اسلام میں بچوں کے حقوق

اللہ تعالیٰ نے نبی کریم صلی اللہ علیہ وسلم کو جو رحمت عطا فرمائی اس کا حصہ بچوں نے بھی پایا بلکہ”چھوٹے“ ہونے کےباوجود ”بڑا“ حصہ پایا۔ اگرچہ موضوع طویل ہے لیکن انتہائی اختصار و جامعیت سے چند باتیں لکھی جا رہی ہیں تاکہ یہ معلوم ہو کہ بچوں کے بارے میں قرآن و سنت سےہمیں کیا رہنمائی ملتی ہے ؟

اسلام نے کبھی بھی بھوک و افلاس کے خوف سے بچوں کی پیدائش پر سختی نہیں کی ، بلکہ قرآن کریم میں ایسا کرنے والوں کی پرزور طریقے سے حوصلہ شکنی کی گئی ہے اور انسان کو تسلی دی ہے کہ ان کے روزی کے اسباب ضرور اپنائے لیکن روزی کے خوف سے اولاد کو قتل نہ کرے کیونکہ اللہ تعالیٰ نےاحسان کرتے ہوئے ان کی اور ہماری روزی کا ذمہ خود لیا ہے ۔ اور اللہ رب العزت جس بات کو احساناً اپنے ذمہ لے لیں تو اس میں پریشان اور مایوس نہیں ہونا چاہیے:

ترجمہ: اور تم اپنی اولادکو بھوک کے خوف سے مار مت ڈالو ہم انہیں بھی اور تمہیں بھی رزق دیتے ہیں ۔ یقیناً ان کو قتل کرنا بہت بڑا گناہ ہے ۔

فائدہ: اس لیے فکر مند ہونا بچوں کی پیدائش سے آبادی بڑھ گئی تو ہم ان کو کھلائیں گے اور پلائیں گے کہاں سے؟ لہٰذا اسے قابو کیا جائے ! یہ فکر اسلامی تعلیمات سے میل نہیں کھاتی۔

بچوں کی پیدائش کے بعد اب ان کی مذہبی تربیت کرنا بنیادی حقوق میں سے ہے اور بچے اس کو جلد قبول کرتے ہیں بشرطیکہ انہیں تربیت کا ماحول دیا جائے ۔ وجہ یہ ہے کہ ان کی پیدائش فطرت کے مطابق ہوئی ہوتی ہے۔

ترجمہ: حضرت ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ہر بچہ فطرت )اسلام(پر پیدا ہوتا ہے اس کے بعد اس کے والدین اسے یہودی ، نصرانی یا مجوسی )وغیرہ(بنا دیتے ہیں۔

فائدہ: بچوں کی فطرت اور جبلت میں اسلام موجود ہوتا ہے اگر ان کو اسلامی احکامات و آداب سے روشناس کرایا جائے تو وہ اسے جلد قبول کر لیتے ہیں ۔

ترجمہ: نواسۂ رسول حضرت حسین رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: جب کسی کے ہاں بچہ پیدا ہو تو اس کے دائیں کان میں کلمات اذان اور بائیں کان میں کلمات اقامت کہےاس کی وجہ سے ام الصبیان )یہ ایک بیماری کا نام ہے جس میں بچہ سوکھ کر کانٹا ہو جاتا ہے (نہیں لگے گی ۔

ترجمہ: حضرت ابو رافع رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو خود دیکھا کہ جب حضرت فاطمہ رضی اللہ عنہا کے ہاں حسن بن علی رضی اللہ عنہما کی پیدائش ہوئی تو آپ نے حسن کے کان میں نماز والی آذان دی۔

ترجمہ: ام المومنین سیدہ عائشہ صدیقہ رضی اللہ عنہا سے مروی ہے کہ رسول اللہ صلی اللہ علیہ وسلم کے پاس چھوٹے بچوں کو لایا جاتا آپ ان کو برکت کی دعا دیتے اور انہیں گھٹی دیتے تھے۔

ترجمہ: حضرت عمرو بن شعیب اپنے والد سے وہ اپنے دادا سے روایت کرتے ہیں کہ رسول اللہ صلی اللہ علیہ وسلم نے )بچے کی پیدائش کے (ساتویں دن اس بچے کا نام رکھنے، اس سے تکلیف دہ چیزوں )بال ، ناخن ، ختنے کی چمڑی وغیرہ(کو دور کرنے اور عقیقہ کرنے کا حکم دیا ہے ۔

