تین نجات دینے والی چیزیں

اللہ تعالیٰ ہماری طرف سے نبی کریم صلی اللہ علیہ وسلم کو اپنی شایان شان جزا عطا فرمائے جنہوں نے ہمارے لیے کامیابیوں کے راستے روشن کیے اور ہمیں ناکامیوں کے اندھیروں سے بچایا۔

ترجمہ: حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: تین چیزیں ایسی ہیں جو نجات دینے والی ہیں اور تین چیزیں ہلاک کرنے والی ہیں۔ نجات دینے والی چیزیں یہ ہیں : ہر حال )خلوت و جلوت( میں اللہ سے ڈرناخواہ اکیلے ہوں یا لوگوں کے ساتھ، ہر حال )خوشی و غمی( میں حق اور سچ بات کہنا، ہرحال )فراخ دستی و تنگ دستی(میں میانہ روی اختیار کرنا خواہ مال و دولت زیادہ ہو یا کم ہو ۔ اسی طرح ہلاک کرنے والی چیزیں یہ ہیں : نفسانی خواہشات کی پیروی کرنا ، لالچ و طمع کے پیچھے لگنا اور خود پسندی میں مبتلا ہونا ۔ یہ آخری چیز پہلی دو کے مقابلے میں زیادہ ہلاک کرنے والی ہے ۔

اللہ کے رسول صلی اللہ علیہ وسلم نے نجات دینے والی چیزوں کو بھی واضح فرما دیا اور ہلاک کرنے والی چیزوں کو بھی تاکہ پہلی چیزوں کو اپنا کر نجات حاصل کی جائے اور دوسری چیزوں سے خود کو بچایا جائے ۔

نجات دینے والی چیزوں میں سب سے بنیادی چیز تقویٰ ہے ۔ جس کا آسان اور مختصر مفہوم یہ ہے کہ اپنے آپ کو گناہوں کی باتوں اور گناہ کے کاموں سے بچانا اور اگر گناہ ہو جائے تو فوراً توبہ اور استغفار کرنا۔

جب بندہ خود کو اکیلا سمجھتا ہے تو گناہ کرنے پر ایک طرح کی جرات پیدا ہوتی ہے کہ مجھے تو کوئی دیکھ نہیں رہا ۔ میں چھپ کر گناہ کر رہا ہوں اس سے میری نیک نامی میں بھی فرق نہیں آئے گا اور گناہ والی لذت بھی پوری ہو جائے گی جبکہ اس کا ہر عمل اللہ کے حضور ظاہر ہے پوشیدہ نہیں کیونکہ وہ ذات سینوں میں چھپے خیالات تک سے بھی واقف ہے وہ تو دیکھتے وقت آنکھوں کی خیانت تک سے واقف ذات ہے کہ کون کس کو کس نظر سے دیکھ رہا ہے ۔ اس لیے ظاہر اور پوشیدہ اس کے ہاں سب برابر ہے چونکہ خلوت میں انسان کے لیے گناہ کرنا اعلانیہ گناہ کرنے کے مقابلے میں آسان ہوتا ہے اور گناہ کے مواقع بھی زیادہ ہوتے ہیں اس لیے اللہ کے رسول صلی اللہ علیہ وسلم نے اسے پہلے ذکر فرما کر اس بات کی طرف نشاندہی فرمائی ہے کہ اپنی خلوت کو بھی پاک رکھو اس میں اللہ کا خوف تمہارے ہاتھ سے چھوٹنے نہ پائے ۔

اپنے دل کو خوف خدا کی نعمت سے مالا مال رکھنا ہی حقیقی تقویٰ ہے اور اس کی ضرورت ہر حال میں ہوتی ہے خواہ انسان جلوت میں ہو یعنی مخلوق خدا کے سامنے ہو ، لوگوں کے ساتھ ہو کسی مجلس محفل میں ہو ، دوست احباب کے ساتھ ہو ، یا لوگ اسے دیکھ رہے ہوں اس وقت بھی اسے کوئی ناجائز اور حرام کام اور بات نہیں کرنی چاہیے۔

