے اور دوسروں سب کے لیے دعاء کرنی ہو اور اگر صرف دوسروں کے لیے دعاء کرنی ہو تو وہاں صرف اسی کے لیے دعاء کریں ۔

ترجمہ: دُعاء کا مستحب طریقہ یہ ہے کہ اﷲ تعالیٰ کی تعریف اور حضور صلی اللہ علیہ وسلم کے وسیلہ کو مقدّم کیا جائے تاکہ دُعاء کو قبولیت کا شرف حاصل ہو۔

ترجمہ: حضرت ابو زہیر نُمَیری رضی اللہ عنہ فرماتے ہیں کہ… ایک رات ہم لوگ رسول اللہ صلی اللہ علیہ وسلم کے ہمراہ چلے تو ہمارا گزر ایک ایسے آدمی کے قریب سے ہوا جو نہایت الحاح و زاری )رو رو کر (سے دعاء مانگ رہا تھا۔ نبی کریم صلی اللہ علیہ وسلم ٹھہر گئے اور اس کی دعاء کو سنتے رہے ۔ پھر آپ صلی اللہ علیہ وسلم نے)ہمیں مخاطب کر کے ( فرمایا:اگر اس نے دعاء کا اختتام صحیح کیا تو اس کی دعاء ضرور قبول ہو گی ۔ ایک شخص نے آپ صلی اللہ علیہ وسلم کی اس بات کی مزید وضاحت طلب کی تو آپ صلی اللہ علیہ وسلم نے فرمایا: آمین کے ساتھ ۔ اگر اس نے آمین کے ساتھ دعاء ختم کی تو اس کی دعاء ضرور قبول ہو گی۔

ترجمہ: حضرت عمررضی اللہ عنہ فرماتے ہیں کہ رسول اللہ صلی اللہ علیہ وسلم جب دعاء کے لیے ہاتھ پھیلاتے تو نیچے کرنے سے پہلے انہیں اپنے چہرے پر پھیر لیتے تھے۔

فائدہ: اللہ تعالیٰ سے دعاء مانگتے وقت بہتر یہ ہے کہ باوضو اور قبلہ رخ ہو کر بیٹھیں، جب دعاءکے لیے ہاتھ اٹھائیں تو اپنے آپ کو سمجھائیں اور دل میں یہ احساس پیدا کریں کہ میں جس ذات کی بارگاہ میں ہاتھ پھیلا رہا ہوں وہ ہر چیز پر مکمل قدرت رکھنے والی ہے، وہ ضرور میری حاجات و ضروریات کو پورا فرمائے گی ۔اسی ذات نے احسان کرتے ہوئے مجھے انسان بنایا پھرمزید احسان یہ فرمایا کہ مجھے مسلمان بنایا ، اس سے بھی بڑا احسان یہ فرمایا کہ مجھے اپنے محبوب حضرت محمد صلی اللہ علیہ وسلم کا امتی بنایا، اس ذات کا ہی احسان ہے کہ اسلامی احکامات پر عمل کی توفیق عطاء فرمائی ، اسی ہی کا احسان ہے کہ مجھے عقل ، سمجھ اور شعور عطاء کیا ، اسی کا احسان ہے کہ مجھے اپنے در کا محتاج بنا کر غیروں سے مستغنی فرمایا اور مجھے اس بات کی توفیق نصیب فرمائی کہ آج پھر مجھے اپنی بارگاہ میں دعاء مانگنے کی توفیق عطاء فرمائی ۔ اس کے احسانات مجھ پر برابر جاری و ساری ہیں ۔

دعا ء مانگتے وقت ہاتھ ایسے اٹھانے چاہییں کہ انسان کے عمل سے عاجزی کا اظہار ، طلب کا شوق اور ضرورت کا احساس محسوس ہو ۔لیکن غفلت اور لاپرواہی کے ساتھ یوں دعاء کی جا رہی ہوتی ہے جیسے کوئی رسم پوری کی جا رہی ہو ،ہاتھ پر ہاتھ رکھنا ، انگلیاں ایک دوسرے میں داخل کرنا، ہاتھوں سے کھیلتے رہنا، ہاتھوں کو بند کر لینا وغیرہ۔ یہ سب غفلت اور بے توجہی کی وجہ سے ہوتا ہے ، جسے دور کرنے کی شدید ترین ضرورت ہے۔