ترجمہ: حضرت ابوالدرداء رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: تمہیں قیامت والے دن تمہارے اپنے اور تمہارے باپوں کے ناموں سے پکارا جائے گا اس لیے تم اچھے نام رکھو۔

ترجمہ: حضرت محمد بن سیرین رحمہ اللہ کہتے ہیں کہ میں نے حضرت ابوہریرہ رضی اللہ عنہ سے سنا، وہ فرما رہے تھے کہ ابوالقاسم صلی اللہ علیہ وسلم نے فرمایا: میرے نام والا نام رکھو لیکن میری کنیت پر اپنی کنیت نہ رکھو ۔

نوٹ: مطلب ہے کہ تم اپنا اور اپنے بچوں کا نام محمد رکھو لیکن میری کنیت ابوالقاسم جیسی کنیت ابوالقاسم نہ رکھو۔ آپ صلی اللہ علیہ وسلم جب تک اس دنیا میں زندہ تھے اس وقت تک ابوالقاسم کنیت رکھنا منع تھا لیکن آپ صلی اللہ علیہ وسلم کی وفات کے بعد اب یہ کنیت رکھی جا سکتی ہے جیسا کہ ایک دوسری حدیث میں اس کا ذکر ہے۔

ترجمہ: حضرت علی رضی اللہ عنہ مروی ہے کہ میں نے رسول اللہ صلی اللہ علیہ وسلم کی خدمت میں عرض کی : یارسول اللہ !اگر آپ کے بعد میرے ہاں کوئی بچہ پیدا ہو تو کیا میں اس کانام محمد اور اس کی کنیت) ابوالقاسم(رکھ سکتاہوں؟ اس بارے آپ کیا فرماتے ہیں؟ آپ صلی اللہ علیہ وسلم نے فرمایا: جی ہاں )رکھ سکتے ہو( حضرت علی رضی اللہ عنہ فرماتے ہیں کہ آپ کی یہ بات بطور اجازت کے ہے۔

ترجمہ: حضرت ابووہب رضی اللہ عنہ سے روایت ہے رسول اللہ صلی اللہ علیہ وسلم نے فرمایا: نبیوں والے نام رکھو اللہ کو سب سے زیادہ محبوب نام عبداللہ اور عبدالرحمٰن ہیں اور ان میں زیادہ سچے نام حارث اور ہمام ہیں اور برے نام حرب اور مرہ ہیں ۔

ترجمہ: حضرت عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: اللہ عزوجل کے ہاں سب سے محبوب اور پسندیدہ نام عبداللہ اور عبدالرحمٰن ہیں۔

نوٹ: ان کے علاوہ بھی احادیث مبارکہ میں اور نام مذکور ہیں جو اچھے ہیں۔

ترجمہ: حضرت عمر بن خطاب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: میں تمہیں بہت تاکید سے رافع ، برکۃ اور یسار)جیسے (نام رکھنا سے روکتا ہوں ۔

نوٹ: اس کے علاوہ بھی کئی نام ہیں جنہیں ناپسندیدہ کہا گیا ہے ۔

ترجمہ: حضرت ا بن عمر رضی اللہ عنہما سے مروی ہے نبی کریم صلی اللہ علیہ وسلم نے عاصیہ نام بدل دیا تھا اور اور اس خاتون سے کہا کہ تو )تیرا نام(جمیلہ ہے۔

نوٹ: اس کے علاوہ بھی آپ صلی اللہ علیہ وسلم نےکئی نام تبدیل فرمائے۔

فائدہ: نام اچھا ہو، انبیاء کرام، صحابہ ،صحابیات اور نیک لوگوں والا نام ہو ۔ فلمی ایکٹرز، گلوکاروں اور فنکاروں کے نام پر نام رکھنا فیشن تو ضرور ہے لیکن درست نہیں۔ نام کی اپنی تاثیر ہوتی ہے اس لیے اچھے نام والے میں برکات ہوں گی اور جس کا نام اچھا نہیں ہوگا اس میں برکات بھی نہیں ہوں گی ۔ اس لیے نام رکھتے وقت اپنے قریبی علماء کرام سے مشورہ کر لینا چاہیے اور ان سے پوچھ کر نام رکھنا چاہیے ۔ خود نام رکھ کر اس کے معنیٰ علماء کرام سے پوچھنا نامناسب بات ہے۔