اللہ تعالیٰ ہمارے حال پر ترس فرمائے اور ہم سب کی گناہوں والے ماحول سے حفاظت فرمائے بعض لوگ جب اللہ کو ناراض کرتے ہوئے گناہ کرنے لگتے ہیں تومخلوق خدا کے سامنے بلکہ دوست احباب اور اہل و عیال کو ساتھ ملا کر کرتے ہیں۔ یہ آج کے دور کا ایک فیشن ہے جب کوئی گناہ کا کام کرنا ہو تو پارٹی کی صورت میں کیا جاتا ہے آپ بڑے بڑے گناہوں پر غور کر لیں اور دیکھیں کہ ان گناہوں کو لوگ اکیلے میں کم لوگوں کے سامنے زیادہ کرتے ہیں ۔ حدیث مبارک میں اس بات سے روکا جا رہا ہے کہ مخلوق خدا کے سامنے گناہ کا کام نہ کرو بلکہ اس سے خود کو بچاؤ ۔

اس کی وجہ سے بندہ لوگوں کو اپنے گناہوں پر گواہ بنا لیتا ہے اللہ رب العزت اس کے گناہوں پر پردہ ڈالتے ہیں لیکن یہ خود اللہ کی ستاری والی چادر کو اپنے سے اتار پھینکتا ہے۔ یہ پہلے پہل چھوٹے گناہوں سے شروع ہوتا ہے پھر ایک وقت وہ آتا ہے کہ جب وہ گناہ کبیرہ کرتے وقت بھی کسی سے عار اور شرم محسوس نہیں کرتا نتیجتاً اس میں گناہوں کی عادت پختہ ہو جاتی ہے اور بندہ عادی مجرم بن جاتا ہے ۔

یعنی وہ حقیقتیں جن کے اظہار کا حکم یا ضرورت ہو ان کے بارے میں سچی بات منہ سے نکالنا ۔ معلوم ہوا کہ بعض باتیں دنیا میں حقیقت ہوتی ہیں لیکن کہی نہیں جاتیں کیونکہ اس کے ظاہر کرنے سے شریعت نے روکا ہے یا عقل ہی اچھا نہیں سمجھتی ۔

ترجمہ: حضرت عبداللہ بن مسعود رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: صدق ایسا عمل ہے جو نیکی کی راہ پر چلاتا ہے اور نیکی والا راستہ سیدھا جنت جاتا ہے اور بے شک آدمی سچ بولتا رہتا ہے بولتا رہتا ہے یہاں تک کہ اللہ تعالیٰ کے ہاں وہ” صدیق“ بن جاتا ہے ۔ اور جھوٹ ایسا عمل ہے جو برائی کی راہ پر چلاتا ہے اور برائی والا راستہ سیدھا جہنم جاتا ہے اور بے شک جب کوئی آدمی جھوٹ کی عادت ڈال لیتا ہے وہ جھوٹ بولتا رہتا ہے بولتا رہتا ہے یہاں تک کہ وہ اللہ تعالیٰ کے ہاں کذاب لکھ دیا جاتا ہے ۔

انسان کی زندگی خوشی اور غم سے مرکب ہے ، اس پر ہر وقت ان دو حالتوں میں کوئی نہ کوئی حالت طاری رہتی ہے نجات پانے والا انسان وہ ہے جو خوشی میں بھی اور غمی میں بھی سچ بات کہنے اور سننے کا عادی ہو اور جو بندہ خوشی کے موقع پر اپنے آپ میں اترانے لگے اللہ کے کرم کے بجائے اپنا ذاتی کمال سمجھے اور زبان سے بڑے بول بول دے ۔ اسی طرح اگر کوئی شخص عہدہ یا مال و دولت ہاتھ آنے پر زبان پر کنٹرول نہیں کرتا بلکہ خلاف حقیقت بات کہتا ہے تو وہ اپنے آپ پر کامیابی اور نجات کے راستے خود بند کرتا ہے حالانکہ یہی تو وہ وقت ہوتا ہے جب انسان سچ اور سچے لوگوں کا ساتھ دے ۔

بعض لوگ غم کی حالت میں سچ کا ساتھ چھوڑ دیتے ہیں اللہ پاک ہماری حفاظت فرمائے ذرا سی مصیبت آتی ہے تو لوگ حکم شریعت صبر کو چھوڑ کر بین کرنے لگ جاتے ہیں ، ہائے ہائے کرتے ہیں ، اس موقع پر اپنے لیے جھوٹ بولنے کو تقریباً جائز بلکہ ضروری قرار دیتے ہیں ۔ نبی کریم صلی اللہ علیہ وسلم نے ان دونوں موقعوں پر یہی تعلیم دی ہے کہ خوشی ملے یا غم آ گھیرے ، کسی سے راضی یا ناراض ہوتے وقت سچی بات کا ساتھ دیں یہی نجات کا راستہ ہے ۔

