اکیسواں سبق

ترجمہ: اے نبی کے اہل بیت! اللہ یہی چاہتا ہے کہ تم سے گندگی کو دور رکھے اور تمہیں خوب پاکیزگی عطا فرمائے۔

فائدہ: اللہ تعالیٰ چاہتے ہیں کہ نبی علیہ السلام کے گھر والوں کو ان احکام پر عمل کرا کر خوب پاک و صاف کردے (جو اس آیت سے پہلے والی آیات میں بیان ہوئے ہیں ) اور ان کے مرتبہ کے موافق ایسی قلبی صفائی اور اخلاق کی ستھرائی عطا فرمائے جو دوسروں سے ممتاز اور فائق ہو۔ یہاں تطہیرسے مراد تہذیب ‘ تصفیہ قلب اور تزکیہ باطن کاوہ اعلیٰ مرتبہ ہے جو صحابہ کرام رضی اللہ عنہم کو حاصل ہوتا ہے اور جس کے حصول کے بعد وہ انبیاء کی طرح معصوم تو نہیں مگر محفوظ کہلواتے ہیں۔

نوٹ: یہاں ”اہل بیت“ سے ازواجِ مطہرات ہی مرادہیں کیونکہ اس آیت سے پہلے تمام ترخطابات ازواجِ مطہرات ہی سے ہوئے ہیں۔

ترجمہ: حضرت ابی بن کعب رضی اللہ عنہ سے روایت ہے کہ حضرت عمر رضی اللہ عنہ نے ان کو حکم دیا کہ وہ رمضان میں لوگوں کو رات کے وقت نماز(تراویح) پڑھایا کریں۔ حضرت عمر رضی اللہ عنہ نے فرمایا کہ لوگ دن کو روزہ رکھتے ہیں اس لیے قرآن مجید اچھی طرح نہیں پڑھ سکتے۔ اگر آپ رات کے وقت ان کو قرآن سنائیں (تو بہت اچھا ہے)۔ حضرت ابی بن کعب رضی اللہ عنہ نے عرض کیا:اے امیر المومنین! یہ ایک ایسی چیز ہے جو پہلے نہیں ہوئی۔ فرمایا: مجھے معلوم ہے لیکن یہ بہت اچھی چیز ہے۔ چنانچہ ابی بن کعب رضی اللہ عنہ نے لوگوں کو بیس رکعتیں (تراویح) پڑھائیں۔

صحابہ کرام اور اہل بیت رضی اللہ عنہم کے ساتھ محبت رسول اللہ صلی اللہ علیہ وسلم کے ساتھ محبت کی علامت ہے اور صحابہ کرام اور اہل بیت رضی اللہ عنہم دونوں سے بغض یا ان دونوں میں سے کسی ایک سے محبت اور دوسرے کے ساتھ بغض، رسول اللہ صلی اللہ علیہ وسلم سے بغض کی علامت وگمراہی ہے۔

حضور صلی اللہ علیہ وسلم کے اہل بیت جن کا اولین مصداق امہات المومنین رضی اللہ عنہن ہیں، ان کو پاک دامن اور صاحب ایمان ماننا ضروری ہے۔

فائدہ: امہات المؤمنین کے نام یہ ہیں:

(1)حضرت خدیجہ بنت خویلد(2)حضرت سودہ بنت زمعہ (3)حضرت عائشہ بنت صدیق اکبر(4)حضرت حفصہ بنت فاروق اعظم (5)حضرت زینب بنت خزیمہ (6)حضرت ام سلمہ بنت ابی امیہ(7)حضرت زینب بنت جحش(8)حضرت جویریہ بنت الحارث(9)حضرت ام حبیبہ بنت ابی سفیان (10)حضرت صفیہ بنت حیی (11)حضرت میمونہ بنت الحارث رضی اللہ تعالی عنہن۔

مشاجرات ِصحابہ رضی اللہ عنہم میں حق حضرت علی رضی اللہ عنہ کی جانب تھا اور ان کے مخالف خطاپر تھے، لیکن یہ خطاء ؛خطاء عنادی نہ تھی بلکہ خطاء اجتہادی تھی اور خطا ء اجتہادی پر طعن اور ملامت جائز نہیں بلکہ سکوت و اجب ہے اور حدیث پاک میں اس پر ایک اجر کا وعدہ ہے۔