ہمارے ہاں یہ فرمائش کی جاتی ہے کہ ایسا نام بتاؤ کہ وہ نام پہلے پوری برادری میں کسی اور کا نہ ہو۔ ایسی فرمائش کرنا اور اس پر اصرار کرنا درست نہیں۔

اچھے ناموں کے بارے میں کہا جاتا ہے کہ فلاں نام وزنی اور بھاری ہے بچہ اس کو اٹھا نہیں سکے گا ۔ یا یہ نام رکھنے کی وجہ سے بچہ بیمار رہتا ہے ۔ یہ سراسر غلط بات ہے اچھے نام بالخصوص انبیاء کرام اور صحابہ کرام والے ناموں میں برکت ہوتی ہے جس کی برکات بچے میں بھی منتقل ہوتی ہیں۔ ان ناموں کو وزنی کہنا غلط ہے اور ان کی وجہ سے بچوں کو بیمار بتلانا بھی انتہائی غلط بات ہے ۔

ترجمہ: حضرت بریدہ رضی اللہ عنہ سے مروی ہے کہ زمانہ جاہلیت میں جب ہم میں سے کسی کے ہاں بچہ پیدا ہوتا تو وہ ایک بکری ذبح کرتا اور اس بکری کے خون کو بچے کے سر پر مَلتا اس کے بعد جب اللہ تعالیٰ نے ہمیں اسلام کی دولت سے نوازا تو ہم ایک بکری ذبح کرتے اور بچے کے سر کو مونڈاتے ہیں اور اس پر زعفران مَل دیتے ہیں۔

ترجمہ: حضرت علی بن ابی طالب رضی اللہ عنہ سے روایت ہے رسول اللہ صلی اللہ علیہ وسلم نے حسن کی طرف سے ایک بکری کا عقیقہ کیا اور فرمایا: اے فاطمہ اس کے سر کو مونڈو اور اس کے بالوں کی مقدار کے برابر چاندی صدقہ کرو۔

ترجمہ: اور مائیں اپنے بچوں کو پورے دو سال تک دودھ پلائیں یہ ( دودھ پلانے والا حکم) اس کے لیے ہے جو دودھ پلانے کی مدت پوری کرنا چاہے۔

ترجمہ: حضرت ا بن عباس رضی اللہ عنہما سے مروی ہے نبی کریم صلی اللہ علیہ وسلم نے فرمایا: بچوں کو سب سے پہلے کلمہ )لا الہ الا اللہ محمد رسول اللہ( سکھلاؤ۔

ترجمہ: حضرت وہب بن کیسان ر حمہ اللہ سے مروی ہے کہ میں نے عمر بن ابی سلمہ سے سنا وہ فرماتے تھے کہ میں آپ صلی اللہ علیہ وسلم کی زیرتربیت تھا )ایک دن میں آپ صلی اللہ علیہ وسلم کے ساتھ کھانا کھا رہا تھا (اور میرا ہاتھ سالن والے برتن میں گھوم رہا تھا )جیسا کہ عام طور پر بچوں کی عادت ہوتی ہے اپنے سامنے سے بھی کھاتے ہیں اور دوسروں کے سامنے سے بھی چیزیں اٹھا لیتے ہیں (تو مجھے رسول اللہ صلی اللہ علیہ وسلم نے فرمایا: اے بچے!بسم اللہ پڑھو، دائیں ہاتھ سے کھاؤ اور اپنے سامنے سے کھاؤ۔

فائدہ: اس حدیث مبارک میں تین باتیں سکھائی جا رہی ہیں کہ کھانا شروع کرتے وقت بسم اللہ پڑھنی چاہیے، دائیں ہاتھ سے کھانا چاہیے اور اپنے سامنے سے کھانا چاہیے۔

ترجمہ: ابو رافع بن عمرو الغفاری رضی اللہ عنہ کے چچا سے مروی ہے کہ جب میں بچہ تھا ان دنوں میں انصار کی کھجور توڑ رہا تھا مجھےنبی کریم صلی اللہ علیہ وسلم کے پاس لایا گیا تو آپ صلی اللہ علیہ وسلم نے مجھے فرمایا: اے بچے !تم )بغیر اجازت(کیوں کھجور توڑ رہے تھے ؟ تو میں نے کہا کہ اپنے کھانے کے لیے۔ آپ صلی اللہ علیہ وسلم نے فرمایا کہ )کسی کی کھجور(مت توڑو۔ ہاں جو نیچے گری ہوئی ہیں ان کو کھا لو ۔ پھر میرے سر پر ہاتھ پھیرا اور مجھے یہ دعا دی : اے اللہ اس کے پیٹ کو سیر کر دے۔