بعض لوگ یہ غلطی کرتے ہیں کہ حق بات اسے سمجھتے ہیں جس میں درشت اور طنز آمیز لہجہ ، الفاظ کی کرختگی، انداز میں بھدا پن مزید یہ کہ الفاظ کا غیر مناسب انتخاب کر کے بدتمیزی کے ساتھ گفتگو کی جائے یہ سراسر غلط ہے ۔

انسان کا کبھی تنگ دستی سے واسطہ پڑتا ہے اور کبھی اس کے مال و دولت میں اللہ فراخی عطا فرماتے ہیں ۔ دونوں طرح کے حالات میں کامیابی اور نجات کیسے ممکن ہے؟نبی کریم صلی اللہ علیہ وسلم نے فرمایا کہ ہرحال )فراخ دستی و تنگ دستی(میں میانہ روی اختیار کرنا خواہ مال و دولت زیادہ ہو یا کم ہو باعث نجات ہے ۔

اسلام کی خوبی ہے اس میں اعتدال کی تعلیم ہےیہاں تک کہ نظام زندگی کو بہتر چلانے کے لیے بھی یہ تعلیم دی گئی ہے کہ افراط و تفریط سے کام نہیں لینا چاہیے۔

مال اللہ کی نعمت ہے،اس کا تعلق عملی زندگی کے ساتھ ہے اگر وہ شریعت کے احکام کے مطابق ہے تو مال کی کثرت باعث رحمت ہے اور اگر عملی زندگی شریعت کے احکام کے خلاف ہے تو مال کی قلت بھی باعث عذاب ہے ۔

ترجمہ: صحابہ کرام رضی اللہ عنہم میں سے ایک صحابی روایت کرتے ہیں کہ ایک مرتبہ ہم لوگ بیٹھے ہوئے تھے کہ اتنے میں رسول اللہ صلی اللہ علیہ وسلم ہمارے پاس تشریف لائے آپ صلی اللہ علیہ وسلم کا سر مبارک گیلا تھا )یعنی غسل کر کے تشریف لائے تھے( ہم نے عرض کی کہ یا رسول اللہ آپ بہت خوش دکھائی دے رہے ہیں۔ آپ صلی اللہ علیہ وسلم نے فرمایا : جی ہاں )ایسا ہی ہے (صحابی فرماتے ہیں کہ پھر لوگ مال ودولت کے بارے میں گفتگو کرنے لگے )یعنی اس کی مذمت بیان کرنے لگے(تو نبی کریم صلی اللہ علیہ وسلم نے فرمایا: خوف خدا رکھنے والے شخص کے لیے مال و دولت بری چیز نہیں اور متقی آدمی کے لیے مال و دولت سے بڑھ کر صحت وتندرستی زیادہ اچھی چیز ہے اور دل کی خوشی )سکون و چین( بھی اللہ کی نعمتوں میں سے ایک نعمت ہے۔

ترجمہ: حضرت ابوالدرداء رضی اللہ عنہ سے روایت ہے نبی کریم صلی اللہ علیہ وسلم نے فرمایا: انسان کی سمجھ داری اپنی معیشت میں میانہ روی قائم کرنا ہے ۔

ترجمہ: حضرت عبداللہ بن مسعود رضی اللہ عنہ سے روایت ہے رسول اللہ صلی اللہ علیہ وسلم نے فرمایا:وہ کبھی محتاج نہیں ہوتا جو خرچ کرنے میں میانہ روی کو ملحوظ رکھے۔

ترجمہ: حضرت حذیفہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: مال کی فراوانی کے وقت میانہ روی قائم کرنا، تنگدستی اور غربت کے وقت میانہ روی قائم کرنا اور عبادات میں میانہ روی قائم کرنا بہت ہی پسندیدہ بات ہے۔

اللہ تعالیٰ ہمیں وہ تمام چیزیں اختیار کرنے کی توفیق عطا فرمائے جو باعث نجات ہیں ۔

والسلام

محمدالیاس گھمن

خانقاہ حنفیہ، کراچی

جمعرات ،14 نومبر ، 2019ء