حضرت حسین رضی اللہ عنہ اور یزید کے باہمی اختلاف میں حضرت حسین رضی اللہ عنہ حق پر تھے اور یزید کی حکو مت نہ خلافت راشدہ تھی اور نہ خلافت عادلہ اور یزید کے اپنے عملی فسق سے حضرت امیرمعاویہ رضی اللہ عنہ بَری ہیں۔

مرد و عورت کے درج ذیل احکام ایک دوسرے سے مختلف ہیں:

[1]: مرد نمازشروع کرتے وقت اپنے ہاتھ کانوں کے برابر اٹھائے جب کہ عورت ہاتھوں کوسینے کے برابر اٹھائے۔

[2]: مرد نماز میں ہاتھ ناف کے نیچے باندھے۔

جبکہ عورت اپنے سینہ پر ہاتھ باندھے۔

[3]: مرد رکوع میں اپنی انگلیوں کو کشادہ کرتے ہوئے گھٹنوں کو پکڑے گا، اپنی کہنیوں کو پہلو سے جدا رکھے گا، پشت کو سیدھا رکھے گا اور سر کو نہ اونچا کرے گا نہ نیچا۔

جبکہ عورت رکوع میں مرد کی بنسبت کم جھکے گی، اپنے ہاتھ بغیر کشاد کیے ہوئے گھٹنوں پر رکھے گی اور کہنیوں کو پہلو سے ملا کر رکھے گی۔

[4]: مرد سجدہ میں اپنا پیٹ رانوں سے دور رکھیں گے، اپنی کہنیوں کو زمین سے بلند رکھتے ہوئے پہلو سے جدا رکھیں گے اور سرین کو اونچا کریں گے۔

جبکہ عورت ان سب اعضاء کو ملا کراور سمٹا کر رکھے۔

[5]: قعدہ میں مرد اپنا پاؤں بچھا کر اس پر بیٹھے اور دایاں پاؤں کھڑا رکھے۔

جبکہ عورت بائیں کولہے پر بیٹھے اور دونوں پاؤں دائیں طرف نکال دے اور دائیں پنڈلی کو بائیں پنڈلی پررکھے۔

[6]: مرد کا سر اگر نماز میں ننگا ہو تو اس کی نماز ہو جائے گی لیکن اس کے لیے پگڑی اور ٹوپی افضل ہے۔

جبکہ عورت کی نماز بغیر دوپٹہ کے نہیں ہوتی۔

[7]: مردوں کے لیے ضروری ہے کہ وہ فرض نماز باجماعت ادا کریں۔ اس کے ترک پر نبی صلی اللہ علیہ وسلم نے وعیدیں بیان فرمائی ہیں۔

جبکہ عورت کے لیے اپنے گھر میں نماز پڑھنا بہتر ہے۔

[8]: عورت؛ مردوں کی امامت نہیں کراسکتی جبکہ مرد عورتوں کی امامت کرا سکتا ہے۔

[9]: عورتوں کی جماعت مکروہ ہے۔

لیکن اگر وہ جماعت کروانا ہی چاہیں [مثلاً رمضان میں حافظہ عورت تراویح پڑھائے] تو ان کی امام صف کے درمیان میں کھڑی ہو گی۔

جبکہ مردوں کا امام سب سے اگلی صف میں اکیلا کھڑا ہوگا۔

[10]: مردوں کے لیے اذان اور اقامت سنت موکدہ ہے جبکہ عورتوں کے لیے نہ اذان مسنون ہے اور نہ اقامت۔

نوٹ: مرد و عورت کی نماز میں فرق کے تفصیلی دلائل کے لیے بندہ کی مرتب کردہ فائل ”مرد و عورت کی نماز میں فرق“ ملاحظہ فرمائیں۔

ترجمہ: اے اللہ! ہمارے لیے اس میں برکت ڈالیے اور ہم کو مزید دیجیے۔