ترجمہ: حضرت عمرو بن شعیب اپنے والد اور وہ اپنے دادا سے روایت کرتے ہیں کہ رسول اللہ صلی اللہ علیہ وسلم نے فرمایا: جب اولاد سات سال کی ہو جائے تو ان کو نماز پڑھنے کا کہو اور جب وہ دس سال کے ہو جائیں) پھر بھی نماز نہ پڑھیں( تو ان کو مارو اور ان کے بستر بھی الگ الگ کردو۔

ترجمہ: حضرت عبداللہ بن عباس رضی اللہ عنہما فرماتے ہیں کہ میں ایک دن رسول اللہ صلی اللہ علیہ وسلم کے پیچھے تھا تو آپ صلی اللہ علیہ وسلم نے مجھے فرمایا: اے بچے! میں تجھے چند باتیں سکھلاتا ہوں: اللہ کے دین کے احکام کی حفاظت کر اللہ تیری حفاظت کرے گا ۔ اللہ کے احکام کی حفاظت کر تو اسے اپنا مددگار پائے گا جب تو مانگے تو اللہ ہی سے مانگ اور جب تجھے مدد کی ضرورت ہو تو اللہ سے مانگ اور اس بات کو اچھی طرح ذہن نشین کرلے کہ اگر سارے لوگ مل کر تجھے نفع دینا چاہیں تو وہ تجھے نہیں دے سکتے جتنا اللہ نے تیرے لیے لکھ دیا ہے اور اگر سارے لوگ اکٹھے ہوجائیں اور تجھے نقصان پہنچانا چاہیں تو نقصان نہیں پہنچا سکتے مگر جتنا اللہ نے تیرے لیے لکھ دیا ہے ، تقدیر لکھنی والی قلموں کو اٹھا لیا گیا اور صحائف خشک ہوچکے ہیں۔

فائدہ: معلوم ہوا کہ بچوں کوشروع ہی سے صحیح عقائد و اعمال کی تعلیم دینی چاہیے اور حسن معاشرت بھی سکھلانی چاہیے۔

ترجمہ: حضرت ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے حسن بن علی کو بوسہ دیا اور آپ صلی اللہ علیہ وسلم کے پاس اقرع بن حابس رضی اللہ عنہ بیٹھے تھے تو وہ یہ دیکھ کر کہنے لگے کہ میرے دس بچے ہیں میں نے ان میں سے کسی ایک کو بھی بوسہ نہیں دیا ۔ رسول اللہ صلی اللہ علیہ وسلم نے ان کی طرف دیکھ کر فرمایا: جو رحم نہیں کرتا اس پر رحم نہیں کیا جائے گا ۔

ترجمہ: حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا:گھر میں کوڑا اس طرح لٹکاؤ کہ گھر والے اسے دیکھتے رہیں یہ ان کو ادب سکھلانے کے لیے ہے) کہ سرزنش بھی ہو سکتی ہے(

ترجمہ: نبی کریم صلی اللہ علیہ وسلم نے فرمایا: کہ چیزیں دینے میں اپنی اولاد میں برابری کا معاملہ کرو۔

ترجمہ: حضرت جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: اپنے آپ پر بددعا نہ کرو ، نہ اپنی اولاد کو بددعا دو اور نہ ہی اپنے خدمت کرنے والوں کو بددعا دو اور نہ اپنے مالوں پر بددعا کرو بعض اوقات اللہ کی طرف سے قبولیت کی گھڑی ہوتی ہے تو وہ بددعائیں قبول ہو جاتی ہیں۔

فائدہ: بعض لوگ جن میں اکثریت خواتین کی ہوتی ہے بات بات پر بچوں کو بددعائیں دیتی ہیں۔ انہیں اس حدیث مبارک سے سبق لینا چاہیے۔

اللہ تعالیٰ ہمارے بچوں کوبلکہ ہماری نسلوں کو ایک اچھا مسلمان اور ایک اچھا شہری بننے کی توفیق عطا فرمائے ۔

والسلام

محمدالیاس گھمن

خانقاہ حنفیہ ، مرکز اھل السنۃ والجماعۃ ، سرگودھا

جمعرات ، 7فروری ، 2019ء